ਨਵੀਂ ਦਿੱਲੀ, 7 ਅਕਤੂਬਰ- ਪ੍ਰਧਾਨ ਮੰਤਰੀ ਮੋਦੀ ਨੇ ਜਨਤਕ ਸੇਵਾ ਵਿਚ ਆਪਣੇ 25 ਸਾਲ ਪੂਰੇ ਹੋਣ 'ਤੇ 'ਸੇਵਾ ਜੋਤੀ' ਪ੍ਰੋਗਰਾਮ ਨੂੰ ਸੰਬੋਧਨ ਕੀਤਾ। ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਜਦੋਂ ਮੈਂ 7 ਅਕਤੂਬਰ, 2001 ਨੂੰ ਗੁਜਰਾਤ ਦੇ ਮੁੱਖ ਮੰਤਰੀ ਵਜੋਂ ਸਹੁੰ ਚੁੱਕੀ ਸੀ, ਤਾਂ ਮੈਂ ਕਦੇ ਸੋਚਿਆ ਵੀ ਨਹੀਂ ਸੀ ਕਿ ਮੈਂ ਇਸ ਮੀਲ ਪੱਥਰ 'ਤੇ ਪਹੁੰਚਾਂਗਾ। ਅੱਜ ਮੈਂ 25 ਸਾਲਾਂ ਤੋਂ ਸਰਕਾਰ ਦੇ ਮੁਖੀ ਵਜੋਂ ਸੇਵਾ ਨਿਭਾਅ ਰਿਹਾਂ ਹਾਂ। ਇਹ ਲੋਕਾਂ ਦੇ ਨਿਰੰਤਰ ਆਸ਼ੀਰਵਾਦ ਦਾ ਨਤੀਜਾ ਹੈ। ਮੈਂ ਭਾਜਪਾ, ਐਨ.ਡੀ.ਏ. ਅਤੇ ਲੋਕਤੰਤਰ ਵਿਚ ਵਿਸ਼ਵਾਸ ਰੱਖਣ ਵਾਲਿਆਂ ਦਾ ਧੰਨਵਾਦ ਕਰਦਾ ਹਾਂ।
ਮੋਦੀ ਨੇ ਕਿਹਾ ਕਿ ਇਹ 25 ਸਾਲਾਂ ਦਾ ਜਨਤਕ ਵਿਸ਼ਵਾਸ, 25 ਸਾਲਾਂ ਦਾ ਤਜ਼ਰਬਾ, ਇਕ ਵੱਡੀ ਸੰਪਤੀ ਹੈ। ਇਹ ਪੂੰਜੀ ਦੇਸ਼ ਦੀ ਹੈ। ਭਾਰਤ ਮਾਤਾ ਦਾ ਹਰ ਬੱਚਾ ਇਸ ਪੂੰਜੀ ਦਾ ਹੱਕਦਾਰ ਹੈ। ਮੈਨੂੰ ਯਾਦ ਹੈ ਜਦੋਂ ਮੈਂ ਵਿਦਿਆਰਥੀ ਸੀ, ਤਾਂ ਅਧਿਆਪਕ ਵੱਖ-ਵੱਖ ਤਰੀਕਿਆਂ ਨਾਲ ਸਬਕ ਸਿਖਾਉਂਦਾ ਸੀ ਅਤੇ ਮੈਂ ਹਮੇਸ਼ਾ ਕਲਾਸ ਵਿਚ ਸਭ ਤੋਂ ਪਹਿਲਾਂ ਆਉਣ ਵਾਲਿਆਂ ਵਿਚੋਂ ਹੁੰਦਾ ਸੀ। ਸਿੱਖਣ ਦੀ ਉਹ ਉਤਸੁਕਤਾ ਮੇਰੀ ਜ਼ਿੰਦਗੀ ਦਾ ਹਿੱਸਾ ਬਣ ਗਈ ਅਤੇ ਮੈਂ ਅਜੇ ਵੀ ਆਪਣੇ ਆਪ ਨੂੰ ਇਕ ਵਿਦਿਆਰਥੀ ਸਮਝਦਾ ਹਾਂ।
ਮੋਦੀ ਨੇ ਅੱਗੇ ਕਿਹਾ ਕਿ ਮੈਂ ਪਰਮਾਤਮਾ ਅੱਗੇ ਪ੍ਰਾਰਥਨਾ ਕੀਤੀ ਕਿ ਮੇਰੀ ਸਿੱਖਿਆ ਕਦੇ ਘੱਟ ਨਾ ਹੋਵੇ। ਜਿੰਨਾ ਜ਼ਿਆਦਾ ਮੈਂ ਪਿੱਛੇ ਮੁੜ ਕੇ ਦੇਖਦਾ ਹਾਂ, ਉਨਾ ਹੀ ਜ਼ਿਆਦਾ ਮੈਂ ਸ਼ੁਕਰਗੁਜ਼ਾਰ ਮਹਿਸੂਸ ਕਰਦਾ ਹਾਂ। ਹਰ ਘਟਨਾ ਨੇ ਮੈਨੂੰ ਕੁਝ ਸਿਖਾਇਆ ਹੈ। ਇਸ ਨੇ ਮੈਨੂੰ ਨਿਮਰ ਹੋਣਾ ਸਿਖਾਇਆ। ਜਿਨ੍ਹਾਂ ਨੇ ਮੈਨੂੰ ਹੇਠਾਂ ਲਿਆਂਦਾ ਉਨ੍ਹਾਂ ਨੇ ਮੈਨੂੰ ਖੜ੍ਹੇ ਹੋਣਾ ਸਿਖਾਇਆ। ਜਿਨ੍ਹਾਂ ਨੇ ਮੇਰਾ ਵਿਰੋਧ ਕੀਤਾ ਉਨ੍ਹਾਂ ਨੇ ਮੈਨੂੰ ਲੋਕਤੰਤਰ ਦੀ ਸ਼ਕਤੀ ਸਿਖਾਈ। ਹਰ ਸੰਕਟ ਮੇਰੇ ਸਬਰ ਦੀ ਪ੍ਰੀਖਿਆ ਸੀ। ਹਰ ਪ੍ਰਾਪਤੀ ਨੇ ਮੈਨੂੰ ਵੱਡੇ ਟੀਚਿਆਂ ਵੱਲ ਅੱਗੇ ਵਧਣ ਦੀ ਤਾਕਤ ਦਿੱਤੀ।
ਪ੍ਰਧਾਨ ਮੰਤਰੀ ਮੋਦੀ ਨੇ ਕਿਹਾ ਕਿ ਚੰਦਰਯਾਨ ਨੇ ਮੈਨੂੰ ਅਸਫਲਤਾ ਤੋਂ ਉੱਠਣਾ ਸਿਖਾਇਆ। ਕੋਰੋਨਾ ਨੇ ਮੈਨੂੰ ਸਮੂਹਿਕ ਚੇਤਨਾ ਸਿਖਾਈ। ਮੀਡੀਆ ਨੇ ਮੈਨੂੰ ਕੌੜੇ ਅਤੇ ਮਿੱਠੇ ਦੋਵਾਂ ਤਜ਼ਰਬਿਆਂ ਵਿਚੋਂ ਅੱਗੇ ਵਧਣ ਲਈ ਪ੍ਰੇਰਿਤ ਕੀਤਾ। ਹਰ ਪਿੰਡ, ਹਰ ਗਰੀਬ ਵਿਅਕਤੀ ਨੇ ਮੈਨੂੰ ਸਿਖਾਇਆ ਕਿ ਭਾਵੇਂ ਸਰੋਤ ਸੀਮਤ ਹੋਣ, ਸੁਪਨੇ ਵੱਡੇ ਹੋਣੇ ਚਾਹੀਦੇ ਹਨ। ਹੌਸਲੇ ਬੁਲੰਦ ਹੋਣੇ ਚਾਹੀਦੇ ਹਨ।
ਉਨ੍ਹਾਂ ਕਿਹਾ ਕਿ ਇਕ ਅਜਿਹੇ ਦੇਸ਼ ਵਿਚ ਜਿਸ ਨੇ ਵੇਦਾਂ ਤੋਂ ਲੈ ਕੇ ਵਿਵੇਕਾਨੰਦ ਤੱਕ, ਮਹਾਨ ਵਿਚਾਰਾਂ ਦਾ ਖੁੱਲ੍ਹ ਕੇ ਜਸ਼ਨ ਮਨਾਇਆ ਹੈ, ਇਕ ਅਜਿਹਾ ਦੇਸ਼ ਜਿਸ ਕੋਲ ਹਜ਼ਾਰਾਂ ਸਾਲਾਂ ਦਾ ਤਜ਼ਰਬਾ ਹੈ, ਇਕ ਅਜਿਹਾ ਦੇਸ਼ ਜਿਸ ਨੇ ਮਨੁੱਖਤਾ ਨੂੰ ਮਨੁੱਖਤਾ ਦਾ ਭਰੋਸਾ ਦਿੱਤਾ ਹੈ, ਮੈਂ ਕਦੇ ਵੀ ਇਕੱਲਾ ਮਹਿਸੂਸ ਨਹੀਂ ਕੀਤਾ। ਅਸੀਂ ਸੇਵਕ ਹਾਂ, ਸੇਵਾ ਸਾਡਾ ਧਰਮ ਹੈ, ਗਰੀਬਾਂ ਅਤੇ ਲੋੜਵੰਦਾਂ ਦੀ ਸੇਵਾ ਕਰਨਾ ਸਾਡਾ ਧਰਮ ਹੈ।
