ਲੁਧਿਆਣਾ, 3 ਦਸੰਬਰ (ਜਸਵਿੰਦਰ ਸਿੰਘ)-ਗੁਰੂ ਅੰਗਦ ਦੇਵ ਵੈਟਰਨਰੀ ਅਤੇ ਐਨੀਮਲ ਸਾਇੰਸਜ਼ ਯੂਨੀਵਰਸਿਟੀ ਦੇ ਮਨੁੱਖੀ ਸਰੋਤ ਪ੍ਰਬੰਧਨ ਕੇਂਦਰ ਨੇ 10 ਦਿਨਾ ਫੈਕਲਟੀ ਇੰਡਕਸ਼ਨ ਪ੍ਰੋਗਰਾਮ ਦਾ ਪ੍ਰਬੰਧ ਕੀਤਾ | ਜਿਸ ਦਾ ਉਦੇਸ਼ ਨਵੇਂ ਅਧਿਆਪਕਾਂ ਨੂੰ ਜ਼ਰੂਰੀ ਹੁਨਰ ਅਤੇ ਗਿਆਨ ਨਾਲ ਜੋੜਨਾ ਸੀ | ਇਸ ਪ੍ਰੋਗਰਾਮ ਦਾ ਉਦੇਸ਼ ਨਵੇਂ ਭਰਤੀ ਅਧਿਆਪਕਾਂ ਨੂੰ ਯੂਨੀਵਰਸਿਟੀ ਦੇ ਅਕਾਦਮਿਕ ਪ੍ਰਸ਼ਾਸਕੀ ਅਤੇ ਨੈਤਿਕ ਢਾਂਚੇ ਦੇ ਨਾਲ-ਨਾਲ ਉਨ੍ਹਾਂ ਦੇ ਅਧਿਆਪਨ ਖੋਜ ਅਤੇ ਪਸਾਰ ਖੇਤਰ ਸੰਬੰਧੀ ਸਿੱਖਿਅਤ ਕਰਨਾ ਸੀ | ਇੰਡਕਸ਼ਨ ਪ੍ਰੋਗਰਾਮ ਵਿਚ ਵਿਚਾਰ - ਵਟਾਂਦਰਾ, ਮਾਹਿਰ ਗੱਲਬਾਤ, ਵਿਹਾਰਕ ਸੈਸ਼ਨ ਅਤੇ ਕੈਂਪਸ ਅਤੇ ਨੇੜਲੀਆਂ ਖੋਜ ਸੰਸਥਾਵਾਂ ਦੇ ਕਾਲਜਾਂ ਦੇ ਵੱਖ-ਵੱਖ ਵਿਭਾਗਾਂ ਦਾ ਦੌਰਾ ਸ਼ਾਮਲ ਸੀ | ਉੱਘੇ ਬੁਲਾਰੇ ਅਤੇ ਸੀਨੀਅਰ ਅਧਿਆਪਕਾਂ ਨੇ ਆਪਣੀ ਮੁਹਾਰਤ ਅਤੇ ਅਨੁਭਵ ਸਾਂਝੇ ਕੀਤੇ | ਪ੍ਰਤੀਭਾਗੀਆਂ ਨੇ ਦੱਸਿਆ ਕਿ ਇਹ ਪ੍ਰੋਗਰਾਮ ਬਹੁਤ ਸਿੱਖਿਆਦਾਇਕ ਸੀ ਕਿਉਂਕਿ ਉਨ੍ਹਾਂ ਨੂੰ ਯੂਨੀਵਰਸਿਟੀ ਪ੍ਰਣਾਲੀ ਅਤੇ ਸਿੱਖਿਆ ਸ਼ਾਸਤਰੀਆਂ, ਸਲਾਹਕਾਰਾਂ ਅਤੇ ਖੋਜਕਰਤਾਵਾਂ ਵਜੋਂ ਉਨ੍ਹਾਂ ਦੀ ਬਹੁਪੱਖੀ ਭੂਮਿਕਾ ਦੀ ਵਿਆਪਕ ਸੂਝ ਪ੍ਰਦਾਨ ਕੀਤੀ ਗਈ | ਡਾ. ਜਤਿੰਦਰ ਪਾਲ ਸਿੰਘ ਗਿੱਲ, ਉਪ-ਕੁਲਪਤੀ ਨੇ ਕਿਹਾ ਕਿ ਨਿਰੰਤਰ ਅਜਿਹੇ ਪੇਸ਼ੇਵਰ ਵਿਕਾਸ ਪ੍ਰੋਗਰਾਮ, ਸੰਸਥਾਵਾਂ ਦੇ ਉੱਚ ਅਕਾਦਮਿਕ ਮਿਆਰ ਦੀ ਗੁਣਵੱਤਾ ਵਧਾਉਣ ਅਤੇ ਵਿਦਿਅਕ ਤੇ ਸੰਸਥਾਗਤ ਵਿਕਾਸ ਲਈ ਜ਼ਰੂਰੀ ਹਨ |
