ਗੁਰਦਾਸਪੁਰ, 30 ਦਸੰਬਰ (ਅਸ਼ੋਕ ਸ਼ਰਮਾ)-ਪੰਜਾਬ ਸਰਕਾਰ ਵਲੋਂ ਗੁਰਦਾਸਪੁਰ ਵਿਖੇ ਮਨਾਏ ਸੂਬਾ ਪੱਧਰੀ ਕ੍ਰਿਸਮਸ ਸਮਾਗਮ ਵਿਚ ਮੁੱਖ ਮੰਤਰੀ ਭਗਵੰਤ ਮਾਨ ਦੇ ਨਾ ਪਹੁੰਚਣ ਨਾਲ ਇਸਾਈ ਭਾਈਚਾਰੇ ਦੇ ਲੋਕਾਂ ਨੰੂ ਭਾਰੀ ਠੇਸ ਪਹੁੰਚੀ ਹੈ | ਇਸ ਸਬੰਧੀ ਪ੍ਰਧਾਨ ਪੰਜਾਬ ਮਸੀਹ ਲੋਕ ਦਲ ਦੇ ਸੀਨੀਅਰ ਆਗੂ ਪ੍ਰਵੇਜ਼ ਤੁੰਗ ਨੇ ਕਿਹਾ ਕਿ ਮੁੱਖ ਮੰਤਰੀ ਮਾਨ ਨੇ ਚਾਰ ਸਾਲਾ ਵਿਚ ਕੋਈ ਵੀ ਵੱਡਾ ਦਿਨ ਨਹੀਂ ਮਨਾਇਆ ਅਤੇ ਹੁਣ ਆਗਾਮੀ ਵਿਧਾਨ ਸਭਾ ਚੋਣਾਂ ਨੰੂ ਮੁੱਖ ਰੱਖਦਿਆਂ ਗੁਰਦਾਸਪੁਰ ਜ਼ਿਲ੍ਹੇ ਅੰਦਰ ਵੱਡਾ ਦਿਨ ਮਨਾਉਣ ਦੀ ਚਾਲ ਖੇਡ ਕੇ ਮਸੀਹ ਭਾਈਚਾਰੇ ਨੰੂ ਗੁੰਮਰਾਹ ਕੀਤਾ ਹੈ | ਉਨ੍ਹਾਂ ਦੱਸਿਆ ਕਿ ਵੱਡਾ ਦਿਨ ਹਮੇਸ਼ਾ ਵੱਖ ਵੱਖ ਸਰਕਾਰਾਂ ਵਲੋਂ 25 ਦਸੰਬਰ ਤੋਂ ਪਹਿਲਾਂ ਮਨਾਇਆ ਜਾਂਦਾ ਹੈ ਅਤੇ 29 ਦਸੰਬਰ ਨੰੂ ਸਰਕਾਰ ਵਲੋਂ ਇਹ ਦਿਹਾੜਾ ਮਨਾ ਕੇ ਮਸੀਹ ਭਾਈਚਾਰੇ ਨਾਲ ਕੋਝਾ ਮਜ਼ਾਕ ਕੀਤਾ ਹੈ | ਉਨ੍ਹਾਂ ਦੱਸਿਆ ਕਿ ਗੁਰਦਾਸਪੁਰ ਜ਼ਿਲ੍ਹੇ ਅੰਦਰ ਮਸੀਹ ਭਾਈਚਾਰੇ ਦੀ ਸਭ ਤੋਂ ਵੱਡੀ ਗਿਣਤੀ ਹੈ ਅਤੇ ਸਮੁੱਚਾ ਮਸੀਹ ਭਾਈਚਾਰਾ 2027 ਦੀਆਂ ਚੋਣਾਂ ਵਿਚ ਸਰਕਾਰ ਨੰੂ ਸਬਕ ਸਿਖਾਉਣ ਲਈ ਪੱਬਾਂ ਭਾਰ ਹੋਵੇਗਾ | ਉਨ੍ਹਾਂ ਕਿਹਾ ਕਿ ਮਾਨ ਸਰਕਾਰ ਨੇ ਆਪਣੇ ਚਾਰ ਸਾਲਾ ਦੇ ਦੌਰਾਨ ਮਸੀਹ ਭਾਈਚਾਰੇ ਨੰੂ ਪਛਾੜਿਆ ਹੈ | ਜਿਸ ਕਰਕੇ ਮਸੀਹ ਭਾਈਚਾਰਾ ਕਾਫ਼ੀ ਖ਼ਫ਼ਾ ਹੈ | ਇਸ ਮੌਕੇ ਹੋਰ ਵੀ ਮਸੀਹ ਆਗੂ ਹਾਜ਼ਰ ਸਨ |
