ਮੁੰਬਈ, 6 ਨਵੰਬਰ- ਤਿੰਨ ਦਹਾਕਿਆਂ ਤੱਕ ਆਪਣੇ ਵਧੀਆ ਪ੍ਰਦਰਸ਼ਨਾਂ ਨਾਲ ਕੰਨੜ ਫ਼ਿਲਮ ਇੰਡਸਟਰੀ ਵਿਚ ਆਪਣੀ ਸਾਖ ਸਥਾਪਿਤ ਕਰਨ ਵਾਲੇ ਅਦਾਕਾਰ ਹਰੀਸ਼ ਰਾਏ ਹੁਣ ਨਹੀਂ ਰਹੇ। 63 ਸਾਲਾ ਹਰੀਸ਼ ਲੰਬੇ ਸਮੇਂ ਤੋਂ ਗਲੇ ਦੇ ਕੈਂਸਰ ਨਾਲ ਜੂਝ ਰਹੇ ਸਨ। ਉਨ੍ਹਾਂ ਨੇ ਅੱਜ ਇਲਾਜ ਦੌਰਾਨ ਆਖ਼ਰੀ ਸਾਹ ਲਿਆ।
ਹਰੀਸ਼ ਰਾਏ ਦਾ ਫਿਲਮੀ ਕਰੀਅਰ ਕੰਨੜ ਸਿਨੇਮਾ ਦੇ ਸੁਨਹਿਰੀ ਯੁੱਗ ਦੌਰਾਨ ਸ਼ੁਰੂ ਹੋਇਆ ਸੀ। ਉਨ੍ਹਾਂ ਨੇ 1990 ਦੇ ਦਹਾਕੇ ਦੀ ਸੁਪਰਹਿੱਟ ਫਿਲਮ "ਓਮ" ਵਿਚ "ਡੌਨ ਰਾਏ" ਦੀ ਭੂਮਿਕਾ ਨਿਭਾਈ, ਜਿਸ ਨੇ ਉਨ੍ਹਾਂ ਨੂੰ ਘਰ-ਘਰ ਵਿਚ ਜਾਣਿਆ-ਪਛਾਣਿਆ ਨਾਮ ਦਿੱਤਾ। ਬਾਅਦ ਵਿਚ ਉਨ੍ਹਾਂ ਨੇ ਤਾਮਿਲ ਅਤੇ ਕੰਨੜ ਦੋਵਾਂ ਵਿਚ ਕਈ ਫਿਲਮਾਂ ਵਿਚ ਵੱਖ-ਵੱਖ ਭੂਮਿਕਾਵਾਂ ਨਾਲ ਆਪਣੀ ਪਛਾਣ ਸਥਾਪਿਤ ਕੀਤੀ।
ਭਾਵੇਂ ਖਲਨਾਇਕ ਦੀ ਭੂਮਿਕਾ ਨਿਭਾਉਣੀ ਹੋਵੇ ਜਾਂ ਪਿਤਾ ਅਤੇ ਪੁੱਤਰ ਵਿਚਕਾਰ ਭਾਵਨਾਤਮਕ ਦ੍ਰਿਸ਼ਾਂ ਨੂੰ ਦਰਸਾਉਣਾ, ਹਰੀਸ਼ ਨੇ ਹਮੇਸ਼ਾ ਆਪਣੀ ਮੌਜੂਦਗੀ ਨਾਲ ਦਰਸ਼ਕਾਂ ਨੂੰ ਪ੍ਰਭਾਵਿਤ ਕੀਤਾ।
ਲੰਬੇ ਸੰਘਰਸ਼ ਤੋਂ ਬਾਅਦ, ਹਰੀਸ਼ ਰਾਏ ਨੇ ਕੇ.ਜੀ.ਐਫ਼.ਚੈਪਟਰ 1 ਅਤੇ ਕੇ.ਜੀ.ਐਫ਼. ਚੈਪਟਰ 2 ਨਾਲ ਪ੍ਰਸਿੱਧੀ ਮੁੜ ਪ੍ਰਾਪਤ ਕੀਤੀ। ਨਿਰਦੇਸ਼ਕ ਪ੍ਰਸ਼ਾਂਤ ਨੀਲ ਅਤੇ ਅਭਿਨੇਤਾ ਯਸ਼ ਦੀ ਇਸ ਬਲਾਕਬਸਟਰ ਵਿਚ ਉਨ੍ਹਾਂ ਨੇ ‘ਚਾਚਾ’ ਦੀ ਭੂਮਿਕਾ ਨਿਭਾਈ।ਇਹ ਭੂਮਿਕਾ ਉਨ੍ਹਾਂ ਦੇ ਕਰੀਅਰ ਦੀ ਦੂਜੀ ਪਾਰੀ ਸਾਬਤ ਹੋਈ ਅਤੇ ਦਰਸ਼ਕਾਂ ਨੇ ਉਨ੍ਹਾਂ ਨੂੰ ਪੂਰੇ ਦਿਲ ਨਾਲ ਗਲੇ ਲਗਾਇਆ।
