ਬੰਗਾ, 16 ਅਕਤੂਬਰ (ਕਰਮ ਲਧਾਣਾ) -ਦੁਆਬੇ ਦੇ ਪ੍ਰਸਿੱਧ ਕਿਸਾਨ ਆਗੂ ਕਾਮਰੇਡ ਹਰਬੰਸ ਸਿੰਘ ਮੰਢਾਲੀ ਨੂੰ ਉਹਨਾਂ ਦੇ ਜੱਦੀ ਪਿੰਡ ਮੰਢਾਲੀ ਵਿਖੇ ਸੀ. ਪੀ. ਆਈ. ਐਮ ਵੱਲੋਂ ਸ਼ਰਧਾਂਜਲੀਆਂ ਭੇਟ ਕੀਤੀਆਂ | ਇਸ ਮੌਕੇ 'ਤੇ ਸੀ. ਪੀ. ਆਈ ਐੱਮ ਦੇ ਸੂਬਾ ਕਮੇਟੀ ਮੈਂਬਰ ਕਾ: ਰਾਮ ਸਿੰਘ ਨੂਰਪੁਰੀ ਨੇ ਉਹਨਾਂ ਦੀ ਯਾਦਗਾਰ 'ਤੇ ਲਾਲ ਝੰਡਾ ਲਾਇਆ ਅਤੇ ਕਿਹਾ ਕਿ ਕਾਮਰੇਡ ਹਰਬੰਸ ਮੰਢਾਲੀ ਨੇ ਸਾਰੀ ਜ਼ਿੰਦਗੀ ਕਿਸਾਨਾਂ, ਮਜ਼ਦੂਰਾਂ ਦੇ ਹੱਕਾਂ ਅਤੇ ਹਿੱਤਾਂ ਲਈ ਲਾ ਦਿੱਤੀ | ਉਹ ਦੇਸ਼ ਭਗਤ ਪਰਿਵਾਰ 'ਚੋਂ ਸਨ | ਉਹਨਾਂ ਦੇ ਵੱਡੇ ਭਰਾ ਹਜੂਰਾ ਸਿੰਘ ਨੇ 1940 'ਚ ਮਜ਼ਾਫਰਪੁਰ ਜੇਲ੍ਹ ਵਿੱਚ ਸ਼ਹੀਦੀ ਪ੍ਰਾਪਤ ਕੀਤੀ | ਉਨ੍ਹਾਂ ਦੇ ਪਿਤਾ ਸਰਦਾਰ ਨੱਥਾ ਸਿੰਘ ਨੇ ਅੰਗਰੇਜ਼ ਹਕੂਮਤ ਸਮੇਂ ਜੇਲ ਕੱਟੀ ਅਤੇ ਕੇਂਦਰ ਤੇ ਸਰਕਾਰ ਤੋਂ ਕੋਈ ਪੈਨਸ਼ਨ ਨਹੀਂ ਲਈ | ਕਾਮਰੇਡ ਮੰਢਾਲੀ ਦੁਆਬੇ ਦੇ ਸੀ. ਪੀ. ਆਈ. ਐਮ ਦੇ ਵੱਡੇ ਆਗੂ ਸਨ | ਪਾਰਟੀ ਨੂੰ ਮਜ਼ਬੂਤ ਕਰਨ ਲਈ ਦਿਨ ਰਾਤ ਇੱਕ ਕਰਕੇ ਕੰਮ ਕਰਦੇ ਹੋਏ 14 ਅਕਤੂਬਰ 1991 ਨੂੰ ਬਿਮਾਰੀ ਕਾਰਨ ਸਦਾ ਲਈ ਸਾਡੇ ਕੋਲੋਂ ਵਿਛੜ ਗਏ | ਉਹਨਾਂ ਦੀ ਯਾਦਗਾਰ ਬਣੀ ਹੋਈ ਹੈ ਅਤੇ ਬੰਗਾ ਪਾਰਟੀ ਦਫ਼ਤਰ ਵਿਖੇ ਮੀਟਿੰਗ, ਸੈਮੀਨਾਰ ਅਤੇ ਹੋਰ ਪਾਰਟੀ ਸਰਗਰਮੀਆਂ ਲਈ ਮੰਢਾਲੀ ਯਾਦਗਾਰ ਹਾਲ ਬਣਾਇਆ ਹੈ | ਕਾਮਰੇਡ ਮੰਢਾਲੀ ਨੂੰ ਸੱਚੀ ਸ਼ਰਧਾਂਜਲੀ ਇਹੀ ਹੋਵੇਗੀ ਕਿ ਉਹਨਾਂ ਦੇ ਕਾਜ ਨੂੰ ਪੂਰਾ ਕਰੀਏ | ਇਸ ਮੌਕੇ ਤੇ ਰਿਸ਼ੀ ਕੁਮਾਰ, ਰਵੀ, ਬਲਵੀਰ ਸਿੰਘ, ਤਰਲੋਚਨ ਸਿੰਘ, ਚੈਨ ਸਿੰਘ ਅਤੇ ਹੋਰ ਕਈ ਸਾਥੀ ਹਾਜ਼ਰ ਸਨ |