ਤਾਲਾ ਠੀਕ ਕਰਨ ਆਏ ਕਾਰੀਗਰ ਮਾਲਕਾਂ ਦੇ 15 ਲੱਖ ਰੁਪਏ ਮੁੱਲ ਦੇ ਸੋਨੇ ਦੇ ਗਹਿਣੇ ਚੋਰੀ ਕਰਕੇ ਹੋਏ ਫਰਾਰ
ਲੁਧਿਆਣਾ, 29 ਸਤੰਬਰ (ਪਰਮਿੰਦਰ ਸਿੰਘ ਆਹੂਜਾ)-ਸਥਾਨਕ ਮਾਡਲ ਟਾਊਨ ਐਕਸਟੈਨਂਸ਼ਨ ਵਿਚ ਅੱਜ ਸ਼ਾਮ ਅਲਮਾਰੀ ਦਾ ਤਾਲਾ ਠੀਕ ਕਰਨ ਆਏ ਕਾਰੀਗਰ ਮਾਲਕਾਂ ਦੇ 15 ਲੱਖ ਰੁਪਏ ਮੁੱਲ ਦੇ ਗਹਿਣੇ ਚੋਰੀ ਕਰਕੇ ਫਰਾਰ ਹੋ ਗਏ। ਮਾਡਲ ਟਾਊਨ ਦੇ 74 ਸਾਲਾ ਸੁਦੇਸ਼ ਧੀਰ ਨੇ ਦੱਸਿਆ ਕਿ ਬੀਤੇ ਦਿਨ ਉਨ੍ਹਾਂ ਦੇ ਘਰ ਦੇ ਮੁੱਖ ਗੇਟ ਦਾ ਤਾਲਾ ਖਰਾਬ ਹੋ ਗਿਆ ਸੀ।
ਲੁਧਿਆਣਾ, 29 ਸਤੰਬਰ (ਪਰਮਿੰਦਰ ਸਿੰਘ ਆਹੂਜਾ)-ਸਥਾਨਕ ਮਾਡਲ ਟਾਊਨ ਐਕਸਟੈਨਂਸ਼ਨ ਵਿਚ ਅੱਜ ਸ਼ਾਮ ਅਲਮਾਰੀ ਦਾ ਤਾਲਾ ਠੀਕ ਕਰਨ ਆਏ ਕਾਰੀਗਰ ਮਾਲਕਾਂ ਦੇ 15 ਲੱਖ ਰੁਪਏ ਮੁੱਲ ਦੇ ਗਹਿਣੇ ਚੋਰੀ ਕਰਕੇ ਫਰਾਰ ਹੋ ਗਏ। ਮਾਡਲ ਟਾਊਨ ਦੇ 74 ਸਾਲਾ ਸੁਦੇਸ਼ ਧੀਰ ਨੇ ਦੱਸਿਆ ਕਿ ਬੀਤੇ ਦਿਨ ਉਨ੍ਹਾਂ ਦੇ ਘਰ ਦੇ ਮੁੱਖ ਗੇਟ ਦਾ ਤਾਲਾ ਖਰਾਬ ਹੋ ਗਿਆ ਸੀ। ਗਲੀ ਵਿਚੋਂ ਜਦੋਂ ਤਾਲਾ ਠੀਕ ਕਰਨ ਵਾਲਾ ਇਕ ਨੌਜਵਾਨ ਲੰਘ ਰਿਹਾ ਸੀ ਤਾਂ ਉਸ ਨੇ ਉਸ ਨੂੰ ਤਾਲਾ ਠੀਕ ਕਰਨ ਲਈ ਕਿਹਾ। ਦੋਸ਼ੀ ਨੇ ਦੱਸਿਆ ਕਿ ਪੇਂਟ ਕਾਰਨ ਤਾਲਾ ਜਾਮ ਹੋ ਗਿਆ ਸੀ। ਦੋਸ਼ੀ ਨੇ ਉਸ ਨੂੰ ਘਰ ਤੋਂ ਕੋਈ ਵੀ ਚਾਬੀ ਲਿਆਉਣ ਲਈ ਕਿਹਾ, ਜੋ ਆਕਾਰ ਵਿਚ ਪਤਲੀ ਹੋਵੇ। ਜਿਸ ’ਤੇ ਉਸ ਨੇ ਤਾਲਾ ਠੀਕ ਕਰਨ ਵਾਲੇ ਨੌਜਵਾਨ ਨੂੰ ਇਹ ਚਾਬੀ ਦੇ ਦਿੱਤੀ। ਧੀਰ ਨੇ ਅੱਗੇ ਕਿਹਾ ਕਿ ਦੋਸ਼ੀ ਨੇ ਜਾਣਬੁੱਝ ਕੇ ਚਾਬੀ ਮੋੜੀ ਅਤੇ ਘਰੋਂ ਚਲਾ ਗਿਆ ਇਹ ਕਹਿ ਕੇ ਕਿ ਉਹ ਆਪਣੇ ਚਾਚੇ ਨੂੰ ਲੈ ਕੇ ਆ ਰਿਹਾ ਹੈ, ਜੋ ਕਿ ਅਜਿਹਾ ਤਾਲਾ ਠੀਕ ਕਰਨ ਦਾ ਮਾਹਿਰ ਹੈ ਅਤੇ ਉਸ ਤੋਂ ਕੋਈ ਪੈਸਾ ਨਹੀਂ ਲਿਆ। ਧੀਰ ਨੇ ਅੱਗੇ ਕਿਹਾ ਕਿ ਦੋਸ਼ੀ ਅੱਜ ਆਪਣੇ ਸਾਥੀ ਨਾਲ ਦੁਬਾਰਾ ਆਇਆ ਅਤੇ ਬਹਾਨੇ ਨਾਲ ਕਮਰੇ ਵਿਚ ਆ ਗਿਆ। ਧੀਰ ਨੇ ਦੋਸ਼ ਲਗਾਇਆ ਕਿ ਭਾਵੇਂ ਉਹ ਕਮਰੇ ਵਿਚ ਮੌਜੂਦ ਰਿਹਾ, ਪਰ ਦੋਸ਼ੀ ਨੇ ਅਲਮਾਰੀ ਤੋਂ ਬੜੀ ਚਲਾਕੀ ਨਾਲ ਲਗਪਗ 100 ਗ੍ਰਾਮ ਸੋਨਾ ਚੋਰੀ ਕਰ ਲਿਆ ਤੇ ਭੱਜ ਗਿਆ। ਕੁਝ ਸਮੇਂ ਬਾਅਦ ਜਦੋਂ ਉਸ ਨੇ ਅਲਮਾਰੀ ਦੀ ਜਾਂਚ ਕੀਤੀ ਤਾਂ ਉਸ ਨੂੰ ਘਟਨਾ ਬਾਰੇ ਪਤਾ ਲੱਗਾ। ਉਸ ਨੇ ਤੁਰੰਤ ਪੁਲਿਸ ਨੂੰ ਸੂਚਿਤ ਕੀਤਾ। ਮਾਡਲ ਟਾਊਨ ਪੁਲਿਸ ਸਟੇਸ਼ਨ ਦੀ ਐਸ. ਐਚ. ਓ. ਇੰਸਪੈਕਟਰ ਗੁਰਸ਼ਿੰਦਰ ਕੌਰ ਨੇ ਦੱਸਿਆ ਕਿ ਦੋਸ਼ੀ ਸੀ. ਸੀ. ਟੀ. ਵੀ. ਵਿਚ ਕੈਦ ਹੋ ਗਏ ਹਨ। ਇਸ ਅਧਾਰ ’ਤੇ ਪੁਲਿਸ ਵਲੋਂ ਉਨ੍ਹਾਂ ਦੀ ਭਾਲ ਕੀਤੀ ਜਾ ਰਹੀ ਹੈ। ਉਨ੍ਹਾਂ ਦਾਅਵਾ ਕੀਤਾ ਕਿ ਇਨ੍ਹਾਂ ਨੂੰ ਜਲਦ ਕਾਬੂ ਕਰ ਲਿਆ ਜਾਵੇਗਾ।
