ਨਹਿਰ ਦੀ ਸਫ਼ਾਈ ਕਰਕੇ ਗੰਦ ਸੁੱਟਿਆ ਸੜਕਾਂ ’ਤੇ, ਲੋਕ ਪ੍ਰੇਸ਼ਾਨ

ਮੁਕੇਰੀਆਂ, 7 ਜੁਲਾਈ (ਰਾਮਗੜ੍ਹੀਆ)- ਬੀਤੇ ਦਿਨ ਸ਼ਾਹ ਨਹਿਰ ਮੁਕੇਰੀਆਂ ਦੀ ਬਰਾਂਚ ਨਹਿਰ ਜੋ ਮੁਕੇਰੀਆਂ ਦੇ ਮਾਤਾ ਰਾਣੀ ਚੌਕ ਤੋਂ ਨਜ਼ਦੀਕ ਦੀ ਗੁਜ਼ਰਦੀ ਹੈ, ਦੀ ਸਫ਼ਾਈ ਕਰਵਾ ਕੇ ਨਹਿਰ ਦਾ ਸਾਰਾ ਗੰਦ ਸੜਕਾਂ ਉਪਰ ਸੁੱਟ ਦਿੱਤਾ। ਇਥੋਂ ਤੱਕ ਕਿ ਟਰੱਕ ਯੂਨੀਅਨ ਮੁਕੇਰੀਆਂ ਦੇ ਸਾਹਮਣੇ ਨਹਿਰ ’ਤੇ ਪਈ ਪੁਲੀ ਵਿਚਕਾਰ ਗੰਦ ਸੁਟ ਕੇ ਰਸਤਾ ਹੀ ਬੰਦ ਕਰ ਦਿੱਤਾ ਗਿਆ। ਇਸ ਸਬੰਧੀ ਜਾਣਕਾਰੀ ਦਿੰਦੇ ਹੋਏ ਕੁਝ ਲੋਕਾਂ ਨੇ ਦੱਸਿਆ ਕਿ ਝੋਨੇ ਦੀ ਲਵਾਈ ਕਾਰਨ ਪਾਣੀ ਦੀ ਮੰਗ ਇਕਦਮ ਵਧਣ ਕਰਕੇ ਨਹਿਰੀ ਵਿਭਾਗ ਹਰਕਤ ਵਿਚ ਬਹੁਤ ਦੇਰ ਨਾਲ ਆਇਆ ਅਤੇ ਨਹਿਰਾਂ ਦੀ ਸਫ਼ਾਈ ਕਰਵਾਉਣ ਲਈ ਲਗਾਈ ਗਈ ਲੇਬਰ ਵਲੋਂ ਨਹਿਰਾਂ ਵਿਚੋਂ ਗੰਦ ਕੱਢ ਕੇ ਕਾਲੋਨੀਆਂ ਵਿਚੋਂ ਗੁਜ਼ਰਦੀ ਨਹਿਰ ਦੇ ਕੰਢੇ ਵਸੇ ਘਰਾਂ ਨਜ਼ਦੀਕ ਅਤੇ ਸੜਕਾਂ ਪੁਲੀਆਂ ਉਤੇ ਸੁੱਟ ਕੇ ਭਾਰੀ ਗੰਦਗੀ ਫ਼ੈਲਾ ਦਿੱਤੀ ਹੈ। ਲੋਕਾਂ ਨੇ ਮੰਗ ਕੀਤੀ ਹੈ ਕਿ ਨਹਿਰੀ ਵਿਭਾਗ ਇਸ ਗੰਦਗੀ ਦੇ ਢੇਰਾਂ ਨੂੰ ਤੁਰੰਤ ਇਥੋਂ ਚੁਕਵਾਏ ਨਹੀਂ ਤਾਂ ਨਹਿਰੀ ਵਿਭਾਗ ਖ਼ਿਲਾਫ਼ ਸੰਘਰਸ਼ ਸ਼ੁਰੂ ਕੀਤਾ ਜਾਵੇਗਾ।