ਰਾਸ਼ਟਰਪਤੀ ਦਰੋਪਦੀ ਮੁਰਮੂ ਦੀ ਇਹ ਫੇਰੀ ਬੋਤਸਵਾਨਾ ਲਈ ਵਿਸ਼ੇਸ਼ ਮਹੱਤਵ ਰੱਖਦੀ ਹੈ - ਰਾਸ਼ਟਰਪਤੀ ਡੂਮਾ ਬੋਕੋ

ਗੈਬਰੋਨ [ਬੋਤਸਵਾਨਾ], 12 ਨਵੰਬਰ (ਏਐਨਆਈ): ਬੋਤਸਵਾਨਾ ਦੇ ਰਾਸ਼ਟਰਪਤੀ ਡੂਮਾ ਗਿਡੀਅਨ ਬੋਕੋ ਨੇ ਗੈਬਰੋਨ ਵਿਚ ਰਾਸ਼ਟਰਪਤੀ ਦਰੋਪਦੀ ਮੁਰਮੂ ਦਾ ਸਵਾਗਤ ਕੀਤਾ, ਉਨ੍ਹਾਂ ਦੀ ਫੇਰੀ ਨੂੰ ਇਤਿਹਾਸਕ ਦੱਸਿਆ ਤੇ ਬੋਤਸਵਾਨਾ ਅਤੇ ਭਾਰਤ ਵਿਚਕਾਰ ਨੇੜਲੀ ਅਤੇ ਵਧਦੀ ਦੋਸਤੀ ਦਾ ਪ੍ਰਮਾਣ ਦੱਸਿਆ।
ਰਾਜਕੀ ਫੇਰੀ ਦੌਰਾਨ ਆਪਣੇ ਬਿਆਨ ਵਿਚ ਰਾਸ਼ਟਰਪਤੀ ਬੋਕੋ ਨੇ ਕਿਹਾ ਕਿ ਮੈਂ ਭਾਰਤ ਗਣਰਾਜ ਦੀ ਰਾਸ਼ਟਰਪਤੀ ਦਰੋਪਦੀ ਮੁਰਮੂ ਦਾ ਬੋਤਸਵਾਨਾ ਦੇ ਇਸ ਇਤਿਹਾਸਕ ਸਰਕਾਰੀ ਦੌਰੇ ਲਈ ਧੰਨਵਾਦ ਕਰਨਾ ਚਾਹੁੰਦਾ ਹਾਂ। ਇਹ ਫੇਰੀ ਇਤਿਹਾਸਕ ਹੈ ਕਿਉਂਕਿ ਕੂਟਨੀਤਕ ਸੰਬੰਧਾਂ ਦੀ ਸਥਾਪਨਾ ਤੋਂ ਬਾਅਦ ਸਾਡੇ ਲਗਭਗ 60 ਸਾਲਾਂ ਵਿਚ ਇਹ ਪਹਿਲੀ ਵਾਰ ਹੈ ਕਿ ਬੋਤਸਵਾਨਾ ਭਾਰਤ ਦੇ ਕਿਸੇ ਰਾਜ ਮੁਖੀ ਦੀ ਮੇਜ਼ਬਾਨੀ ਕਰ ਰਿਹਾ ਹੈ।

ਉਨ੍ਹਾਂ ਕਿਹਾ ਕਿ ਅਕਤੂਬਰ 2024 ਦੀਆਂ ਆਮ ਚੋਣਾਂ ਤੋਂ ਬਾਅਦ ਨਵੇਂ ਪ੍ਰਸ਼ਾਸਨ ਦੀ ਸ਼ੁਰੂਆਤ ਤੋਂ ਬਾਅਦ ਇਹ ਪਹਿਲੀ ਸਰਕਾਰੀ ਫੇਰੀ ਹੈ ਜਿਸ ਦੀ ਅਸੀਂ ਮੇਜ਼ਬਾਨੀ ਕਰ ਰਹੇ ਹਾਂ, ਜਿਸ ਨੇ ਸਰਕਾਰ ਵਿਚ ਅਜਿਹਾ ਬਦਲਾਅ ਲਿਆਂਦਾ ਜੋ ਸਾਡੇ ਦੇਸ਼ ਦੇ ਇਤਿਹਾਸ ਵਿਚ ਕਦੇ ਨਹੀਂ ਹੋਇਆ। ਬੋਤਸਵਾਨਾ ਦੀਆਂ ਲੋਕਤੰਤਰੀ ਕਦਰਾਂ-ਕੀਮਤਾਂ ਪ੍ਰਤੀ ਵਚਨਬੱਧਤਾ ਦੀ ਪੁਸ਼ਟੀ ਕਰਦੇ ਹੋਏ, ਰਾਸ਼ਟਰਪਤੀ ਬੋਕੋ ਨੇ ਕਿਹਾ ਕਿ ਬੋਤਸਵਾਨਾ ਇਕ ਲੋਕਤੰਤਰੀ ਦੇਸ਼ ਵਜੋਂ ਆਪਣੀ ਸਥਿਤੀ ਨੂੰ ਮਜ਼ਬੂਤ ​​ਕਰਨਾ ਜਾਰੀ ਰੱਖੇਗਾ ਅਤੇ ਅਜਿਹਾ ਕਰਨ ਲਈ ਅਸੀਂ ਭਾਰਤ ਤੋਂ ਪ੍ਰੇਰਨਾ ਲਵਾਂਗੇ ।