ਪਠਾਨਕੋਟ, 3 ਜੁਲਾਈ (ਵਿਨੋਦ/ਸੁਮਿਤ)-ਜ਼ਿਲ੍ਹਾ ਬਾਰ ਐਸੋਸੀਏਸ਼ਨ ਪਠਾਨਕੋਟ ਦੇ ਸੱਦੇ ‘ਤੇ ਵਕੀਲਾਂ ਨੇ ਇਕ ਵਕੀਲ ਵਿਰੁੱਧ ਕੇਸ ਦਰਜ ਕਰਨ ਦੇ ਵਿਰੋਧ ’ਚ ਹੜਤਾਲ ਕੀਤੀ। ਉਪ ਪ੍ਰਧਾਨ ਦਰਸ਼ਨ ਸਿੰਘ ਦੀ ਪ੍ਰਧਾਨਗੀ ਹੇਠ ਵਕੀਲਾਂ ਨੇ ਨੋ-ਵਰਕ ਆਰਡਰ ਦੀ ਪਾਲਣਾ ਕਰਕੇ ਅਦਾਲਤੀ ਕਾਮ ਕਾਜ ਠੱਪ ਰੱਖਿਆ। ਐਸੋਸੀਏਸ਼ਨ ਦੀ ਮੀਟਿੰਗ ’ਚ ਵਕੀਲਾਂ ਨੇ ਵਕੀਲ ਜੋਤੀਪਾਲ ਭੀਮ ਵਿਰੁੱਧ ਦਰਜ ਐਫ.ਆਈ.ਆਰ ਨੂੰ ਝੂਠਾ ਅਤੇ ਬੇਬੁਨਿਆਦ ਦੱਸਦੇ ਹੋਏ ਅਦਾਲਤੀ ਕਾਰਵਾਈ ਦਾ ਪੂਰਨ ਬਾਈਕਾਟ ਕਰਨ ਦਾ ਐਲਾਨ ਕੀਤਾ ਅਤੇ ਪੁਲਿਸ ਕਾਰਵਾਈ ਦੀ ਸਖ਼ਤ ਨਿੰਦਾ ਕੀਤੀ। ਥਾਣਾ ਡਵੀਜ਼ਨ ਨੰਬਰ 2 ਦੀ ਪੁਲਿਸ ਨੇ ਬਿਨਾਂ ਕਿਸੇ ਠੋਸ ਸਬੂਤ ਜਾਂ ਸਹੀ ਜਾਂਚ ਦੇ ਐਫ.ਆਈ.ਆਰ ਦਰਜ ਕੀਤੀ। ਐਸੋਸੀਏਸ਼ਨ ਨੇ ਏਕਤਾ ਬਣਾਈ ਰੱਖਣ ਲਈ ਸਖ਼ਤ ਨਿਰਦੇਸ਼ ਜਾਰੀ ਕੀਤੇ ਹਨ। ਮਤੇ ਅਨੁਸਾਰ ਹੜਤਾਲ ਦੀ ਉਲੰਘਣਾ ਕਰਨ ਵਾਲਾ ਜਾਂ ਅਦਾਲਤ ਵਿਚ ਪੇਸ਼ ਹੋਣ ਵਾਲਾ ਕੋਈ ਵੀ ਮੈਂਬਰ 5,000 ਦਾ ਭਾਰੀ ਜੁਰਮਾਨਾ ਕੀਤਾ ਜਾਵੇਗਾ। ਇਸ ਤੋਂ ਇਲਾਵਾ ਅਜਿਹੇ ਮੈਂਬਰ ਦੇ ਵੋਟਿੰਗ ਅਧਿਕਾਰ ਨੂੰ ਵੀ ਰੱਦ ਕੀਤਾ ਜਾ ਸਕਦਾ ਹੈ। ਉਨ੍ਹਾਂ ਕਿਹਾ ਕਿ ਐਸੋਸੀਏਸ਼ਨ ਦਾ ਵਫ਼ਦ ਐਸ.ਐਸ.ਪੀ ਪਠਾਨਕੋਟ ਨੂੰ ਮਿਲੇਗਾ, ਮੰਗਾਂ ਦਾ ਇਕ ਮੰਗ ਪੱਤਰ ਸੌਂਪੇਗਾ ਅਤੇ ਮਾਮਲੇ ਦੇ ਸਮੇਂ ਸਿਰ ਹੱਲ ਦੀ ਮੰਗ ਕਰੇਗਾ। ਉਨ੍ਹਾਂ ਕਿਹਾ ਕਿ ਇਸ ਮਾਮਲੇ ਸਬੰਧੀ ਜਾਣਕਾਰੀ ਪੰਜਾਬ ਤੇ ਹਰਿਆਣਾ ਬਾਰ ਕੌਂਸਲ ਦੇ ਚੇਅਰਮੈਨ ਨੂੰ ਵੀ ਭੇਜੀ ਗਈ ਹੈ। ਜੇਕਰ ਪੁਲਿਸ ਸਹਿਯੋਗ ਨਹੀਂ ਕਰਦੀ ਅਤੇ ਝੂਠੀ ਐਫ.ਆਈ.ਆਰ ਰੱਦ ਨਹੀਂ ਕੀਤੀ ਜਾਂਦੀ ਤਾਂ ਰਾਜ ਵਿਆਪੀ ਵਿਰੋਧ ਪ੍ਰਦਰਸ਼ਨ ਦੀ ਚਿਤਾਵਨੀ ਜਾਰੀ ਕੀਤੀ ਗਈ ਹੈ। ਹੜਤਾਲ ਨੂੰ ਪ੍ਰਭਾਵਸ਼ਾਲੀ ਬਣਾਉਣ ਲਈ ਐਸੋਸੀਏਸ਼ਨ ਨੇ ਵੱਖ-ਵੱਖ ਅਦਾਲਤਾਂ ਲਈ ਪ੍ਰੌਕਸੀ ਕੌਂਸਲਾਂ ਦੀ ਇਕ ਸੂਚੀ ਜਾਰੀ ਕੀਤੀ ਹੈ, ਜਿਸ ਦੇ ਇੰਚਾਰਜ ਐਡਵੋਕੇਟ ਵਿਕਰਮਜੀਤ ਰਾਏ ਹਨ। ਹੜਤਾਲ ਉਦੋਂ ਤੱਕ ਜਾਰੀ ਰਹੇਗੀ ਜਦੋਂ ਤੱਕ ਪੁਲਿਸ ਐਫ.ਆਈ.ਆਰ ਰੱਦ ਕਰਨ ਦੀ ਮੰਗ ਨੂੰ ਪੂਰਾ ਨਹੀਂ ਕਰਦੀ। ਇਸ ਮੌਕੇ ਐਡਵੋਕੇਟ ਵਿਸ਼ਾਲ ਕੋਹਲੀ, ਸਾਬਕਾ ਪ੍ਰਧਾਨ ਨਵਦੀਪ ਸੈਣੀ, ਮਮਤਾ ਬੇਦੀ, ਨੂਰੇਨ ਪਠਾਨੀਆ, ਸਕੱਤਰ ਕੇਤਨ ਮਹਾਜਨ, ਵਿਕਰਮ ਸ਼ਰਮਾ, ਐਡਵੋਕੇਟ ਰਸ਼ਪਾਲ ਸਿੰਘ ਠਾਕੁਰ, ਐਡਵੋਕੇਟ ਸ਼ਿਵਮ ਭਾਟੀਆ, ਐਡਵੋਕੇਟ ਐਨ.ਐਸ. ਠਾਕੁਰ, ਐਡਵੋਕੇਟ ਐਸ.ਐਸ. ਰਾਣਾ, ਅਤੇ ਐਡਵੋਕੇਟ ਅਮਰਜੋਤ ਸਿੰਘ ਮੌਜੂਦ ਸਨ।
