ਭਾਰਤ ਭੁਵਨੇਸ਼ਵਰ ਵਿਚ ਵਿਸ਼ਵ ਇਨਡੋਰ ਐਥਲੈਟਿਕਸ ਚੈਂਪੀਅਨਸ਼ਿਪ 2028 ਦੀ ਮੇਜ਼ਬਾਨੀ ਕਰਨ ਲਈ ਤਿਆਰ

ਨਵੀਂ ਦਿੱਲੀ, 19 ਮਾਰਚ (ਏਐਨਆਈ): ਭਾਰਤ ਨੂੰ ਵਿਸ਼ਵ ਇਨਡੋਰ ਐਥਲੈਟਿਕਸ ਚੈਂਪੀਅਨਸ਼ਿਪ 2028 ਦੀ ਮੇਜ਼ਬਾਨੀ ਦੇ ਅਧਿਕਾਰ ਦਿੱਤੇ ਗਏ ਹਨ, ਜਿਸ ਵਿਚ ਭੁਵਨੇਸ਼ਵਰ ਦੁਨੀਆ ਭਰ ਦੇ ਐਥਲੀਟਾਂ ਦਾ ਸਵਾਗਤ ਕਰਨ ਲਈ ਤਿਆਰ ਹੈ। ਇਸ ਫ਼ੈਸਲੇ ਨੂੰ ਵਿਸ਼ਵ ਅਥਲੈਟਿਕਸ ਕੌਂਸਲ ਨੇ ਪੋਲੈਂਡ ਦੇ ਟੋਰਨ ਵਿਚ ਆਪਣੀ ਮੀਟਿੰਗ ਦੌਰਾਨ ਮਨਜ਼ੂਰੀ ਦੇ ਦਿੱਤੀ। ਐਥਲੈਟਿਕਸ ਫੈਡਰੇਸ਼ਨ ਆਫ ਇੰਡੀਆ (ਏ.ਐਫ.ਆਈ.) ਨੇ ਇਸ ਸਾਲ ਦੇ ਸ਼ੁਰੂ ਵਿਚ ਦੇਸ਼ ਦੀ ਬੋਲੀ ਜਮ੍ਹਾਂ ਕਰਵਾਈ ਸੀ, ਜਿਸ ਦਾ ਉਦੇਸ਼ ਪਹਿਲੀ ਵਾਰ ਭਾਰਤ ਵਿਚ ਵੱਕਾਰੀ ਦੋ-ਸਾਲਾ ਟਰੈਕ ਅਤੇ ਫੀਲਡ ਮੁਕਾਬਲਾ ਲਿਆਉਣਾ ਸੀ। ਵਰਲਡ ਅਥਲੈਟਿਕਸ ਦੀ ਇਕ 2 ਮੈਂਬਰੀ ਟੀਮ ਨੇ ਜਨਵਰੀ ਵਿਚ ਭੁਵਨੇਸ਼ਵਰ ਦੇ ਕਲਿੰਗਾ ਸਟੇਡੀਅਮ ਕੰਪਲੈਕਸ ਵਿਖੇ ਇਨਡੋਰ ਸਹੂਲਤ ਦਾ ਦੌਰਾ ਕੀਤਾ ਸੀ, ਜਿਸ ਨਾਲ ਭਾਰਤ ਨੂੰ ਚੈਂਪੀਅਨਸ਼ਿਪ ਦੇ 22ਵੇਂ ਐਡੀਸ਼ਨ ਦੀ ਮੇਜ਼ਬਾਨੀ ਲਈ ਅੰਤਿਮ ਪ੍ਰਵਾਨਗੀ ਮਿਲੀ ਸੀ। ਵਰਲਡ ਅਥਲੈਟਿਕਸ ਦੁਆਰਾ ਆਯੋਜਿਤ, ਵਰਲਡ ਇਨਡੋਰ ਐਥਲੈਟਿਕਸ ਚੈਂਪੀਅਨਸ਼ਿਪ ਪਹਿਲੀ ਵਾਰ 1985 ਵਿਚ ਪੈਰਿਸ, ਫਰਾਂਸ ਵਿਚ ਹੋਈ ਸੀ। ਭਾਰਤ ਜਾਪਾਨ, ਕਤਰ ਅਤੇ ਚੀਨ ਤੋਂ ਬਾਅਦ ਇਸ ਸਮਾਗਮ ਦੀ ਮੇਜ਼ਬਾਨੀ ਕਰਨ ਵਾਲਾ ਸਿਰਫ਼ ਚੌਥਾ ਏਸ਼ੀਆਈ ਦੇਸ਼ ਬਣ ਜਾਵੇਗਾ।