ਮਾਛੀਵਾੜਾ ਸਾਹਿਬ, 18 ਮਈ (ਮਨੋਜ ਕੁਮਾਰ)-ਇਸ ਵਿਚ ਕੋਈ ਸ਼ੱਕ ਨਹੀਂ ਕਿ ਮਾਛੀਵਾੜਾ ਵਿਚ ਲਗਾਤਾਰ ਵਾਹਨਾਂ ਦੀ ਸੰਖਿਆ ਬੜੀ ਤੇਜ਼ੀ ਨਾਲ ਵਧੀ ਹੈ ਤੇ ਹਰ ਪਾਸੇ ਸੜਕਾਂ 'ਤੇ ਛੋਟੇ ਵੱਡੇ ਵਾਹਨਾਂ ਦੀ ਹਰ ਸਮੇਂ ਆਵਾਜਾਈ ਰਹਿੰਦੀ ਹੈ | ਪਰ ਇਸ ਦੇ ਨਾਲ ਹੀ ਆਮ ਲੋਕਾਂ ਨੂੰ ਲੰਮੀਆਂ ਲਾਈਨਾਂ ਵੀ ਮਿਲੀਆਂ ਹਨ | ਹਾਲਾਤ ਇਹ ਹਨ ਕਿ ਸਵੇਰ ਸਮੇਂ ਇੱਕ ਪਾਸੇ ਜਦੋਂ ਸਕੂਲ ਜਾਣ ਲਈ ਬੱਚਿਆਂ ਦੇ ਮਾਪੇ ਆਪਣੇ ਆਪਣੇ ਵਾਹਨ ਲੈ ਕੇ ਇਤਿਹਾਸਿਕ ਗਨੀ ਖਾਂ ਨਬੀ ਖਾਂ ਗੇਟ ਤੋਂ ਗੁਜ਼ਰਦੇ ਹਨ ਤਾਂ ਕੋਈ ਟਰੈਫ਼ਿਕ ਕਰਮਚਾਰੀ ਨਾ ਹੋਣ ਕਰ ਕੇ ਇਹ ਵਾਹਨ ਅੱਗੇ ਨਿਕਲਣ ਦੀ ਤੇਜ਼ੀ ਵਿਚ ਨਾ ਸਿਰਫ਼ ਹੋਰਨਾਂ ਲਈ ਹਾਦਸਿਆਂ ਦਾ ਕਾਰਨ ਬਣਦੇ ਹਨ, ਬਲਕਿ ਲੰਮੇ ਜਾਮ ਦਾ ਹਿੱਸਾ ਵੀ ਬਣਦੇ ਹਨ | ਹਾਲਾਂਕਿ ਇਸ ਜਗ੍ਹਾ 'ਤੇ ਟਰੈਫ਼ਿਕ ਪੁਲਿਸ ਦੀ ਪੱਕੀ ਪੋਸਟ ਵੀ ਹੈ | ਪਰ ਫਿਰ ਵੀ ਸੜਕ ਦੀ ਹਰ ਦਿਸ਼ਾ ਵਿਚ ਹਾਰਨ ਦੀ ਉੱਚੀ ਆਵਾਜ਼ ਨਾ ਸਿਰਫ਼ ਆਵਾਜ਼ ਪ੍ਰਦੂਸ਼ਣ ਪੈਦਾ ਕਰਦੀ ਹੈ ਬਲਕਿ ਇਹ ਬੇਤਰਤੀਬ ਜਾਮ ਕੁੱਝ ਮਿੰਟਾਂ ਦੀ ਦੂਰੀ ਲੰਮੇ ਸਮੇਂ ਵਿੱਚ ਬਦਲ ਦਿੰਦਾ ਹੈ | ਇਸ ਦੇ ਨਾਲ ਹੀ ਅਕਸਰ ਸਕੂਲਾਂ ਨੂੰ ਜਾਣ ਵਾਲੇ ਬੱਚੇ ਟਿ੍ੱਪਲ ਸਵਾਰੀ ਤੇ ਉਮਰ ਤੋਂ ਘੱਟ ਬੱਚੇ ਭਾਰੀ ਦੋਪਹੀਆ ਵਾਹਨਾਂ ਦਾ ਇਸਤੇਮਾਲ ਨਾ ਸਿਰਫ਼ ਦੂਸਰਿਆਂ ਲਈ ਮੁਸ਼ਕਿਲ ਪੈਦਾ ਕਰਦੇ ਹਨ ਬਲਕਿ ਆਪਣੀ ਜ਼ਿੰਦਗੀ ਨੂੰ ਵੀ ਜੋਖ਼ਮ ਵਿਚ ਪਾਉਂਦੇ ਹਨ | ਪੁਲਿਸ ਦੇ ਆਕਾ ਅਧਿਕਾਰੀਆਂ ਨੂੰ ਚਾਹੀਦਾ ਹੈ ਕਿ ਉਹ ਇਸ ਸੰਵੇਦਨਸ਼ੀਲ ਮੁਸ਼ਕਿਲ ਦੇ ਸਮਾਧਾਨ ਲਈ ਹਰ ਵਾਜਬ ਤੇ ਪੁਖ਼ਤਾ ਕਦਮ ਚੁੱਕੇ ਤਾਂ ਕਿ ਅਨਮੋਲ ਜਾਨਾਂ ਨੂੰ ਇਸ ਤਰਾਂ ਸੜਕਾਂ 'ਤੇ ਖੱਜਲ ਹੋਣ ਤੋਂ ਬਚਾਇਆ ਜਾ ਸਕੇ |
