AjitJalandhar.Com Instant Articles

ਜਦੋਂ ਜ਼ਿੰਦਗੀ ਦਾਅ 'ਤੇ ਹੋਵੇ ਤਾਂ ਇਮਾਨਦਾਰੀ ਨਾਲ ਕੰਮ ਲੈਣਾ ਜ਼ਰੂਰੀ-ਸੁਪਰੀਮ ਕੋਰਟ

Thu, 17 Jul 2025 00:00:00 +0000

ਜਦੋਂ ਜ਼ਿੰਦਗੀ ਦਾਅ 'ਤੇ ਹੋਵੇ ਤਾਂ ਇਮਾਨਦਾਰੀ ਨਾਲ ਕੰਮ ਲੈਣਾ ਜ਼ਰੂਰੀ-ਸੁਪਰੀਮ ਕੋਰਟ

ਨਵੀਂ ਦਿੱਲੀ, 16 ਜੁਲਾਈ (ਏਜੰਸੀ)-ਸੁਪਰੀਮ ਕੋਰਟ ਨੇ ਕਿਹਾ ਕਿ ਜਦੋਂ ਮਨੁੱਖੀ ਜਿੰਦਗੀ ਦਾਅ 'ਤੇ ਹੋਵੇ ਅਤੇ ਕੀਮਤ ਖੂਨ ਨਾਲ ਚੁਕਾਣੀ ਪਏ ਤਾਂ ਅਜਿਹੇ ਮਾਮਲੇ 'ਚ ਪੂਰੀ ਇਮਾਨਦਾਰੀ ਨਾਲ ਨਜਿੱਠਣਾ ਜ਼ਰੂਰੀ ਹੁੰਦਾ ਹੈ | ਅਦਾਲਤ ਨੇ 2013 'ਚ ਆਪਣੇ ਪਰਿਵਾਰ ਦੀ ਹੱਤਿਆ ਦੇ ਜ਼ੁਰਮ 'ਚ ਮੌਤ ਦੀ ਸਜ਼ਾ ਪ੍ਰਾਪਤ ਇਕ ਵਿਅਕਤੀ ਨੂੰ ਬਰੀ ਕਰ ਦਿੱਤਾ | ਜਸਟਿਸ ਵਿਕਰਮ ਨਾਥ, ਜਸਟਿਸ ਸੰਜੇ ਕਰੋਲ ਅਤੇ ਜਸਟਿਸ ਸੰਦੀਪ ਮਹਿਤਾ ਦੇ ਤਿੰਨ ਮੈਂਬਰੀ ਬੈਂਚ ਨੇ ਦੋਸ਼ੀ ਦੀ ਮੌਤ ਦੀ ਸਜ਼ਾ ਬਰਕਰਾਰ ਰੱਖਣ ਵਾਲੇ ਪੰਜਾਬ ਤੇ ਹਰਿਆਣਾ ਹਾਈ ਕੋਰਟ ਦੇ ਆਦੇਸ਼ ਨੂੰ ਰੱਦ ਕਰ ਦਿੱਤਾ | ਅਦਾਲਤ ਨੇ ਇਸਤਗਾਸਾ ਪੱਖ ਦੇ ਗਵਾਹਾਂ ਦੀ ਗਵਾਹੀ 'ਚ ਵੱਡਾ ਵਿਰੋਧਾਭਾਸ ਪਾਇਆ, ਇਸ ਲਈ ਇਹ ਸਪੱਸ਼ਟ ਨਹੀਂ ਹੋ ਪਾਇਆ ਕਿ ਦੋਸ਼ੀ ਨੇ ਸੱਚ 'ਚ ਅਪਰਾਧ ਕੀਤਾ ਹੈ ਜਾਂ ਨਹੀਂ | ਅਦਾਲਤ ਨੇ ਕਿਹਾ ਕਿ ਫਿਰ ਦੁਹਰਾਉਂਦੇ ਹੋਏ ਅਸੀਂ ਇਹ ਕਹਿਣਾ ਚਾਹੁੰਦੇ ਹਾਂ ਕਿ ਜਦੋਂ ਇਨਸਾਨੀ ਜੀਵਨ ਦਾਅ 'ਤੇ ਹੋਵੇ ਅਤੇ ਕੀਮਤ ਖੂਨ ਹੋਵੇ, ਉਦੋਂ ਪੁਖਤਾ ਸਬੂਤ ਹੋਣੇ ਚਾਹੀਦੇ ਹਨ ਅਤੇ ਉਸ 'ਚ ਕੋਈ ਵੀ ਅਣਗਹਿਲੀ ਨਹੀਂ ਹੋਣੀ ਚਾਹੀਦੀ | ਅਜਿਹੇ ਮਾਮਲਿਆਂ 'ਚ ਪੂਰੀ ਇਮਾਨਦਾਰੀ ਨਾਲ ਕੰਮ ਲੈਣਾ ਜ਼ਰੂਰੀ ਹੁੰਦਾ ਹੈ | ਸੁਪਰੀਮ ਕੋਰਟ ਨੇ ਆਦੇਸ਼ 'ਚ ਅੱਗੇ ਕਿਹਾ ਕਿ ਅਸੀਂ ਦੋਸ਼ੀ (ਅਪੀਲਕਰਤਾ) ਨੂੰ ਦੋਸ਼ੀ ਨਹੀਂ ਠਹਿਰਾਅ ਸਕਦੇ, ਕਿਉਂਕਿ ਉਸ ਦਾ ਅਪਰਾਧ ਸਾਬਿਤ ਨਹੀਂ ਕੀਤਾ ਗਿਆ | ਇਸਤਗਾਸਾ ਪੱਖ ਨੇ ਦੋਸ਼ ਲਗਾਇਆ ਸੀ ਕਿ ਬਲਜਿੰਦਰ ਨਾਂਅ ਦੇ ਵਿਅਕਤੀ ਨੇ 29 ਨਵੰਬਰ 2013 ਨੂੰ ਕਥਿਤ ਤੌਰ 'ਤੇ ਆਪਣੀ ਪਤਨੀ, ਬੱਚੇ ਤੇ ਸਾਲੀ ਦੀ ਹੱਤਿਆ ਕਰ ਦਿੱਤੀ ਸੀ ਅਤੇ ਦੋ ਹੋਰਾਂ ਨੂੰ ਜ਼ਖਮੀ ਕਰ ਦਿੱਤਾ ਸੀ | ਦੋਸ਼ੀ ਵਾਰਦਾਤ ਕਰਨ ਤੋਂ ਕੁਝ ਦਿਨ ਪਹਿਲਾਂ ਆਪਣੀ ਸੱਸ ਦੇ ਘਰ ਗਿਆ ਸੀ ਅਤੇ ਆਪਣੀ ਪਤਨੀ ਤੇ ਬੱਚਿਆਂ ਨੂੰ ਮਾਰਨ ਦੀ ਧਮਕੀ ਦਿੱਤੀ ਸੀ, ਜੋ ਪੈਸਿਆਂ ਦੇ ਵਿਵਾਦ ਦੇ ਚਲਦਿਆਂ ਉਸ ਨੂੰ ਛੱਡ ਕੇ ਚਲੇ ਗਏ ਸਨ |

24 ਹਜ਼ਾਰ ਕਰੋੜ ਦੇ ਬਜਟ ਵਾਲੀ 'ਪ੍ਰਧਾਨ ਮੰਤਰੀ ਧਨ ਧਾਨਯ ਕ੍ਰਿਸ਼ੀ ਯੋਜਨਾ' ਨੂੰ ਮਨਜ਼ੂਰੀ

Thu, 17 Jul 2025 00:00:00 +0000

24 ਹਜ਼ਾਰ ਕਰੋੜ ਦੇ ਬਜਟ ਵਾਲੀ 'ਪ੍ਰਧਾਨ ਮੰਤਰੀ ਧਨ ਧਾਨਯ ਕ੍ਰਿਸ਼ੀ ਯੋਜਨਾ' ਨੂੰ ਮਨਜ਼ੂਰੀ

ਮੰਤਰੀ ਮੰਡਲ ਵਲੋਂ ਨਵਿਆਉਣਯੋਗ ਊਰਜਾ ਵਿਚ ਨਿਵੇਸ਼ ਨੂੰ ਵੱਡਾ ਹੁਲਾਰਾ
ਨਵੀਂ ਦਿੱਲੀ, 16 ਜੁਲਾਈ (ਉਪਮਾ ਡਾਗਾ ਪਾਰਥ)-ਕੇਂਦਰੀ ਮੰਤਰੀ ਮੰਡਲ ਨੇ ਕਿਸਾਨਾਂ ਦੇ ਜੀਵਨ \'ਚ ਬਦਲਾਅ ਲਿਆਉਣ ਲਈ \'ਪ੍ਰਧਾਨ ਮੰਤਰੀ ਧਨ ਧਾਨਯ ਕ੍ਰਿਸ਼ੀ ਯੋਜਨਾ\' ਨੂੰ ਮਨਜ਼ੂਰੀ ਦੇ ਦਿੱਤੀ ਹੈ | ਇਹ ਯੋਜਨਾ ਖੇਤੀ ਵਿਚ ਪਛੜੇ ਜ਼ਿਲਿ੍ਹਆਂ ਨੂੰ ਅੱਗੇ ਵਧਾਉਣ ਦੀ ਦਿਸ਼ਾ \'ਚ ਚੁੱਕਿਆ ਕਦਮ ਹੈ | ਇਸ ਯੋਜਨਾ ਵਿਚ ਮੰਤਰਾਲਿਆਂ ਦੀਆਂ 36 ਮੌਜੂਦਾ ਸਕੀਮਾਂ ਨੂੰ ਸ਼ਾਮਿਲ ਕੀਤਾ ਜਾਵੇਗਾ | ਕੇਂਦਰੀ ਮੰਤਰੀ ਅਸ਼ਵਨੀ ਵੈਸ਼ਨਵ ਨੇ ਜਾਣਕਾਰੀ ਦਿੰਦਿਆਂ ਕਿਹਾ ਕਿ 24 ਹਜ਼ਾਰ ਕਰੋੜ ਰੁਪਏ ਦੇ ਸਾਲਾਨਾ ਬਜਟ ਵਾਲੀ ਇਸ ਯੋਜਨਾ ਦੇ ਘੇਰੇ ਵਿਚ ਦੇਸ਼ ਭਰ ਦੇ 100 ਜ਼ਿਲ੍ਹੇ ਆਉਣਗੇ, ਜਿਨ੍ਹਾਂ \'ਚ ਹਰ ਰਾਜ ਦਾ ਘੱਟੋ-ਘੱਟ ਇਕ ਜ਼ਿਲ੍ਹਾ ਜ਼ਰੂਰ ਸ਼ਾਮਿਲ ਹੋਵੇਗਾ | ਜ਼ਿਲ੍ਹੇ ਦੀ ਚੋਣ ਰਾਜਾਂ ਦੀ ਸਿਫ਼ਾਰਸ਼ \'ਤੇ 3 ਪੈਮਾਨਿਆਂ ਦੇ ਆਧਾਰ \'ਤੇ ਕੀਤੀ ਜਾਵੇਗੀ, ਜਿਸ ਵਿਚ ਘੱਟ ਉਤਪਾਦਕਤਾ, ਫ਼ਸਲਾਂ ਦਾ ਔਸਤ ਸੰਘਣਾਪਣ ਅਤੇ ਔਸਤ ਤੋਂ ਘੱਟ ਕਰਜ਼ਾ ਸਹੂਲਤਾਂ ਸ਼ਾਮਿਲ ਹਨ | ਕੇਂਦਰੀ ਮੰਤਰੀ ਨੇ ਕਿਹਾ ਕਿ ਇਸ ਯੋਜਨਾ ਵਿਚ ਖੇਤੀਬਾੜੀ ਅਤੇ ਸੰਬੰਧਿਤ ਕਿੱਤਿਆਂ ਜਿਵੇਂ ਪਸ਼ੂ ਪਾਲਣ, ਮੱਛੀ ਪਾਲਣ ਤੇ ਮੁਰਗੀ ਪਾਲਣ ਆਦਿ ਨੂੰ ਸ਼ਾਮਿਲ ਕੀਤਾ ਜਾਵੇਗਾ | ਇਸ ਸਕੀਮ ਨੂੰ ਵਿੱਤੀ ਸਾਲ 2025-26 ਤੋਂ ਸ਼ੁਰੂ ਕੀਤਾ ਜਾਵੇਗਾ ਅਤੇ ਯੋਜਨਾ ਦੀ ਮਿਆਦ 6 ਸਾਲ ਹੋਵੇਗੀ, ਜਿਸ \'ਚ ਹਰ ਸਾਲ 24 ਹਜ਼ਾਰ ਕਰੋੜ ਰੁਪਏ ਖਰਚ ਕੀਤੇ ਜਾਣਗੇ | ਯੋਜਨਾ ਨੂੰ ਲਾਗੂ ਕਰਨ ਲਈ ਹਰ ਜ਼ਿਲ੍ਹੇ ਦਾ ਇਕ ਮਾਸਟਰ ਪਲਾਨ ਤਿਆਰ ਕੀਤਾ ਜਾਵੇਗਾ | ਇਸ ਯੋਜਨਾ ਨੂੰ ਸੁਚਾਰੂ ਢੰਗ ਨਾਲ ਲਾਗੂ ਕਰਨ ਲਈ ਰਾਜ, ਜ਼ਿਲ੍ਹਾ ਅਤੇ ਬਲਾਕ ਪੱਧਰ \'ਤੇ ਨਿਗਰਾਨੀ ਕੀਤੀ ਜਾਵੇਗੀ ਅਤੇ ਖੇਤੀ ਨਾਲ ਸੰਬੰਧਿਤ ਹਰ ਧਿਰ ਨੂੰ ਨਾਲ ਜੋੜਿਆ ਜਾਵੇਗਾ | ਕੇਂਦਰੀ ਮੰਤਰੀ ਨੇ ਕਿਹਾ ਕਿ ਉਕਤ ਯੋਜਨਾ 100 ਅਕਾਂਸ਼ੀ ਜ਼ਿਲ੍ਹੇ ਦੀ ਸਫ਼ਲਤਾ ਤੋਂ ਪ੍ਰੇਰਿਤ ਹੋ ਕੇ ਲਿਆਂਦੀ ਗਈ ਹੈ | ਇਸ ਯੋਜਨਾ ਵਿਚ ਉਹ ਜ਼ਿਲ੍ਹੇ ਚੁਣੇ ਜਾਣਗੇ, ਜੋ ਦੇਸ਼ ਦੇ ਔਸਤ ਖੇਤੀ ਜ਼ਿਲਿ੍ਹਆਂ ਤੋਂ ਪੱਛੜੇ ਹੋਣਗੇ ਅਤੇ ਯੋਜਨਾ ਦਾ ਉਦੇਸ਼ ਉਨ੍ਹਾਂ ਜ਼ਿਲਿ੍ਹਆਂ ਨੂੰ ਦੇਸ਼ ਦੇ ਔਸਤ ਖੇਤੀ ਜ਼ਿਲਿ੍ਹਆਂ ਦੇ ਬਰਾਬਰ ਜਾਂ ਉਨ੍ਹਾਂ ਤੋਂ ਅੱਗੇ ਪਹੁੰਚਾਉਣਾ ਹੈ |
ਨਵਿਆਉਣ ਯੋਗ ਊਰਜਾ ਨੂੰ ਹੁਲਾਰਾ
ਕੇਂਦਰੀ ਮੰਤਰੀ ਮੰਡਲ ਨੇ ਨਵਿਆਉਣ ਯੋਗ ਊਰਜਾ ਨੂੰ ਹੁਲਾਰਾ ਦਿੰਦਿਆਂ ਸਰਕਾਰੀ ਕੰਪਨੀ ਐਨ. ਟੀ. ਪੀ.ਸੀ. ਨੂੰ ਨਵਿਆਉਣ ਯੋਗ ਊਰਜਾ \'ਚ 20 ਹਜ਼ਾਰ ਕਰੋੜ ਰੁਪਏ ਦੀ ਨਿਵੇਸ਼ ਦੀ ਯੋਜਨਾ ਨੂੰ ਮਨਜ਼ੂਰੀ ਦੇ ਦਿੱਤੀ | ਨਾਲ ਹੀ ਐਨ. ਐਲ. ਸੀ. ਇੰਡੀਆ ਨੂੰ ਆਪਣੀ ਸਬਸਿਡੀ ਕੰਪਨੀ ਐਨ. ਆਈ. ਆਰ. ਐਲ. ਵਿਚ 7 ਹਜ਼ਾਰ ਕਰੋੜ ਰੁਪਏ ਦੇ ਨਿਵੇਸ਼ ਦੀ ਯੋਜਨਾ ਨੂੰ ਵੀ ਪ੍ਰਵਾਨਗੀ ਦੇ ਦਿੱਤੀ | ਜ਼ਿਕਰਯੋਗ ਹੈ ਕਿ ਹਰ ਸਰਕਾਰੀ ਕੰਪਨੀ ਨੂੰ ਇਕ ਵਿਸ਼ੇਸ਼ ਹੱਦ ਤੋਂ ਬਾਅਦ ਨਿਵੇਸ਼ ਕਰਨ ਦੇ ਫ਼ੈਸਲੇ ਲਈ ਕੈਬਨਿਟ ਦੀ ਇਜਾਜ਼ਤ ਲੈਣੀ ਹੁੰਦੀ ਹੈ | ਬੁੱਧਵਾਰ ਨੂੰ ਇਹ ਮਨਜ਼ੂਰੀ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ ਪ੍ਰਧਾਨਗੀ ਹੇਠ ਆਰਥਿਕ ਮਾਮਲਿਆਂ ਦੀ ਕੈਬਨਿਟ ਕਮੇਟੀ ਵਲੋਂ ਦਿੱਤੀ ਗਈ | ਕੈਬਨਿਟ ਵਲੋਂ ਇਹ ਫ਼ੈਸਲਾ ਕੰਪਨੀਆਂ ਦੇ ਬੋਰਡ ਨੂੰ ਦਿੱਤੀ ਮਨਜ਼ੂਰੀ ਨਾਲ ਸੰਬੰਧਿਤ ਹੈ | ਮੰਤਰੀ ਮੰਡਲ ਦੇ ਫ਼ੈਸਲੇ ਮੁਤਾਬਿਕ ਐਨ. ਟੀ. ਪੀ. ਸੀ. ਨੂੰ ਨਵਿਆਉਣ ਯੋਗ ਊਰਜਾ ਦੇ ਖੇਤਰ ਵਿਚ ਨਿਵੇਸ਼ ਲਈ ਮੌਜੂਦਾ ਹੱਦ ਤੋਂ ਉਪਰ ਜਾ ਕੇ 20 ਹਜ਼ਾਰ ਕਰੋੜ ਰੁਪਏ ਤੱਕ ਦੇ ਨਿਵੇਸ਼ ਦੀ ਇਜਾਜ਼ਤ ਦਿੱਤੀ ਹੈ | ਇਹ ਨਿਵੇਸ਼ ਐਨ. ਟੀ. ਪੀ. ਸੀ. ਗਰੀਨ ਐਨਰਜੀ ਲਿਆਉਣ ਅਤੇ ਇਸ ਦੀਆਂ ਸਹਾਇਕ ਕੰਪਨੀਆਂ ਅਤੇ ਸੰਯੁਕਤ ਉੱਦਮ ਕੰਪਨੀਆਂ ਰਾਹੀਂ ਕੀਤਾ ਜਾਵੇਗਾ ਤਾਂ ਜੋ ਸਾਲ 2032 ਤੱਕ 60 ਗੀਗਾਵਾਟ ਨਵਿਆਉਣ ਯੋਗ ਊਰਜਾ ਸਮਰੱਥਾ ਦਾ ਟੀਚਾ ਪ੍ਰਾਪਤ ਕੀਤਾ ਜਾ ਸਕੇ | ਇਸ ਤੋਂ ਇਲਾਵਾ ਐਨ. ਐਲ. ਸੀ. ਆਈ. ਐਲ. ਨੂੰ ਵੀ 7000 ਕਰੋੜ ਰੁਪਏ ਦੇ ਨਿਵੇਸ਼ ਦੀ ਮਨਜ਼ੂਰੀ ਦਿੱਤੀ ਹੈ, ਜੋ ਉਹ ਆਪਣੀ ਪੂਰੀ ਮਲਕੀਅਤ ਵਾਲੀ ਸਹਾਇਕ ਕੰਪਨੀ ਐਨ. ਐਲ. ਸੀ. ਇੰਡੀਆ ਰੀਨਿਊਏਬਲ ਲਿਮਟਿਡ (ਐਨ. ਆਈ. ਆਰ. ਐਲ.) ਦੇ ਰਾਹੀਂ ਨਵਿਆਉਣ ਯੋਗ ਊਰਜਾ ਪ੍ਰਾਜੈਕਟ ਵਿਚ ਲਗਾਏਗੀ | ਇਸ ਨਾਲ ਕੰਪਨੀ ਨੂੰ ਸੰਚਾਲਨ ਅਤੇ ਵਿੱਤੀ ਲਚੀਲਾਪਨ ਮਿਲੇਗਾ |

ਬੰਗਾਲੀ ਲੋਕਾਂ ਨੂੰ ਪ੍ਰੇਸ਼ਾਨ ਕਰਨਾ ਬੰਦ ਕਰੇ ਭਾਜਪਾ-ਮਮਤਾ

Thu, 17 Jul 2025 00:00:00 +0000

ਬੰਗਾਲੀ ਲੋਕਾਂ ਨੂੰ ਪ੍ਰੇਸ਼ਾਨ ਕਰਨਾ ਬੰਦ ਕਰੇ ਭਾਜਪਾ-ਮਮਤਾ

ਕੋਲਕਾਤਾ, 16 ਜੁਲਾਈ (ਏਜੰਸੀ)-ਪੱਛਮੀ ਬੰਗਾਲ ਦੀ ਮੁੱਖ ਮੰਤਰੀ ਤੇ ਤਿ੍ਣਮੂਲ ਕਾਂਗਰਸ ਸੁਪਰੀਮੋ ਮਮਤਾ ਬੈਨਰਜੀ ਨੇ ਭਾਜਪਾ ਦੀ ਅਗਵਾਈ ਵਾਲੀ ਕੇਂਦਰ ਸਰਕਾਰ 'ਤੇ ਦੇਸ਼ ਭਰ 'ਚ ਬੰਗਾਲੀ ਭਾਸ਼ਾ ਬੋਲਣ ਵਾਲੇ ਲੋਕਾਂ ਨੂੰ ਪ੍ਰੇਸ਼ਾਨ ਕਰਨ ਅਤੇ ਉਨ੍ਹਾਂ ਨਾਲ ਦੁਰਵਿਹਾਰ ਕਰਨ ਦੀ ਨੀਤੀ ਦਾ ਦੋਸ਼ ਲਗਾਇਆ ਅਤੇ ਭਗਵਾ ਪਾਰਟੀ ਨੂੰ ਚਿਤਾਵਨੀ ਦਿੱਤੀ ਕਿ ਜੇਕਰ ਉਸ ਨੇ ਇਸ ਤਰ੍ਹਾਂ ਦੀਆਂ ਕਾਰਵਾਈਆਂ 'ਤੇ ਤੁਰੰਤ ਰੋਕ ਨਾ ਲਗਾਈ ਤਾਂ ਉਸ ਨੂੰ ਗੰਭੀਰ ਰਾਜਨੀਤਕ ਨਤੀਜੇ ਭੁਗਤਣੇ ਪੈਣਗੇ | ਭਾਜਪਾ ਖਿਲਾਫ਼ ਵਿਰੋਧ ਮਾਰਚ ਕਰਨ ਉਪਰੰਤ ਇਥੇ ਇਕ ਰੈਲੀ ਨੂੰ ਸੰਬੋਧਨ ਕਰਦਿਆਂ ਮਮਤਾ ਨੇ ਦੋਸ਼ ਲਗਾਇਆ ਕਿ ਮੈਂ ਕੇਂਦਰ ਸਰਕਾਰ ਦੇ ਉਨ੍ਹਾਂ ਨੋਟਿਸਾਂ ਨੂੰ ਚੁਣੌਤੀ ਦੇਵਾਂਗੀ ਜੋ ਬੰਗਾਲੀ ਬੋਲਣ ਵਾਲੇ ਲੋਕਾਂ ਨੂੰ ਪ੍ਰੇਸ਼ਾਨ ਕਰਨ ਅਤੇ ਮਾਮੂਲੀ ਸ਼ੱਕ 'ਤੇ ਉਨ੍ਹਾਂ ਨੂੰ ਹਿਰਾਸਤ 'ਚ ਲੈਣ ਲਈ ਭਾਜਪਾ ਸ਼ਾਸਤ ਰਾਜਾਂ ਨੂੰ ਗੁਪਤ ਰੂਪ ਨਾਲ ਭੇਜੇ ਗਏ ਸਨ | ਉਨ੍ਹਾਂ ਕਿਹਾ ਕਿ ਬੰਗਾਲ ਦੇ ਲਗਪਗ 22 ਲੱਖ ਪ੍ਰਵਾਸੀ ਮਜ਼ਦੂਰ ਦੇਸ਼ ਦੇ ਹੋਰ ਹਿੱਸਿਆਂ 'ਚ ਕੰਮ ਕਰ ਰਹੇ ਹਨ, ਜਿਨ੍ਹਾਂ ਕੋਲ ਆਧਾਰ, ਈ.ਪੀ.ਆਈ.ਸੀ. ਤੇ ਪੈਨ ਕਾਰਡ ਵਰਗੇ ਪਛਾਣ ਦਸਤਾਵੇਜ਼ ਹਨ ਅਤੇ ਕਿਸੇ ਮਾਮੂਲੀ ਕਾਰਨ ਉਨ੍ਹਾਂ ਨਾਲ ਕੀਤੇ ਕਿਸੇ ਵੀ ਦੁਰਵਿਹਾਰ ਨੂੰ ਉਹ ਬਰਦਾਸ਼ਤ ਨਹੀਂ ਕਰੇਗੀ |

ਸ਼ੁਭਾਂਸ਼ੂ ਨੇ ਭਾਰਤ ਨੂੰ ਆਪਣਾ ਪੁਲਾੜ ਸਟੇਸ਼ਨ ਬਣਾਉਣ ਦੇ ਇਕ ਕਦਮ ਹੋਰ ਨੇੜੇ ਪਹੁੰਚਾਇਆ

Thu, 17 Jul 2025 00:00:00 +0000

ਸ਼ੁਭਾਂਸ਼ੂ ਨੇ ਭਾਰਤ ਨੂੰ ਆਪਣਾ ਪੁਲਾੜ ਸਟੇਸ਼ਨ ਬਣਾਉਣ ਦੇ ਇਕ ਕਦਮ ਹੋਰ ਨੇੜੇ ਪਹੁੰਚਾਇਆ

ਪ੍ਰਸਤਾਵ ਕੀਤਾ ਪਾਸ
ਨਵੀਂ ਦਿੱਲੀ, 16 ਜੁਲਾਈ (ਉਪਮਾ ਡਾਗਾ ਪਾਰਥ)-ਪੁਲਾੜ ਯਾਤਰੀ ਸ਼ੁਭਾਂਸੂ ਸ਼ੁਕਲਾ ਦੀ ਪੁਲਾੜ \'ਚੋਂ ਸਫਲ ਵਾਪਸੀ ਤੋਂ ਬਾਅਦ ਕੇਂਦਰੀ ਮੰਤਰੀ ਮੰਡਲ ਨੇ ਉਨ੍ਹਾਂ ਦੀ ਪੁਲਾੜ ਯਾਤਰਾ ਦੀ ਸ਼ਲਾਘਾ ਕਰਦਿਆਂ ਇਕ ਪ੍ਰਸਤਾਵ ਪਾਸ ਕੀਤਾ | ਮੰਤਰੀ ਮੰਡਲ ਦੀ ਬੈਠਕ \'ਚ ਪਾਸ ਕੀਤੇ ਪ੍ਰਸਤਾਵ ਵਿਚ ਕਿਹਾ ਗਿਆ ਹੈ ਕਿ ਸ਼ੁਭਾਂਸ਼ੂ ਸ਼ੁਕਲਾ ਦੇ ਪੁਲਾੜ ਮਿਸ਼ਨ ਨੇ ਭਾਰਤ ਨੂੰ ਆਪਣਾ ਪੁਲਾੜ ਸਟੇਸ਼ਨ ਬਣਾਉਣ ਦੇ ਇਕ ਕਦਮ ਹੋਰ ਨੇੜੇ ਪਹੁੰਚਾ ਦਿੱਤਾ | ਸੂਚਨਾ ਅਤੇ ਪ੍ਰਸਾਰਣ ਮੰਤਰੀ ਅਸ਼ਵਨੀ ਵੈਸ਼ਨਵ ਨੇ ਬੈਠਕ ਤੋਂ ਬਾਅਦ ਪੱਤਰਕਾਰਾਂ ਨੂੰ ਜਾਣਕਾਰੀ ਦਿੰਦਿਆਂ ਕਿਹਾ ਕਿ ਅੱਜ ਕੇਂਦਰੀ ਮੰਤਰੀ ਮੰਡਲ ਨੇ ਗਰੁੱਪ ਕੈਪਟਨ ਸ਼ੁਭਾਂਸ਼ੂ ਸ਼ੁਕਲਾ ਦੀ ਅੰਤਰਰਾਸ਼ਟਰੀ ਪੁਲਾੜ ਸਟੇਸ਼ਨ ਤੋਂ ਵਾਪਸੀ \'ਤੇ ਇਕ ਪ੍ਰਸਤਾਵ ਪਾਸ ਕੀਤਾ ਹੈ | ਇਹ ਪੂਰੇ ਦੇਸ਼ ਦੇ ਲਈ ਮਾਣ ਅਤੇ ਖੁਸ਼ੀ ਦਾ ਮੌਕਾ ਹੈ | ਅੱਜ ਪੂਰੇ ਦੇਸ਼ ਦੇ ਨਾਲ ਮੰਤਰੀ ਮੰਡਲ ਵੀ ਗਰੁੱਪ ਕੈਪਟਨ ਸ਼ੁਭਾਂਸ਼ੂ ਸ਼ੁਕਲਾ ਨੂੰ ਧਰਤੀ \'ਤੇ ਉਨ੍ਹਾਂ ਦੀ ਸਫ਼ਲ ਵਾਪਸੀ \'ਤੇ ਵਧਾਈ ਦਿੰਦਾ ਹੈ | ਵੈਸ਼ਨਵ ਨੇ ਕਿਹਾ ਕਿ ਉਨ੍ਹਾਂ ਨੇ ਅੰਤਰਰਾਸ਼ਟਰੀ ਪੁਲਾੜ ਸਟੇਸ਼ਨ \'ਤੇ 18 ਦਿਨਾਂ ਦਾ ਇਤਿਹਾਸਕ ਮਿਸ਼ਨ ਪੂਰਾ ਕੀਤਾ ਹੈ | ਇਹ ਭਾਰਤ ਦੇ ਪੁਲਾੜ ਪ੍ਰੋਗਰਾਮ \'ਚ ਇਕ ਨਵਾਂ ਅਧਿਆਇ ਹੈ, ਜੋ ਸਾਡੇ ਭਵਿੱਖ ਦੀ ਸੁਨਹਿਰੀ ਝਲਕ ਪੇਸ਼ ਕਰਦਾ ਹੈ | ਮੰਤਰੀ ਮੰਡਲ ਨੇ ਇਸ ਇਤਿਹਾਸਕ ਉਪਲਬਧੀ ਲਈ ਇਸਰੋ ਦੇ ਸਾਇੰਸਦਾਨਾਂ ਅਤੇ ਇੰਜੀਨੀਅਰਿੰਗਾਂ ਦੀ ਟੀਮ ਨੂੰ ਵੀ ਵਧਾਈ ਦਿੱਤੀ | ਕੇਂਦਰੀ ਮੰਤਰੀ ਨੇ ਕਿਹਾ ਕਿ ਗਰੁੱਪ ਕੈਪਟਨ ਸ਼ੁਭਾਂਸ਼ੂ ਸ਼ੁਕਲਾ ਦਾ ਮਿਸ਼ਨ ਸਿਰਫ਼ ਇਕ ਵਿਅਕਤੀ ਦੀ ਸਫਲਤਾ ਨਹੀਂ, ਸਗੋਂ ਭਾਰਤ ਦੀ ਨੌਜਵਾਨ ਪੀੜ੍ਹੀ ਲਈ ਪ੍ਰੇਰਨਾ ਦੀ ਇਕ ਮਿਸਾਲ ਹੈ | ਇਸ ਨਾਲ ਸਾਡੇ ਬੱਚਿਆਂ ਅਤੇ ਨੌਜਵਾਨਾਂ \'ਚ ਜਾਨਣ ਦੀ ਇੱਛਾ ਵਧੇਗੀ ਅਤੇ ਵਿਗਿਆਨਕ ਸੋਚ ਦਾ ਵਿਕਾਸ ਹੋਵੇਗਾ | ਸ਼ੁਕਲਾ ਵਲੋਂ ਪੁਲਾੜ ਵਿਚ ਕੀਤੇ ਕਈ ਤਜਰਬਿਆਂ ਦਾ ਵੀ ਦੇਸ਼ ਨੂੰ ਫਾਇਦਾ ਹੋਵੇਗਾ | ਮੰਤਰੀ ਮੰਡਲ ਨੇ ਇਸ ਮਿਸ਼ਨ ਨੂੰ ਵਿਕਸਿਤ ਭਾਰਤ ਦੇ ਸੰਕਲਪ ਨੂੰ ਨਵੀਂ ਊਰਜਾ ਦੇਣ ਅਤੇ ਪੁਲਾੜ ਖੇਤਰ ਵਿਚ ਸੁਧਾਰਾਂ ਨੂੰ ਨਵੀਂ ਗਤੀ ਦੇਣ ਦੀ ਦਿਸ਼ਾ ਵਿਚ ਚੁੱਕਿਆ ਕਦਮ ਕਰਾਰ ਦਿੱਤਾ |

ਗਾਜ਼ੀਆਬਾਦ 'ਚ 9ਵੀਂ ਜਮਾਤ ਦੀ ਵਿਦਿਆਰਥਣ ਨਾਲ 4 ਨਾਬਾਲਗਾਂ ਵਲੋਂ ਜਬਰ ਜਨਾਹ

Thu, 17 Jul 2025 00:00:00 +0000

ਗਾਜ਼ੀਆਬਾਦ 'ਚ 9ਵੀਂ ਜਮਾਤ ਦੀ ਵਿਦਿਆਰਥਣ ਨਾਲ 4 ਨਾਬਾਲਗਾਂ ਵਲੋਂ ਜਬਰ ਜਨਾਹ

ਗਾਜ਼ੀਆਬਾਦ, 16 ਜੁਲਾਈ (ਪੀ. ਟੀ. ਆਈ.)-ਸਥਾਨਕ ਪੁਲਿਸ ਅਧਿਕਾਰੀਆਂ ਨੇ ਦੱਸਿਆ ਕਿ ਇਥੇ 9ਵੀਂ ਜਮਾਤ ਦੀ ਇਕ ਵਿਦਿਆਰਥਣ ਨਾਲ ਉਸ ਦੇ ਘਰ ਅੰਦਰ ਚਾਰ ਨਾਬਾਲਗ ਮੁੰਡਿਆਂ ਨੇ ਜਬਰ ਜਨਾਹ ਕੀਤਾ | ਇਨ੍ਹਾਂ 'ਚੋਂ ਤਿੰਨ ਲੜਕੇ ਪੀੜਤ ਵਿਦਿਆਰਥਣ ਦੇ ਸਕੂਲ ਦੇ ਹੀ ਹਨ, ਜਿਨ੍ਹਾਂ ਨੂੰ ਉਹ ਜਾਣਦੀ ਹੈ | ਸ਼ਹਿਰ ਦੀ ਇਕ ਹਾਊਸਿੰਗ ਸੁਸਾਇਟੀ 'ਚ ਐਤਵਾਰ ਸਵੇਰੇ ਜਦੋਂ ਇਹ ਘਟਨਾ ਹੋਈ ਤਾਂ ਉਸ ਸਮੇਂ ਲੜਕੀ ਘਰ 'ਚ ਇਕੱਲੀ ਹੀ ਸੀ | ਪੁਲਿਸ ਨੇ ਦੱਸਿਆ ਕਿ ਉਸ ਦੀ ਮਾਂ ਬਾਜ਼ਾਰ ਗਈ ਹੋਈ ਸੀ | ਇਕ ਅਧਿਕਾਰੀ ਨੇ ਦੱਸਿਆ ਕਿ ਨਾਬਾਲਗ ਲੜਕੀ ਇੰਸਟਾਗ੍ਰਾਮ 'ਤੇ ਇਕ ਲੜਕੇ ਦੇ ਸੰਪਰਕ 'ਚ ਸੀ ਜੋ ਉਸ ਨੂੰ ਮਿਲਣ ਲਈ ਮੈਸੇਜ਼ ਕਰ ਰਿਹਾ ਸੀ | ਐਤਵਾਰ ਸਵੇਰੇ ਉਕਤ ਲੜਕਾ ਘਰ ਪਹੁੰਚਿਆ | ਜਦੋਂ ਲੜਕੀ ਨੇ ਦਰਵਾਜਾ ਖੋਲਿ੍ਹਆ ਤਾਂ ਉਹ ਤਿੰਨ ਹੋਰਾਂ ਲੜਕਿਆਂ ਦੇ ਨਾਲ ਜ਼ਬਰੀ ਘਰ ਦੇ ਅੰਦਰ ਆ ਗਏ ਅਤੇ ਵਾਰੀ-ਵਾਰੀ ਉਸ ਲੜਕੀ ਨਾਲ ਜਬਰ ਜਨਾਹ ਕੀਤਾ | ਇਸ ਦੌਰਾਨ ਪੀੜਤ ਲੜਕੀ ਦੀ ਮਾਂ ਬਾਜ਼ਾਰ ਤੋਂ ਘਰ ਵਾਪਸ ਆਈ ਤਾਂ ਉਸ ਨੇ ਘਰ ਦਾ ਦਰਵਾਜ਼ਾ ਥੋੜ੍ਹਾ ਖੁੱਲ੍ਹਾ ਦੇਖਿਆ ਤਾਂ ਉਸ ਨੇ ਅੰਦਰ ਜਾ ਕੇ ਤੁਰੰਤ ਬੇਟੀ ਨੂੰ ਉਨ੍ਹਾਂ ਤੋਂ ਛੁਡਾ ਕੇ ਕਮਰੇ 'ਚੋਂ ਬਾਹਰ ਕੱਢਿਆ ਅਤੇ ਪੁਲਿਸ ਨੂੰ ਬੁਲਾਉਣ ਤੋਂ ਪਹਿਲਾਂ ਲੜਕਿਆਂ ਨੂੰ ਘਰ ਦੇ ਅੰਦਰ ਬੰਦ ਕਰ ਦਿੱਤਾ | ਜਦੋਂ ਪੁਲਿਸ ਉਕਤ ਫਲੈਟ ਪਹੁੰਚਣ ਹੀ ਵਾਲੀ ਸੀ ਤਾਂ ਕੁਝ ਸੁਸਾਇਟੀ ਦੇ ਅਹੁਦੇਦਾਰ ਘਰ ਪਹੁੰਚ ਗਏ ਤੇ ਮੁੰਡਿਆਂ ਨੂੰ ਛੱਡ ਦਿੱਤਾ | ਲੜਕੀ ਨੂੰ ਡਾਕਟਰੀ ਜਾਂਚ ਲਈ ਭੇਜਿਆ ਗਿਆ | ਲੜਕੀ ਦੇ ਬਿਆਨ ਅਜੇ ਦਰਜ ਨਹੀਂ ਕੀਤੇ ਗਏ ਅਤੇ ਦੋਸ਼ੀਆਂ ਨੂੰ ਗਿ੍ਫ਼ਤਾਰ ਨਹੀਂ ਕੀਤਾ ਗਿਆ | ਪੁਲਿਸ ਮਾਮਲੇ ਦੀ ਜਾਂਚ ਕਰ ਰਹੀ ਹੈ |

ਮੌਨਸੂਨ ਇਜਲਾਸ ਵਿਚ ਸਰਕਾਰ ਪੇਸ਼ ਕਰੇਗੀ 8 ਬਿੱਲ

Thu, 17 Jul 2025 00:00:00 +0000

ਮੌਨਸੂਨ ਇਜਲਾਸ ਵਿਚ ਸਰਕਾਰ ਪੇਸ਼ ਕਰੇਗੀ 8 ਬਿੱਲ

ਨਵੀਂ ਦਿੱਲੀ, 16 ਜੁਲਾਈ (ਉਪਮਾ ਡਾਗਾ ਪਾਰਥ)-ਕੇਂਦਰ ਸਰਕਾਰ 21 ਜੁਲਾਈ ਤੋਂ ਸ਼ੁਰੂ ਹੋ ਰਹੇ ਸੰਸਦ ਦੇ ਮੌਨਸੂਨ ਇਜਲਾਸ \'ਚ 8 ਨਵੇਂ ਬਿੱਲ ਲਿਆਏਗੀ | ਇਸ ਤੋਂ ਇਲਾਵਾ ਆਮਦਨ ਕਰ ਬਿੱਲ ਵੀ ਇਸੇ ਇਜਲਾਸ \'ਚ ਪਾਸ ਕਰਵਾਉਣ ਦੀ ਸਰਕਾਰ ਦੀ ਕੋਸ਼ਿਸ਼ ਹੋਵੇਗੀ | ਮਣੀਪੁਰ \'ਚ ਰਾਸ਼ਟਰਪਤੀ ਸ਼ਾਸਨ ਵਧਾਏ ਜਾਣ ਦੇ ਪ੍ਰਸਤਾਵ ਨੂੰ ਵੀ ਇਸੇ ਇਜਲਾਸ \'ਚ ਮਨਜ਼ੂਰੀ ਦਿੱਤੀ ਜਾਵੇਗੀ, ਜਿਸ ਤੋਂ ਸਪੱਸ਼ਟ ਹੈ ਕਿ ਸਰਕਾਰ ਦੀ ਫਿਲਹਾਲ ਇਸ ਸੂਬੇ ਚੋਂ ਰਾਸ਼ਟਰਪਤੀ ਸ਼ਾਸਨ ਹਟਾਉਣ ਦੀ ਕੋਈ ਮਨਸ਼ਾ ਰਹੀ ਹੈ | ਮਣੀਪੁਰ \'ਚ 13 ਫਰਵਰੀ ਨੂੰ ਰਾਸ਼ਟਰਪਤੀ ਸ਼ਾਸਨ ਲਾਗੂ ਕੀਤਾ ਗਿਆ ਸੀ | ਰਾਸ਼ਟਰਪਤੀ ਸ਼ਾਸਨ ਲਈ ਸਰਕਾਰ ਨੂੰ ਹਰ 6 ਮਹੀਨੇ \'ਚ ਸੰਸਦ ਦੀ ਮਨਜ਼ੂਰੀ ਲੈਣੀ ਹੁੰਦੀ ਹੈ | ਫਿਲਹਾਲ ਸੂਬੇ \'ਚ 13 ਅਗਸਤ ਤੱਕ ਰਾਸ਼ਟਰਪਤੀ ਸ਼ਾਸਨ ਦੀ ਸਮਾਂ ਹੱਦ ਹੈ | ਸੰਸਦ ਦੇ ਆਉਣ ਵਾਲੇ ਇਜਲਾਸ \'ਚ ਸਰਕਾਰ ਮਣੀਪੁਰ ਵਸਤੂ ਅਤੇ ਸੇਵਾ ਕਰ (ਸੋਧ) ਬਿੱਲ 2025, ਜਨ ਵਿਸ਼ਵਾਸ (ਸੋਧ) ਬਿੱਲ 2025, ਭਾਰਤੀ ਸੰਸਥਾਨ ਪ੍ਰਬੰਧਨ (ਸੋਧ) ਬਿੱਲ 2025, ਭੂ ਵਿਰਾਸਤ ਸਥਲ ਅਤੇ ਭੂ ਅਵਸ਼ੇਸ਼ (ਰਾਖੀ ਅਤੇ ਰੱਖਰਖਾਵ) ਬਿੱਲ 2025, ਖਾਣ ਅਤੇ ਖਣਨ (ਵਿਕਾਸ ਤੇ ਵਪਾਰ) ਸੋਧ ਬਿੱਲ 2025, ਰਾਸ਼ਟਰੀ ਖੇਡ ਪ੍ਰਸ਼ਾਸਨ ਬਿੱਲ 2025 ਅਤੇ ਰਾਸ਼ਟਰੀ ਡੋਪਿੰਗ ਕੰਟਰੋਲ (ਸੋਧ) ਬਿੱਲ 2025 ਨੂੰ ਲੋਕ ਸਭਾ \'ਚ ਪੇਸ਼ ਕਰੇਗੀ ਅਤੇ ਪਾਸ ਕਰਵਾਉਣ ਦੀ ਕੋਸ਼ਿਸ਼ ਕਰੇਗੀ | ਨਾਲ ਹੀ ਗੋਆ ਰਾਜ ਦੇ ਵਿਧਾਨ ਸਭਾ ਖੇਤਰਾਂ \'ਚ ਪੱਟੀ ਦਰਜ ਜਾਤਾਂ ਦੀ ਨੁਮਾਇੰਦਗੀ ਦੀ ਪੁਨਰਗਠਨ ਬਿੱਲ 2024, ਮਰਚੈਂਟ ਸ਼ਿਪਿੰਗ ਬਿੱਲ 2024, ਭਾਰਤੀ ਬੰਦਰਗਾਹ ਬਿੱਲ 2025 ਅਤੇ ਆਮਦਨ ਟੈਕਸ ਬਿੱਲ 2025 ਨੂੰ ਵੀ ਲੋਕ ਸਭਾ \'ਚ ਪਾਸ ਕੀਤੇ ਜਾਣ ਦੀ ਉਮੀਦ ਹੈ | ਇਜਲਾਸ ਦੌਰਾਨ ਜਿਥੇ ਸਰਕਾਰ ਦੀ ਵੱਧ ਤੋਂ ਵੱਧ ਵਿਧਾਨਿਕ ਕੰਮ ਨਿਪਟਾਉਣ ਦੀ ਯੋਜਨਾ ਹੈ, ਉਥੇ ਵਿਰੋਧੀ ਧਿਰਾਂ ਵਲੋਂ ਸਰਕਾਰ ਦੀ ਕਈ ਮੁੱਦਿਆਂ \'ਤੇ ਘੇਰਾਬੰਦੀ ਦੀ ਯੋਜਨਾ ਹੈ ਜਿਸ \'ਚ ਬਿਹਾਰ \'ਚ ਚਲਾਈ ਜਾ ਰਹੀ ਵੋਟਰ ਸੂਚੀ ਦੀ ਵਿਸ਼ੇਸ਼ ਵਿਆਪਕ ਮੁੜ ਨਿਰੀਖਣ ਮੁਹਿੰਮ ਸ਼ਾਮਿਲ ਹੈ |

ਗੁਫ਼ਾ 'ਚੋਂ ਮਿਲੀ ਰੂਸੀ ਨਾਗਰਿਕ ਨੀਨਾ ਨੂੰ ਬੱਚਿਆਂ ਸਮੇਤ ਹਿਰਾਸਤ ਕੇਂਦਰ 'ਚ ਭੇਜਿਆ

Thu, 17 Jul 2025 00:00:00 +0000

ਗੁਫ਼ਾ 'ਚੋਂ ਮਿਲੀ ਰੂਸੀ ਨਾਗਰਿਕ ਨੀਨਾ ਨੂੰ ਬੱਚਿਆਂ ਸਮੇਤ ਹਿਰਾਸਤ ਕੇਂਦਰ 'ਚ ਭੇਜਿਆ

ਤੁਮਾਕੁਰੂ (ਕਰਨਾਟਕਾ), 16 ਜੁਲਾਈ (ਯੂ. ਐਨ. ਆਈ.)-ਬੀਤੇ ਦਿਨੀਂ ਉੱਤਰ ਕੰਨੜ ਜ਼ਿਲ੍ਹੇ ਦੇ ਕੁਮਤਾ ਤਾਲੁਕਾ 'ਚ ਰਾਮਤੀਰਥ ਪਹਾੜੀਆਂ ਦੀ ਗੁਫ਼ਾ ਤੋਂ ਇਕ ਰੂਸੀ ਔਰਤ ਅਤੇ ਉਸ ਦੇ ਦੋ ਛੋਟੇ ਬੱਚਿਆਂ ਨੂੰ ਬਚਾਇਆ ਗਿਆ ਸੀ | ਰੂਸੀ ਔਰਤ ਦੀ ਪਹਿਚਾਣ 40 ਸਾਲ ਦੀ ਨੀਨਾ ਕੁਟੀਨਾ ਉਰਫ਼ ਮੋਹੀ ਦੇ ਰੂਪ 'ਚ ਹੋਈ | ਇਹ ਔਰਤ ਬਿਜ਼ਨਸ ਵੀਜ਼ਾ 'ਤੇ ਭਾਰਤ ਆਈ ਸੀ | ਹਿੰਦੂ ਧਰਮ ਅਤੇ ਭਾਰਤੀ ਅਧਿਆਤਮਕ ਪ੍ਰੰਪਰਾਵਾਂ ਤੋਂ ਕਾਫ਼ੀ ਪ੍ਰਭਾਵਿਤ ਹੋ ਕੇ ਗੋਆ ਤੋਂ ਹੁੰਦੇ ਹੋਏ ਗੋਕਰਣ ਪਹੁੰਚੀ | ਇਸ ਦੌਰਾਨ ਰੂਸੀ ਨਾਗਰਿਕ ਨੀਨਾ ਕੁਟੀਨਾ, ਉਸ ਦੇ ਦੋ ਨਾਬਾਲਗ ਬੱਚਿਆਂ ਪ੍ਰੇਮਾ ਅਤੇ ਅਮਾ ਦੇ ਨਾਲ, ਨੂੰ ਤੱਟਵਰਤੀ ਸ਼ਹਿਰ ਗੋਕਰਨ ਵਿਚ ਰਾਮਤੀਰਥ ਪਹਾੜੀ 'ਤੇ ਇਕ ਗੁਫਾ 'ਚ ਰਹਿੰਦੇ ਪਾਏ ਜਾਣ ਤੋਂ ਬਾਅਦ, ਤੁਮਾਕੁਰੂ ਦੇ ਡਿੱਬੂਰ ਵਿਚ ਸਥਿਤ ਵਿਦੇਸ਼ੀ ਹਿਰਾਸਤ ਕੇਂਦਰ (ਐਫ.ਡੀ.ਸੀ.) ਵਿਚ ਤਬਦੀਲ ਕਰ ਦਿੱਤਾ ਗਿਆ ਹੈ | ਦੱਸਿਆ ਜਾ ਰਿਹਾ ਹੈ ਕਿ ਇਹ ਪਰਿਵਾਰ ਕਈ ਹਫ਼ਤਿਆਂ ਤੋਂ ਇਕ ਅਧਿਆਤਮਕ ਆਗੂ ਦੀ ਅਗਵਾਈ ਹੇਠ ਗੁਫਾ ਵਿਚ ਰਹਿ ਰਿਹਾ ਸੀ | ਉਨ੍ਹਾਂ ਦੀ ਮੌਜੂਦਗੀ ਨੇ ਸਥਾਨਕ ਨਿਵਾਸੀਆਂ ਅਤੇ ਅਧਿਕਾਰੀਆਂ ਦਾ ਧਿਆਨ ਆਪਣੇ ਵੱਲ ਖਿੱਚਿਆ, ਜਿਸ ਦੇ ਨਤੀਜੇ ਵਜੋਂ ਇਮੀਗ੍ਰੇਸ਼ਨ ਅਧਿਕਾਰੀਆਂ ਨੂੰ ਦਖਲ ਦੇਣਾ ਪਿਆ | ਅਧਿਕਾਰੀਆਂ ਵਲੋਂ ਤਸਦੀਕ ਤੋਂ ਬਾਅਦ, ਇਹ ਪਾਇਆ ਗਿਆ ਕਿ ਪਰਿਵਾਰ ਆਪਣੇ ਵੀਜ਼ੇ ਦੀ ਮਿਆਦ ਤੋਂ ਵੱਧ ਸਮੇਂ ਲਈ ਠਹਿਰਿਆ ਸੀ, ਜਿਸ ਕਾਰਨ ਉਨ੍ਹਾਂ ਨੂੰ ਹਿਰਾਸਤ ਵਿਚ ਲਿਆ ਗਿਆ | ਵਿਦੇਸ਼ੀ ਖੇਤਰੀ ਰਜਿਸਟ੍ਰੇਸ਼ਨ ਦਫ਼ਤਰ (ਐਫ. ਆਰ. ਆਰ. ਓ.) ਦੇ ਅਧਿਕਾਰੀਆਂ ਨੇ ਉਨ੍ਹਾਂ ਦੇ ਠਹਿਰਨ ਦੇ ਹਾਲਾਤ ਅਤੇ ਇਮੀਗ੍ਰੇਸ਼ਨ ਨਿਯਮਾਂ ਦੀ ਸੰਭਾਵਿਤ ਉਲੰਘਣਾ ਦੀ ਜਾਂਚ ਸ਼ੁਰੂ ਕਰ ਦਿੱਤੀ ਹੈ |

ਕੱਲ੍ਹ ਦੇ ਹਥਿਆਰਾਂ ਨਾਲ ਅੱਜ ਦੀ ਜੰਗ ਨਹੀਂ ਜਿੱਤੀ ਜਾ ਸਕਦੀ-ਅਨਿਲ ਚੌਹਾਨ

Thu, 17 Jul 2025 00:00:00 +0000

ਕੱਲ੍ਹ ਦੇ ਹਥਿਆਰਾਂ ਨਾਲ ਅੱਜ ਦੀ ਜੰਗ ਨਹੀਂ ਜਿੱਤੀ ਜਾ ਸਕਦੀ-ਅਨਿਲ ਚੌਹਾਨ

ਡਰੋਨ ਅਤੇ ਨਵੀਂ ਤਕਨਾਲੋਜੀ ਜੰਗ ਦੇ ਮੈਦਾਨ \'ਚ ਸਭ ਤੋਂ ਅਹਿਮ ਹਥਿਆਰ ਬਣੇ
ਨਵੀਂ ਦਿੱਲੀ, 16 ਜੁਲਾਈ (ਉਪਮਾ ਡਾਗਾ ਪਾਰਥ)-\'ਅਸੀਂ ਕੱਲ੍ਹ (ਅਤੀਤ) ਦੇ ਹਥਿਆਰਾਂ ਨਾਲ ਅੱਜ ਦੀ ਲੜਾਈ ਨਹੀਂ ਜਿੱਤ ਸਕਦੇ | ਵਿਦੇਸ਼ਾਂ ਤੋਂ ਲਿਆਂਦੀ ਗਈ ਤਕਨਾਲੋਜੀ \'ਤੇ ਨਿਰਭਰਤਾ ਸਾਡੀਆਂ ਜੰਗੀ ਤਿਆਰੀਆਂ ਕਮਜ਼ੋਰ ਕਰਦੀ ਹੈ |\' ਉਕਤ ਬਿਆਨ ਚੀਫ਼ ਆਫ ਡਿਫੈਂਸ ਸਟਾਫ (ਪੀ. ਡੀ. ਐਸ.) ਜਨਰਲ ਅਨਿਲ ਚੌਹਾਨ ਨੇ ਦਿੱਲੀ ਦੇ ਮਾਨੇਕਸ਼ਾਹ ਸੈਂਟਰ \'ਚ ਇਕ ਪ੍ਰੋਗਰਾਮ \'ਚ ਦਿੱਤਾ, ਜਿਥੇ ਉਨ੍ਹਾਂ ਅਨਮੈਨਡ ਏਰੀਅਲ ਵਹੀਕਲ (ਯੂ.ਏ.ਵੀ.) ਅਤੇ ਕਾਊਾਟਰ-ਅਨਮੈਨਡ ਏਰੀਅਲ ਸਿਸਟਮ (ਸੀ-ਯੂ.ਏ.ਐਸ.) ਦੀ ਪ੍ਰਦਰਸ਼ਨੀ ਦਾ ਉਦਘਾਟਨ ਕੀਤਾ | ਸੀ.ਡੀ.ਐਸ. ਨੇ ਕਿਹਾ ਕਿ ਡਰੋਨ ਅਤੇ ਨਵੀਂ ਤਕਨਾਲੋਜੀ ਹੁਣ ਜੰਗ ਦੇ ਮੈਦਾਨ \'ਚ ਸਭ ਤੋਂ ਅਹਿਮ ਹਥਿਆਰ ਬਣ ਚੁੱਕੇ ਹਨ | ਉਨ੍ਹਾਂ ਡਰੋਨ ਨੂੰ ਵਿਕਾਸਵਾਦੀ ਦੱਸਦਿਆਂ ਕਿਹਾ ਕਿ ਜੰਗ \'ਚ ਇਸ ਦਾ ਇਸਤੇਮਾਲ ਬਹੁਤ ਕ੍ਰਾਂਤੀਕਾਰੀ ਰਿਹਾ ਹੈ | ਜਿਵੇਂ-ਜਿਵੇਂ ਉਸ ਦੀ ਤਾਇਨਾਤੀ ਅਤੇ ਘੇਰਾ ਵਧਿਆ, ਫ਼ੌਜ ਨੇ ਕ੍ਰਾਂਤੀਕਾਰੀ ਤਰੀਕੇ ਨਾਲ ਡਰੋਨ ਦਾ ਇਸਤੇਮਾਲ ਕੀਤਾ | ਉਨ੍ਹਾਂ ਕਿਹਾ ਕਿ ਹਾਲੀਆ ਜੰਗਾਂ ਨੇ ਸਿਖਾਇਆ ਹੈ ਕਿ ਡਰੋਨ ਕਿਵੇਂ ਰਣਨੀਤਕ ਸੰਤੁਲਨ ਨੂੰ ਬਦਲ ਸਕਦੇ ਹਨ | ਡਰੋਨ ਅਤੇ ਕਾਊਾਟਰ ਡਰੋਨ ਸਿਸਟਮ \'ਚ ਆਤਮਨਿਭਰਤਾ ਰਣਨੀਤਕ ਤੌਰ \'ਤੇ ਭਾਰਤ ਲਈ ਜ਼ਰੂਰੀ ਹੈ |

ਇੰਡੀਗੋ ਜਹਾਜ਼ ਨੂੰ ਮੁੰਬਈ ਹਵਾਈ ਅੱਡੇ 'ਤੇ ਹੰਗਾਮੀ ਹਾਲਤ 'ਚ ਉਤਾਰਿਆ

Thu, 17 Jul 2025 00:00:00 +0000

ਇੰਡੀਗੋ ਜਹਾਜ਼ ਨੂੰ ਮੁੰਬਈ ਹਵਾਈ ਅੱਡੇ 'ਤੇ ਹੰਗਾਮੀ ਹਾਲਤ 'ਚ ਉਤਾਰਿਆ

ਮੁੰਬਈ, 16 ਜੁਲਾਈ (ਪੀ. ਟੀ. ਆਈ.)-ਦਿੱਲੀ ਤੋਂ ਗੋਆ ਜਾਣ ਵਾਲੀ ਇੰਡੀਗੋ ਉਡਾਣ ਨੂੰ ਇਥੇ ਹੰਗਾਮੀ ਹਾਲਤ 'ਚ ਉਤਾਰਨਾ ਪਿਆ, ਕਿਉਂਕਿ ਇਸ ਨੂੰ ਹਵਾ 'ਚ ਇੰਜਣ ਫੇਲ੍ਹ ਹੋਣ ਕਾਰਨ ਸ਼ਹਿਰ ਵੱਲ ਮੋੜਿਆ ਗਿਆ ਸੀ | ਸੂਤਰ ਨੇ ਕਿਹਾ ਕਿ ਏਅਰਬੱਸ ਏ320ਨਿਓ ਵਲੋਂ ਸੰਚਾਲਿਤ ਇਸ ਉਡਾਣ ਨੂੰ ਰਾਤ 9.52 ਵਜੇ 'ਐਮਰਜੈਂਸੀ ਲੈਂਡਿੰਗ' ਕਰਨੀ ਪਈ | ਦਿੱਲੀ-ਗੋਆ ਰੂਟ 'ਤੇ ਸੰਚਾਲਿਤ ਇੰਡੀਗੋ ਦੀ ਉਡਾਣ 6ਈ-6271 ਦੇ ਇਕ ਇੰਜਣ 'ਚ ਖ਼ਰਾਬੀ ਕਾਰਨ ਉਸ ਨੂੰ ਮੁੰਬਈ ਵੱਲ ਮੋੜ ਦਿੱਤਾ ਗਿਆ ਸੀ, ਜਿਸ ਤੋਂ ਬਾਅਦ ਜਹਾਜ਼ ਲਈ ਪੂਰਨ ਐਮਰਜੈਂਸੀ ਐਲਾਨ ਦਿੱਤੀ ਗਈ | ਜਹਾਜ਼ 'ਚ ਸਵਾਰ ਲੋਕਾਂ ਦੀ ਗਿਣਤੀ ਤੁਰੰਤ ਪਤਾ ਨਹੀਂ ਲੱਗ ਸਕੀ |

ਬਾਹਰਲੇ ਮੁਲਕਾਂ ਦੀ ਤਕਨੀਕ 'ਤੇ ਨਹੀਂ ਰਹਿ ਸਕਦੇ ਨਿਰਭਰ

Thu, 17 Jul 2025 00:00:00 +0000

ਬਾਹਰਲੇ ਮੁਲਕਾਂ ਦੀ ਤਕਨੀਕ 'ਤੇ ਨਹੀਂ ਰਹਿ ਸਕਦੇ ਨਿਰਭਰ

ਸੀ.ਡੀ.ਐਸ. ਨੇ ਕਿਹਾ ਕਿ ਅਸੀਂ ਬਾਹਰਲੇ ਮੁਲਕਾਂ ਦੀ ਤਕਨਾਲੋਜੀ 'ਤੇ ਨਿਰਭਰ ਨਹੀਂ ਰਹਿ ਸਕਦੇ, ਕਿਉਂਕਿ ਇਹ ਸਾਡੇ ਜੰਗ ਅਤੇ ਰੱਖਿਆ ਆਪ੍ਰੇਸ਼ਨ ਲਈ ਅਹਿਮ ਹੈ | ਵਿਦੇਸ਼ੀ ਤਕਨੀਕਾਂ 'ਤੇ ਨਿਰਭਰਤਾ ਸਾਡੀਆਂ ਤਿਆਰੀਆਂ ਨੂੰ ਕਮਜ਼ੋਰ ਕਰਦੀ ਹੈ | ਉਤਪਾਦਨ ਵਧਾਉਣ ਦੀ ਸਾਡੀ ਸਮਰਥਾ ਨੂੰ ਘੱਟ ਕਰਦੀ ਹੈ | ਇਸ ਨਾਲ ਅਹਿਮ ਮਕੈਨੀਕਲ ਪੁਰਜਿਆਂ ਦੀ ਕਮੀ ਹੁੰਦੀ ਹੈ | ਜਨਰਲ ਚੌਹਾਨ ਨੇ ਆਪ੍ਰੇਸ਼ਨ ਸੰਧੂਰ ਦਾ ਜ਼ਿਕਰ ਕਰਦਿਆਂ ਕਿਹਾ ਕਿ 10 ਮਈ ਨੂੰ ਪਾਕਿਸਤਾਨ ਨੇ ਬਿਨਾਂ ਹਥਿਆਰ ਵਾਲੇ ਡਰੋਨ ਅਤੇ ਲੁਕਵੇਂ ਹਥਿਆਰਾਂ ਦੀ ਵਰਤੋਂ ਕੀਤੀ ਸੀ ਪਰ ਇਨ੍ਹਾਂ 'ਚੋਂ ਕੋਈ ਵੀ ਭਾਰਤੀ ਫੌਜ ਜਾਂ ਨਾਗਰਿਕ ਢਾਂਚੇ ਨੂੰ ਨੁਕਸਾਨ ਨਹੀਂ ਪਹੁੰਚਾ ਸਕਿਆ | ਭਾਰਤੀ ਫ਼ੌਜਾਂ ਨੇ ਇਨ੍ਹਾਂ ਡਰੋਨਾਂ ਨੂੰ ਕਾਈਨੈਟਿਕ ਅਤੇ ਗੈਰ-ਕਾਈਨੈਟਿਕ ਤਰੀਕਿਆਂ ਨਾਲ ਨਕਾਮ ਕਰ ਦਿੱਤਾ | ਇਹ ਭਾਰਤ ਦੀਆਂ ਰੱਖਿਆ ਤਿਆਰੀਆਂ ਦੀ ਮਜ਼ਬੂਤੀ ਦਾ ਸਬੂਤ ਹੈ |