7 ਸਾਲਾਂ ’ਚ 274 ਭਗੌੜੇ ਵਿਦੇਸ਼ਾਂ ਤੋਂ ਲਿਆਂਦੇ-ਸਰਕਾਰ

ਨਵੀਂ ਦਿੱਲੀ, 4 ਅਗਸਤ (ਪੀ.ਟੀ.ਆਈ.)-ਸਰਕਾਰ ਨੇ ਮੰਗਲਵਾਰ ਨੂੰ ਕਿਹਾ ਕਿ ਪਿਛਲੇ 7 ਸਾਲਾਂ ਵਿੱਚ 36 ਦੇਸ਼ਾਂ ਤੋਂ 274 ਭਗੌੜੇ ਵਾਪਸ ਲਿਆਂਦੇ ਗਏ ਹਨ। ਇਹ ਗਿਣਤੀ ਔਸਤਨ ਪ੍ਰਤੀ ਸਾਲ ਲਗਭਗ 40 ਹੈ ਅਤੇ 2004-13 ਦੀ ਮਿਆਦ ਨਾਲੋਂ 10 ਗੁਣਾ ਵੱਧ ਹੈ, ਜਦੋਂ ਕਿ ਹਰ ਸਾਲ ਲਗਭਗ ਚਾਰ ਭਗੌੜੇ ਵਾਪਸ ਲਿਆਂਦੇ ਜਾਂਦੇ ਸਨ। ਸਰਕਾਰੀ ਬਿਆਨ ਵਿੱਚ ਕਿਹਾ ਗਿਆ ਹੈ ਕਿ ਇਸ ਸਮੇਂ ਦੌਰਾਨ ਮਨੀ ਲਾਂਡਰਿੰਗ ਰੋਕਥਾਮ ਐਕਟ (ਪੀ.ਐੱਮ.ਐੱਲ.ਏ.) ਦੇ ਤਹਿਤ ਭਗੌੜਿਆਂ ਨਾਲ ਸੰਬੰਧਿਤ 17,874 ਕਰੋੜ ਰੁਪਏ ਦੀ ਜਾਇਦਾਦ ਵੀ ਜ਼ਬਤ ਕੀਤੀ ਗਈ ਹੈ। ਸਰਕਾਰ ਨੇ ਦਾਅਵਾ ਕੀਤਾ ਕਿ ਪਿਛਲੀਆਂ ਸਰਕਾਰਾਂ ਵਿੱਚ ਭਗੌੜਿਆਂ ਨੂੰ ਵਾਪਸ ਲਿਆਉਣ ਲਈ ਰਾਜਨੀਤਿਕ ਇੱਛਾ ਸ਼ਕਤੀ ਦੀ ਘਾਟ ਸੀ, ਜਦੋਂ ਕਿ ਮੋਦੀ ਸਰਕਾਰ ਨੇ ਭਗੌੜਿਆਂ ਦੀ ਹਵਾਲਗੀ ਨੂੰ “ਰਾਸ਼ਟਰੀ ਤਰਜੀਹ” ਬਣਾ ਦਿੱਤਾ ਹੈ। ਬਿਆਨ ਦੇ ਅਨੁਸਾਰ, 2019 ਅਤੇ 2026 (ਜੁਲਾਈ ਤੱਕ) ਦੇ ਵਿਚਕਾਰ ਵਾਪਸ ਲਿਆਂਦੇ ਗਏ ਭਗੌੜਿਆਂ ਵਿੱਚੋਂ, 9 ਵਿੱਤੀ ਅਪਰਾਧਾਂ ਲਈ, 17 ਅੱਤਵਾਦੀ ਮਾਮਲਿਆਂ ਲਈ, 42 ਸੰਗਠਿਤ ਅਪਰਾਧਿਕ ਗਤੀਵਿਧੀਆਂ ਲਈ, 62 ਕਤਲ, ਡਕੈਤੀ ਅਤੇ ਹਿੰਸਕ ਅਪਰਾਧਾਂ ਲਈ, 53 ਜਿਨਸੀ ਅਪਰਾਧਾਂ ਅਤੇ ਬੱਚਿਆਂ ਵਿਰੁੱਧ ਜਿਨਸੀ ਅਪਰਾਧਾਂ ਲਈ, 16 ਨਸ਼ੀਲੇ ਪਦਾਰਥਾਂ ਦੀ ਤਸਕਰੀ ਲਈ, 12 ਤਸਕਰੀ, ਨਕਲੀ ਕਰੰਸੀ ਆਦਿ ਲਈ, 18 ਮਨੁੱਖੀ ਤਸਕਰੀ ਲਈ ਅਤੇ 45 ਹੋਰ ਅਪਰਾਧਾਂ ਲਈ ਲੋੜੀਂਦੇ ਸਨ। ਐਕਸ ’ਤੇ ਇੱਕ ਸੰਦੇਸ਼ ਵਿੱਚ ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਨੇ ਕਿਹਾ, “ਮੋਦੀ ਸਰਕਾਰ ਨੇ ਏਕੀਕ੍ਰਿਤ, ਖੁਫੀਆ-ਅਧਾਰਿਤ ਅਤੇ ਤਕਨਾਲੋਜੀ-ਅਧਾਰਿਤ ਕਾਰਵਾਈਆਂ ਸ਼ੁਰੂ ਕੀਤੀਆਂ ਹਨ, ਜੋ ਵਿਦੇਸ਼ਾਂ ਵਿੱਚ ਲੁਕੇ ਭਗੌੜਿਆਂ ‘ਤੇ ਸ਼ਿਕੰਜਾ ਕੱਸ ਰਹੀਆਂ ਹਨ।” ਉਨ੍ਹਾਂ ਕਿਹਾ, “ਤਿੰਨ ਨਵੇਂ ਕਾਨੂੰਨਾਂ ਦੇ ਤਹਿਤ ‘ਗੈਰਹਾਜ਼ਰੀ ਵਿੱਚ ਮੁਕੱਦਮਾ’ (ਦੋਸ਼ੀਆਂ ਦੀ ਗੈਰਹਾਜ਼ਰੀ ਵਿੱਚ ਮੁਕੱਦਮਾ) ਦੀ ਵਿਵਸਥਾ ਨੇ ਨਿਆਂ ਪ੍ਰਣਾਲੀ ਨੂੰ ਭਗੌੜੇ ਅਪਰਾਧੀਆਂ ਵਿਰੁੱਧ ਕਾਰਵਾਈ ਸ਼ੁਰੂ ਕਰਨ ਦਾ ਅਧਿਕਾਰ ਦਿੱਤਾ ਹੈ। ਪੀ.ਐੱਮ.ਐੱਲ.ਏ, ਦੀ ਸਖ਼ਤ ਵਰਤੋਂ ਨਾਲ 17,874 ਕਰੋੜ ਰੁਪਏ ਦੀ ਜਾਇਦਾਦ ਜ਼ਬਤ ਕੀਤੀ ਗਈ ਹੈ ਅਤੇ 18,762 ਕਰੋੜ ਰੁਪਏ ਦੀ ਰਿਕਵਰੀ/ਵਸੂਲੀ ਹੋਈ ਹੈ।”