ਵਾਵਰੇ, 28 ਅਗਸਤ (ਏਜੰਸੀ)-ਐੱਫ.ਆਈ.ਐੱਚ. ਪੁਰਸ਼ ਹਾਕੀ ਵਿਸ਼ਵ ਕੱਪ ਦੇ 7ਵੇਂ-8ਵੇਂ ਸਥਾਨ ਲਈ ਖੇਡੇ ਗਏ ਮੁਕਾਬਲੇ ਵਿਚ ਭਾਰਤ ਨੂੰ ਬੈਲਜੀਅਮ ਤੋਂ ਪੈਨਲਟੀ ਸ਼ੂਟਆਊਟ ’ਚ ਹਾਰ ਮਿਲੀ। ਇਸ ਦੇ ਨਾਲ ਹੀ ਭਾਰਤੀ ਟੀਮ ਨੇ ਟੂਰਨਾਮੈਂਟ ਦਾ ਅੰਤ 8ਵੇਂ ਸਥਾਨ ’ਤੇ ਰਹਿ ਕੇ ਕੀਤਾ। ਵਾਵਰੇ ਦੇ ਬੈਲਫਿਅਸ ਹਾਕੀ ਐਰੀਨਾ ਵਿਚ ਹੋਏ ਮੁਕਾਬਲੇ ਦੀ ਭਾਰਤ ਨੇ ਧਮਾਕੇਦਾਰ ਸ਼ੁਰੂਆਤ ਕੀਤੀ। ਭਾਰਤ ਲਈ ਅਭਿਸ਼ੇਕ ਨੈਨ ਨੇ 2 ਤੇ ਕਪਤਾਨ ਹਰਮਨਪ੍ਰੀਤ ਸਿੰਘ ਨੇ ਇਕ ਗੋਲ ਕੀਤਾ। ਜਦਕਿ ਬੈਲਜੀਅਮ ਲਈ ਰੋਮਨ ਡੂਵੇਕੋਟ,ਹਿਊਗੋ ਲਾਬੂਸ਼ੇਰ ਤੇ ਨਿਕੋਲਸ ਡੀ ਕੇਰਪਲ ਨੇ ਗੋਲ ਕੀਤਾ। ਇਸ ਤਰ੍ਹਾਂ ਨਿਰਧਾਰਤ ਸਮੇਂ ਤੱਕ ਸਕੋਰ ਬਰਾਬਰ ਰਹਿਣ ਕਾਰਨ ਮੁਕਾਬਲੇ ਦਾ ਫੈਸਲਾ ਪੈਨਲਟੀ ਸ਼ੂਟਆਊਟ ’ਚ ਹੋਇਆ। ਇਸ ਤਰ੍ਹਾਂ ਬੈਲਜੀਅਮ ਨੇ ਪੈਨਲਟੀ ਸ਼ੂਟਆਊਟ ’ਚ ਜਿੱਤ ਦਰਜ ਕਰਕੇ ਵਿਸ਼ਵ ਕੱਪ ’ਚ 7ਵਾਂ ਸਥਾਨ ਹਾਸਲ ਕੀਤਾ, ਜਦਕਿ ਭਾਰਤ ਨੂੰ 8ਵੇਂ ਸਥਾਨ ਨਾਲ ਸੰਤੁਸ਼ਟ ਹੋਣਾ ਪਿਆ। ਨੀਦਰਲੈਂਡਜ਼ ਨੂੰ ਹਰਾ ਕੇ ਸਪੇਨ ਫਾਈਨਲ ’ਚ ਐਮਸਟਲਵੀਨ, 28 ਅਗਸਤ (ਏਜੰਸੀ)-ਐੱਫ.ਆਈ.ਐੱਚ. ਪੁਰਸ਼ ਹਾਕੀ ਵਿਸ਼ਵ ਕੱਪ ਦੇ ਸੈਮੀਫਾਈਨਲ ਵਿਚ ਸਪੇਨ ਨੇ ਵੱਡਾ ਉਲਟਫੇਰ ਕਰਦਿਆਂ ਮੇਜ਼ਬਾਨ ਤੇ ਮੌਜੂਦਾ ਓਲੰਪਿਕ ਚੈਂਪੀਅਨ ਨੀਦਰਲੈਂਡਜ਼ ਨੂੰ 4-3 ਨਾਲ ਹਰਾ ਕੇ ਫਾਈਨਲ ’ਚ ਜਗ੍ਹਾ ਬਣਾ ਲਈ ਹੈ। ਸਪੇਨ ਦੇ ਜੋਸੇ ਬਾਸਤੇਰਾ ਨੇ ਹੈਟ੍ਰਿਕ ਕੀਤੀ। ਇਸ ਜਿੱਤ ਨਾਲ ਸਪੇਨ 28 ਸਾਲ ਬਾਅਦ ਹਾਕੀ ਵਿਸ਼ਵ ਕੱਪ ਦੇ ਫਾਈਨਲ ਵਿਚ ਪਹੁੰਚਿਆ ਹੈ। ਆਖਰੀ ਵਾਰ ਸਪੇਨ ਨੇ 1998 ’ਚ ਵਿਸ਼ਵ ਕੱਪ ਫਾਈਨਲ ਖੇਡਿਆ ਸੀ। ਹੁਣ ਖ਼ਿਤਾਬੀ ਮੁਕਾਬਲੇ ਵਿਚ ਉਸ ਦਾ ਸਾਹਮਣਾ ਜਰਮਨੀ ਅਤੇ ਅਰਜਨਟੀਨਾ ਵਿਚਾਲੇ ਹੋਣ ਵਾਲੇ ਦੂਜੇ ਸੈਮੀਫਾਈਨਲ ਦੇ ਜੇਤੂ ਨਾਲ ਹੋਵੇਗਾ।
