ਸਰਕਾਰੀ ਸਹੂਲਤਾਂ ਮੁਹੱਈਆ ਕਰਵਾਉਣ ਤੋਂ ਪਹਿਲਾਂ ਕਰਾਸ ਚੈਕਿੰਗ ਹੋਣੀ ਜ਼ਰੂਰੀ-ਜਥੇ. ਜੱਲਾ

ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਸਾਬਕਾ ਯੂਨੀਅਨ ਮੀਤ ਪ੍ਰਧਾਨ ਤੇ ਮੈਂਬਰ ਜਥੇਦਾਰ ਹਰਪਾਲ ਸਿੰਘ ਜੱਲਾ ਨੇ ਕਿਹਾ ਕਿ ਸੂਬਾ ਪੰਜਾਬ ਦੀ ਧਰਤੀ ਤੇ ਸਮੂਹ ਵਰਗਾਂ ਦਾ ਸਵਾਗਤ ਕੀਤਾ ਜਾਂਦਾ ਹੈ, ਕਿਉਂਕਿ ਪੰਜਾਬ ਦੀ ਧਰਤੀ ਨੂੰ ਗੁਰੂ, ਪੀਰ ਪੈਗੰਬਰਾਂ ਨੇ ਭਾਗ ਲਗਾਏ ਹਨ। ਲੇਕਿਨ ਹਰੇਕ ਸੂਬੇ ਦਾ ਸੱਭਿਆਚਾਰ ਵੱਖਰਾ ਹੁੰਦਾ ਹੈ ਇਸ ਲਈ ਜੇਕਰ ਕੋਈ ਵੀ ਪ੍ਰਵਾਸੀ ਕਿਸੇ ਵੀ ਸੂਬੇ ਵਿੱਚ ਜਾਵੇ ਤਾਂ ਉਸ ਨੂੰ ਉਥੇ ਜਾ ਕੇ ਉਥੋਂ ਦੇ ਤੋਂਰ ਤਰੀਕੇ ਅਤੇ ਸੱਭਿਆਚਾਰ ਵਿੱਚ ਗੜੁਚ ਹੋ ਕੇ ਜੀਵਨ ਬਤੀਤ ਕਰਨਾ ਚਾਹੀਦਾ ਹੈ ਉਹਨਾਂ ਕਿਹਾ ਕਿ ਬਾਹਰੋਂ ਆਉਣ ਵਾਲੇ ਕਿਸੇ ਵੀ ਸੂਬੇ ਦੇ ਬਸਿੰਦੇ ਨੂੰ ਪੰਜਾਬ ਸਰਕਾਰ ਦੀਆਂ ਸਰਕਾਰੀ ਸਹੂਲਤਾਂ ਮੁਹਈਆ ਕਰਵਾਉਣ ਤੋਂ ਪਹਿਲਾਂ ਉਸ ਦੀ ਕਰਾਸ ਚੈਕਿੰਗ ਹੋਣੀ ਜਰੂਰੀ ਹੈ, ਕਿਉਂਕਿ ਜੇਕਰ ਉਹ ਬਸਿੰਦਾ ਆਪਣੇ ਸੂਬੇ ਵਿੱਚੋਂ ਹੀ ਪਹਿਲਾਂ ਹੀ ਸਰਕਾਰੀ ਸਕੀਮਾਂ ਦਾ ਲਾਭ ਲੈ ਰਿਹਾ ਹੈ ਅਤੇ ਸੂਬਾ ਪੰਜਾਬ ਵਿੱਚ ਆ ਕੇ ਵੀ ਸਰਕਾਰੀ ਸਕੀਮਾਂ ਦਾ ਦੂਹਰਾ ਲਾਭ ਲੈ ਕੇ ਕਿਸੇ ਲੋੜਵੰਦ ਦੇ ਹੱਕ ਤੇ ਡਾਕਾ ਮਾਰਨ ਬਰਾਬਰ ਕੰਮ ਕਰਦਾ ਹੈ।