ਭਾਰਤ ਨੇ ਤਿੰਨ ਪਾਕਿਸਤਾਨੀ ਕੈਦੀ ਅਟਾਰੀ ਸਰਹੱਦ ਰਸਤੇ ਰਿਹਾਅ ਕੀਤੇ

ਅਟਾਰੀ ਸਰਹੱਦ, (ਅੰਮ੍ਰਿਤਸਰ), 29 ਨਵੰਬਰ (ਰਾਜਿੰਦਰ ਸਿੰਘ ਰੂਬੀ/ ਗੁਰਦੀਪ ਸਿੰਘ)- ਭਾਰਤ ਪਾਕਿਸਤਾਨ ਦੇਸ਼ਾਂ ਦਰਮਿਆਨ ਹੋਏ ਪੁਰਾਣੇ ਸਮਝੌਤਿਆਂ ਤਹਿਤ ਪਾਕਿਸਤਾਨ ਤੇ ਦਰਿਆ ਦਿਲੀ ਵਿਖਾਉਂਦਿਆਂ ਭਾਰਤ ਸਰਕਾਰ ਵਲੋਂ ਵੱਖ ਵੱਖ ਜੇਲ੍ਹਾਂ ਵਿਚ ਪਿਛਲੇ ਲੰਮੇ ਸਮੇਂ ਤੋਂ ਬੰਦ ਤਿੰਨ ਪਾਕਿਸਤਾਨੀ ਕੈਦੀਆਂ ਨੂੰ ਭਾਰਤ ਦੀਆਂ ਵੱਖ-ਵੱਖ ਜੇਲ੍ਹਾਂ ਵਿਚੋਂ ਬੀਤੀ ਦੇਰ ਰਾਤ ਰਿਹਾਅ ਕੀਤੇ ਗਏ ਹਨ। ਇਨ੍ਹਾਂ ਪਾਕਿ ਕੈਦੀਆਂ ਨੂੰ ਵੱਖ-ਵੱਖ ਰਾਜਾਂ ਦੀਆਂ ਪੁਲਿਸ ਪਾਰਟੀਆਂ ਲੈ ਕੇ ਸਰਹੱਦ ’ਤੇ ਆਈ.ਸੀ.ਪੀ. ਅਟਾਰੀ ਬਾਰਡਰ ਨਾਲ ਥਾਣਾ ਘਰਿੰਡਾ ਅੰਮ੍ਰਤਸਰ ਦਿਹਾਤੀ ਵਿਖੇ ਪੁੱਜੀਆਂ।

ਅਟਾਰੀ ਸਰਹੱਦ ’ਤੇ ਆਈ.ਸੀ.ਪੀ. ਵਿਖੇ ਇੰਮੀਗ੍ਰੇਸ਼ਨ ਅਤੇ ਕਸਟਮ ਕਰਵਾਉਣ ਉਪਰੰਤ ਇਨ੍ਹਾਂ ਤਿੰਨਾਂ ਕੈਦੀਆਂ ਨੂੰ ਜੇ.ਸੀ.ਪੀ. ਗੇਟ ਅਟਾਰੀ ਬਾਰਡਰ ਰਸਤੇ ਬੀ.ਐਸ.ਐਫ.168 ਬਟਾਲੀਆਨ ਦੇ ਸਹਾਇਕ ਕਮਾਂਡੈਟ ਸੁਨੀਲ ਕੁਮਾਰ ਨੇ ਪਾਕਿਸਤਾਨੀ ਰੇਂਜਰ ਰਹੀਮ ਦਾਦ ਸੁਪਰਡੈਂਟ ਰੇਂਜਰ ਦੇ ਹਵਾਲੇ ਕੀਤਾ। ਇਨ੍ਹਾਂ ਪਾਕਿ ਕੈਦੀਆਂ ਵਿਚ ਅਸਗਰ ਅਲੀ ਉਰਫ਼ ਵਿਜੇ ਸਾਗਰ ਪੁੱਤਰ ਮੁਹੰਮਦ ਸ਼ਫੀ ਉਰਫ ਰਮੇਸ਼ ਸਾਗਰ ਵਾਸੀ ਪਾਕਿਸਤਾਨ, (ਅਲਵਰ ਜੇਲ੍ਹ ਰਾਸਥਾਨ ਤੋ ਰਿਹਾਅ ਹੋ ਕੇ ਆਇਆ), ਮੁਹੰਮਦ ਇਦਰੀਸ ਉਰਫ਼ ਮੁਹੰਮਦ ਇਕਬਾਲ ਉਰਫ ਦੀਸ਼ਾ ਪੁੱਤਰ ਕਾਸਿਮ ਬਖਸ਼ ਉਰਫ਼ ਬਸ਼ੀਰ ਅਹਿਮਦ ਉਰਫ਼ ਮੁਹੰਮਦ ਅਸਲਾਮ ਵਾਸੀ ਜਾਰਪਾਲ, ਥਾਣਾ ਲਾਸੇਰ ਕਲਾਂ, ਜ਼ਿਲ੍ਹਾ ਨਾਰੋਵਾਲ, ਪਾਕਿਸਤਾਨ। (ਅਲਵਰ ਜੇਲ੍ਹ ਰਾਸਥਾਨ ਤੋ ਰਿਹਾਅ ਹੋ ਕੇ ਆਇਆ) ਤੇ ਤੀਸਰਾ ਕੈਦੀ ਰਮਜਾਨ ਉਰਫ਼ ਜੋਨੀ ਪੁੱਤਰ ਮੁਹੰਮਦ ਇਸਮਾਇਲ ਵਾਸੀ ਲੱਖੋ, ਜ਼ਿਲ੍ਹਾ ਲਾਹੋਰ, ਪਾਕਿਸਤਾਨ (ਨਾਰਲਾ ਕੈਂਪ ਦਿੱਲੀ ਤੋ ਰਿਹਾਅ ਹੋ ਕੇ ਆਇਆ) ਭਾਰਤ ਤੋਂ ਰਿਹਾਅ ਹੋ ਕੇ ਆਪਣੇ ਵਤਨ ਪਾਕਿਸਤਾਨ ਜਾਣ ਸਮੇਂ ਇਨਾ ਤਿੰਨਾਂ ਪਾਕਿਸਤਾਨੀ ਕੈਦੀਆਂ ਵਲੋਂ ਵਾਹਗਾ ਸਰਹੱਦ ’ਤੇ ਸਿਰ ਝੁਕਾ ਕੇ ਪਾਕਿਸਤਾਨ ਦੀ ਧਰਤੀ ਨੂੰ ਸਲਾਮ ਕੀਤਾ। ਇਨ੍ਹਾਂ ਪਾਕਿਸਤਾਨੀ ਕੈਦੀਆਂ ਦਾ ਪਾਕਿਸਤਾਨ ਰੇਂਜਰਾਂ ਵਲੋਂ ਗੁਲਾਬ ਦੇ ਫੁੱਲਾਂ ਦੇ ਹਾਰ ਪਾ ਕੇ ਨਿੱਘਾ ਸਵਾਗਤ ਕੀਤਾ ਗਿਆ ਹੈ, ਇਨ੍ਹਾਂ ਪਾਕਿਸਤਾਨੀ ਕੈਦੀਆਂ ਨੂੰ ਵਾਹਗਾ ਸਰਹੱਦ ਪਾਕਿਸਤਾਨ ਤੋਂ ਲੈਣ ਵਾਸਤੇ ਉਨ੍ਹਾਂ ਦੇ ਪਰਿਵਾਰਕ ਮੈਂਬਰ ਪਾਕਿ ਸਰਹੱਦ ਲੈਣ ਵਾਸਤੇ ਪੁੱਜੇ ਹੋਏ ਸਨ I