ਅਬੋਹਰ, 20 ਜੂਨ (ਵਿਵੇਕ ਹੂੜੀਆ)-ਅਬੋਹਰ ਦੇ ਸੁਭਾਸ਼ ਨਗਰ ਵਿਚ ਸੀਵਰੇਜ ਮੇਨ ਹਾਲ ਬੰਦ ਹੋਣ ਕਾਰਨ ਇੱਥੇ ਦੀਆਂ ਗਲੀਆਂ ਬਿਨਾਂ ਮੀਂਹ ਦੇ ਵੀ ਦੂਸ਼ਿਤ ਪਾਣੀ ਨਾਲ ਭਰੀਆਂ ਹੋਈਆਂ ਹਨ | ਜਿਸ ਕਾਰਨ ਲੋਕਾਂ ਦਾ ਜੀਣਾ ਦੁੱਭਰ ਹੁੰਦਾ ਜਾ ਰਿਹਾ ਹੈ | ਇੱਥੋਂ ਦੇ ਵਸਨੀਕਾਂ ਨੇ ਦੱਸਿਆ ਕਿ ਸੀਵਰੇਜ ਲਾਈਨ ਬੰਦ ਹੋਣ ਕਾਰਨ ਦੂਸ਼ਿਤ ਪਾਣੀ ਨਾ ਸਿਰਫ਼ ਗਲੀਆਂ ਵਿਚ ਸਗੋਂ ਲੋਕਾਂ ਦੇ ਘਰਾਂ ਵਿਚ ਵੀ ਦਾਖਲ ਹੋਣਾ ਸ਼ੁਰੂ ਹੋ ਗਿਆ ਹੈ | ਇਸ ਦੀ ਭਿਆਨਕ ਬਦਬੂ ਕਾਰਨ ਲੋਕਾਂ ਨੂੰ ਸਾਹ ਲੈਣਾ ਅÏਖਾ ਹੋ ਰਿਹਾ ਹੈ | ਦੁਪਹਿਰ ਵੇਲੇ ਇਸ ਦੀ ਬਦਬੂ ਇੰਨੀ ਵੱਧ ਜਾਂਦੀ ਹੈ ਕਿ ਲੋਕ ਆਪਣੇ ਘਰਾਂ ਵਿਚ ਸ਼ਾਂਤੀ ਨਾਲ ਖਾਣਾ ਨਹੀਂ ਖਾ ਸਕਦੇ | ਇਸ ਤੋਂ ਇਲਾਵਾ ਗਲੀਆਂ ਵਿਚ ਫੈਲੇ ਦੂਸ਼ਿਤ ਪਾਣੀ ਕਾਰਨ ਮੱਛਰਾਂ ਦੀ ਪੈਦਾਇਸ਼ ਕਾਰਨ ਬਿਮਾਰੀਆਂ ਫੈਲਣ ਦਾ ਖ਼ਤਰਾ ਬਣਿਆ ਹੋਇਆ ਹੈ | ਜਦੋਂ ਕਿ ਸੀਵਰੇਜ ਵਿਭਾਗ ਇਸ ਵੱਲ ਕੋਈ ਧਿਆਨ ਨਹੀਂ ਦੇ ਰਿਹਾ ਹੈ | ਲੋਕਾਂ ਨੇ ਦੱਸਿਆ ਕਿ ਗਲੀਆਂ ਵਿਚ ਦੂਸ਼ਿਤ ਪਾਣੀ ਫੈਲਣ ਕਾਰਨ ਲੋਕ ਇਸ ਦੂਸ਼ਿਤ ਪਾਣੀ ਵਿਚੋਂ ਲੰਘਣ ਲਈ ਮਜਬੂਰ ਹਨ | ਜਦੋਂ ਕਿ ਗਲੀਆਂ ਵਿਚ ਪਾਣੀ ਫੈਲਣ ਕਾਰਨ ਸਬਜ਼ੀ, ਫਲ ਵੇਚਣ ਵਾਲੇ ਅਤੇ ਦੁੱਧ ਵਾਲੇ ਵੀ ਗਲੀਆਂ ਵਿਚ ਆਉਣ ਤੋਂ ਬਚਦੇ ਹਨ | ਜਿਸ ਕਾਰਨ ਉਨ੍ਹਾਂ ਨੂੰ ਬਹੁਤ ਸਾਰੀਆਂ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ |
