ਫ਼ਾਜ਼ਿਲਕਾ, 15 ਜੂਨ (ਦਵਿੰਦਰ ਪਾਲ ਸਿੰਘ)-ਕੇਂਦਰ ਸਰਕਾਰ ਵਲੋਂ ਸਰਹੱਦੀ ਖੇਤਰ ਅੰਦਰ ਬਣਾਈ ਜਾਣ ਵਾਲੀ ਸੁਰੱਖਿਆ ਪੱਟੀ ਨੂੰ ਰੋਕਣ ਲਈ ਸਰਹੱਦੀ ਖੇਤਰ ਦੇ ਲੋਕਾਂ ਵਲੋਂ ਸ਼ੁਰੂ ਕੀਤੇ ਗਏ ਸੰਘਰਸ਼ ਅੰਦਰ ਵੱਖ-ਵੱਖ ਆਗੂਆਂ ਨੇ ਸ਼ਮੂਲੀਅਤ ਕਰ ਸੰਘਰਸ਼ ਨੂੰ ਆਪਣਾ ਸਮਰਥਨ ਦੇਣ ਦਾ ਐਲਾਨ ਕੀਤਾ। ਪਿੰਡ ਨੂਰ ਸ਼ਾਹ ਦੇ ਗੁਰਦੁਆਰਾ ਵਿਖੇ ਹੋਏ ਇਕੱਠ ਅੰਦਰ ਪੰਜਾਬੀ ਲੋਕ ਗਾਇਕ ਧੀਰਾ ਬਰਾੜ, ਲਖਬੀਰ ਸਿੰਘ ਨੋਨਾ ਬਰਾੜ ਸਰਪੰਚ ਅਭੁੰਨ, ਪਰਮਜੀਤ ਸਿੰਘ ਨੂਰ ਸ਼ਾਹ ਚੇਅਰਮੈਨ ਮਾਰਕੀਟ ਕਮੇਟੀ ਫ਼ਾਜ਼ਿਲਕਾ, ਸੁਖਮੰਦਰ ਸਿੰਘ ਬਰਾੜ ਕਿੜਿਆਂਵਾਲੀ ਨੇ ਪੁੱਜ ਕੇ ਸਰਹੱਦੀ ਖੇਤਰ ਦੇ ਲੋਕਾਂ ਨੂੰ ਵਿਸ਼ਵਾਸ ਦਿਵਾਇਆ ਕਿ ਸਰਕਾਰ ਵਲੋਂ ਜੋ 245 ਫੁੱਟ ਚੌੜਾ ਸੁਰੱਖਿਆ ਬੰਨ੍ਹ ਦੇ ਨਾਂਅ ‘ਤੇ ਜ਼ਮੀਨ ਲਈ ਜਾਣੀ ਹੈ ਉਸ ਨਾਲ ਸਰਹੱਦੀ ਖੇਤਰ ਦੇ ਕਿਸਾਨਾਂ ਦਾ ਜੋ ਵੱਡਾ ਨੁਕਸਾਨ ਹੋਵੇਗਾ ਉਹ ਨਹੀਂ ਹੋਣ ਦਿੱਤਾ ਜਾਵੇਗਾ। ਇਸ ਨੂੰ ਕਿਸਾਨ ਅਤੇ ਰਾਸ਼ਟਰੀ ਪਾਰਟੀਆਂ ਦੇ ਆਗੂ ਪੂਰਨ ਸਮਰਥਨ ਦਿੰਦੇ ਹਨ।
