ਤਿੱਬੜ, 31 ਜਨਵਰੀ (ਸੋਹਨ ਮਲਿਕ)-ਸਹਿਕਾਰੀ ਸਭਾ ਭੁੰਬਲੀ ਵਿਖੇ ਮਾਰਕਫੈੱਡ ਧਾਰੀਵਾਲ ਵਲੋਂ ਇਕ ਰੋਜ਼ਾ ਕਿਸਾਨ ਸਿਖਲਾਈ ਕੈਂਪ ਲਗਾਇਆ | ਇਸ 'ਚ ਖੇਤੀ ਮਾਹਿਰਾਂ ਵਲੋਂ ਕਿਸਾਨਾਂ ਨੂੰ ਪਸ਼ੂ ਖ਼ੁਰਾਕ ਤੇ ਰਬੀ ਫ਼ਸਲਾਂ ਦੀ ਸਾਂਭ-ਸੰਭਾਲ ਸੰਬੰਧੀ ਜਾਣਕਾਰੀ ਦਿੱਤੀ ਗਈ | ਇਸ ਮੌਕੇ ਵਿਸ਼ੇਸ਼ ਤੌਰ 'ਤੇ ਪੰਜਾਬ ਖੇਤੀਬਾੜੀ ਯੂਨੀਵਰਸਿਟੀ ਵਲੋਂ ਪਸ਼ੂਆਂ ਦੀ ਖ਼ੁਰਾਕ ਸੰਬੰਧੀ ਮਾਹਿਰ ਡਾ. ਪੁਨੀਤ ਵਲੋਂ ਪਸ਼ੂਆਂ ਨੂੰ ਸੰਤੁਲਿਤ ਆਹਾਰ ਦੇਣ ਸੰਬੰਧੀ ਜਾਣਕਾਰੀ ਦਿੱਤੀ ਗਈ | ਉਨ੍ਹਾਂ ਵਲੋਂ ਗੈਰ ਮਿਆਰੀ ਖ਼ੁਰਾਕ ਪਸ਼ੂਆਂ ਨੂੰ ਨਾ ਪਾਉਣ ਤੇ ਪੰਜਾਬ ਸਰਕਾਰ ਦੇ ਅਦਾਰੇ ਮਾਰਕਫੈੱਡ ਵਲੋਂ ਤਿਆਰ ਕੀਤੀ ਪਸ਼ੂ ਖ਼ੁਰਾਕ ਦੀ ਵਰਤੋਂ ਕਰਨ ਦੀ ਸਲਾਹ ਦਿੱਤੀ | ਇਸ ਮੌਕੇ ਵਿਸ਼ੇਸ਼ ਤੌਰ 'ਤੇ ਖਾਦ ਸਪਲਾਈ ਅਫ਼ਸਰ ਗੁਰਦਾਸਪੁਰ ਰਜਨੀ ਨੇ ਖਾਦਾਂ ਦੀ ਸੰਤੁਲਿਤ ਵਰਤੋਂ ਦੀ ਜਾਣਕਾਰੀ ਦਿੱਤੀ | ਇਸ ਮੌਕੇ ਉੱਚ ਸ਼ਾਖਾ ਅਫ਼ਸਰ ਮਨਪ੍ਰੀਤ ਕੌਰ, ਸੇਲਜ਼ਮੈਨ ਮੇਜਰ ਸਿੰਘ, ਫ਼ੀਲਡ ਅਫ਼ਸਰ ਨਵਤੇਜ ਸਿੰਘ ਢੀਂਡਸਾ, ਸਹਾਇਕ ਖੇਤਰੀ ਅਫ਼ਸਰ ਨਵਰਾਜ ਸਿੰਘ ਅਤੇ ਨਾਨਕ ਜੋਤ ਸਿੰਘ ਹਾਜ਼ਰ ਸਨ | ਕਿਸਾਨਾਂ ਵਲੋਂ ਇਸ ਕੈਂਪ ਨੂੰ ਲਾਹੇਵੰਦ ਦੱਸਿਆ ਅਤੇ ਸਕੱਤਰ ਸਹਿਕਾਰੀ ਸਭਾ ਵਲੋਂ ਸਭ ਦਾ ਧੰਨਵਾਦ ਕੀਤਾ |
