ਗੁਰਦਾਸਪੁਰ, 16 ਅਪ੍ਰੈਲ (ਅਸ਼ੋਕ ਸ਼ਰਮਾ)- ਸਥਾਨਕ ਸ਼ਹਿਰ ਅਤੇ ਆਸ-ਪਾਸ ਦੇ ਕਸਬਿਆਂ ਅੰਦਰ ਲੱਗੇ ਸਟੇਟ ਬੈਂਕ ਦੇ ਏ.ਟੀ.ਐਮ ਸ਼ੋਅ ਪੀਸ ਬਣ ਕੇ ਰਹਿ ਗਏ ਹਨ ਕਿਉਂਕਿ ਇਨ੍ਹਾਂ ਵਿਚ ਕਈ ਕਈ ਦਿਨ ਪੈਸੇ ਨਾ ਪੈਣ ਕਰਕੇ ਜਿਥੇ ਜਨਤਾ ਪ੍ਰੇਸ਼ਾਨ ਹੈ ਉਥੇ ਬੈਂਕ ਅਧਿਕਾਰੀਆਂ 'ਤੇ ਕਈ ਤਰ੍ਹਾਂ ਦੇ ਸਵਾਲ ਖੜ੍ਹੇ ਹੋ ਰਹੇ ਹਨ | ਇਸ ਸਬੰਧੀ ਡਾ: ਜੋਗਿੰਦਰ ਸਿੰਘ ਕੰਡਾ, ਪ੍ਰੀਤਮ ਸਿੰਘ ਕਾਟਲ, ਸੋਨੀਆ ਸ਼ਰਮਾ ਨੇ ਦੱਸਿਆ ਕਿ ਖ਼ਾਸ ਕਰਕੇ ਸਟੇਟ ਬੈਂਕ ਦੇ ਲੱਗੇ ਏ.ਟੀ.ਐਮ ਹਮੇਸ਼ਾ ਪੈਸਿਆਂ ਤੋਂ ਖ਼ਾਲੀ ਰਹਿੰਦੇ ਹਨ ਤੇ ਬਹੁਤ ਸਾਰੇ ਖਪਤਕਾਰਾਂ ਨੰੂ ਪੈਸੇ ਨਾ ਮਿਲਣ ਕਰਕੇ ਹਾਹਾਕਾਰ ਮਚੀ ਹੋਈ ਹੈ | ਉਨ੍ਹਾਂ ਕਿਹਾ ਕਿ ਬੈਂਕਾਂ ਦੀ ਨਿੱਜੀ ਕੰਪਨੀ ਨੇ ਲੱਖਾਂ ਦੇ ਨਵੇਂ ਏ.ਟੀ.ਐਮ. ਖਪਤਕਾਰਾਂ ਦੀ ਸਹੂਲਤ ਲਈ ਲਗਾਏ ਹਨ ਪਰ ਉਹ ਵੀ ਖ਼ਾਲੀ ਹੋਣ ਕਰਕੇ ਲੋਕਾਂ ਨੰੂ ਬੈਂਕਾਂ ਵਿਚੋਂ ਪੈਸੇ ਕਢਵਾਉਣ ਲਈ ਮਜਬੂਰ ਹੋਣਾ ਪੈ ਰਿਹਾ ਹੈ ਜਿਸ ਨਾਲ ਬੈਂਕਾਂ ਵਿਚ ਕਾਫ਼ੀ ਭੀੜ ਲੱਗ ਜਾਂਦੀ ਹੈ ਤੇ ਖਪਤਕਾਰਾਂ ਦਾ ਕਾਫ਼ੀ ਸਮਾਂ ਬਰਬਾਦ ਹੋ ਜਾਂਦਾ ਹੈ | ਉਨ੍ਹਾਂ ਦੱਸਿਆ ਕਿ ਇਸ ਮਾਮਲੇ ਸਬੰਧੀ ਬੈਂਕ ਅਧਿਕਾਰੀਆਂ ਨੰੂ ਵੀ ਜਾਣੂ ਕਰਵਾਇਆ ਗਿਆ ਹੈ ਪਰ ਜਿਸ ਕੰਪਨੀ ਵਲੋਂ ਪੈਸੇ ਪਾਏ ਜਾਂਦੇ ਹਨ, ਉਹ ਉਸ ਨਾਲ ਵੀ ਸੰਪਰਕ ਨਹੀਂ ਕਰਕੇ | ਲੋਕਾਂ ਨੇ ਵੱਖ-ਵੱਖ ਬੈਂਕਾਂ ਦੇ ਸੀਨੀਅਰ ਅਧਿਕਾਰੀਆਂ ਪਾਸੋਂ ਮੰਗ ਕੀਤੀ ਕਿ ਸ਼ਹਿਰੀ ਤੇ ਦਿਹਾਤੀ ਖੇਤਰ ਅੰਦਰ ਲੱਗੇ ਏ.ਟੀ.ਐਮ. ਵਿਚ ਪੈਸੇ ਪਾਉਣ ਦੀਆਂ ਸਖਤ ਹਦਾਇਤਾਂ ਜਾਰੀ ਕੀਤੀਆਂ ਜਾਣ, ਜਿਸ ਨਾਲ ਖਪਤਕਾਰਾਂ ਦੀ ਖੱਜਲ ਖ਼ੁਆਰੀ ਨਾ ਹੋਵੇ |
