ਬਟਾਲਾ, 31 ਦਸੰਬਰ (ਸਤਿੰਦਰ ਸਿੰਘ)- ਸਥਾਨਕ ਡੇਰਾ ਰੋਡ 'ਤੇ ਮੱਲ੍ਹੀ ਮਾਰਕਿਟ ਦੇ ਨਜ਼ਦੀਕ 2 ਲੁਟੇਰਿਆਂ ਨੇ ਇਕ ਵਿਅਕਤੀ ਦੀ ਕੁੱਟਮਾਰ ਕਰ ਕੇ ਉਸ ਤੋਂ 1800 ਰੁਪਏ ਖੋਹ ਲਏ ਗਏ | ਪੀੜਤ ਵਿਅਕਤੀ ਮਦਨ ਲਾਲ ਵਾਸੀ ਅੱਚਲੀ ਗੇਟ ਬਟਾਲਾ ਨੇ ਦੱਸਿਆ ਕਿ ਉਹ ਸ਼ਬਜੀ ਮੰਡੀ ਵਿਚ ਲਿਫ਼ਾਫ਼ੇ ਵੇਚਣ ਦਾ ਕੰਮ ਕਰਦਾ ਹੈ, ਬੀਤੇ ਤੜਕਸਾਰ ਸਵੇਰੇ 4 ਵਜੇ ਉਹ ਆਪਣੇ ਸਕੂਟਰ 'ਤੇ ਸਬਜ਼ੀ ਮੰਡੀ ਜਾ ਰਿਹਾ ਸੀ, ਜਦੋਂ ਉਹ ਡੇਰਾ ਰੋਡ 'ਤੇ ਮੱਲ੍ਹੀ ਮਾਰਕਿਟ ਨਜ਼ਦੀਕ ਪਹੁੰਚਿਆਂ ਤਾਂ 2 ਵਿਅਕਤੀਆਂ ਵਲੋਂ ਉਸ ਨੂੰ ਰੋਕਿਆ ਗਿਆ | ਇਸੇ ਦੌਰਾਨ ਉਨ੍ਹਾਂ ਵਲੋਂ ਦਾਤਰ ਕੱਢ ਲਏ ਤੇ ਦਾਤਰ ਨਾਲ ਪੁੱਠੇ ਵਾਰ ਕਰਨੇ ਸ਼ੁਰੂ ਕਰ ਦਿੱਤੇ ਤੇ ਉਸ ਕੋਲੋਂ 1800 ਰੁਪਏ ਖੋਹ ਲਏ ਤੇ ਉਸ ਦੇ ਕੱਪੜੇ ਵੀ ਪਾੜ ਦਿੱਤੇ | ਉਸ ਨੇ ਦੱਸਿਆ ਕਿ ਇਸ ਸੰਬੰਧੀ ਮੰਡੀ ਦੇ ਪ੍ਰਧਾਨ ਨੂੰ ਸੂਚਿਤ ਕਰ ਦਿੱਤਾ ਹੈ | ਉਸ ਨੇ ਮੰਗ ਕੀਤੀ ਕਿ ਸਵੇਰ ਸਮੇਂ ਮੰਡੀ ਵਿਚ ਪੁਲਿਸ ਗਾਰਦ ਲਗਾਈ ਜਾਵੇ |
