ਮਹਿਕ ਰਿਹਾ ਸਾਰਾ ਆਲਮ ਹੈ,
ਅੱਜ ਵਿਸਾਖੀ ਦਾ ਆਗਮ ਹੈ।
ਹਰ ਪਾਸੇ ਮਿਹਰਾਮਤ ਬਰਸੇ,
ਕਿੰਨਾ ਪਿਆਰਾ ਇਹ ਮੌਸਮ ਹੈ।
ਪੌਣਾਂ ਵਿਚ ਸੰਗੀਤ ਲਹਿਰੀਆਂ,
ਨਾਦ ਤੇਰਾ ਕਿੰਨਾ ਸੂਖ਼ਮ ਹੈ।
ਦਿਲ ਦੇ ਵਿਹੜੇ ਚੰਬਾ ਖਿੜਿਆ,
ਸਾਹਾਂ ਵਿਚ ਤੇਰੀ ਸਰਗਮ ਹੈ।
ਇਸ ਦਾ ਇਤਿਹਾਸ ਅਨੋਖਾ,
ਇਸ ਦਿਨ ਦਾ ਵੱਖਰਾ ਹੀ ਦਮ ਹੈ।
ਦਸਮ ਪਿਤਾ ਨੇ ਪੰਥ ਸਾਜਿਆ,
ਅਰਸ਼ਾਂ ਤੱਕ ਜਿਸ ਦਾ ਪਰਚਮ ਹੈ।
ਜਲ੍ਹਿਆਂਵਾਲਾ ਬਾਗ਼ ਦੇਖ ਕੇ,
ਹਰ ਅੱਖੜੀ ਹੋਈ ਪੁਰਨਮ ਹੈ।
ਕਿਰਸਾਣੀ ਦਾ ਦਰਦ ਦੇਖ ਕੇ,
ਨੈਣਾਂ ਵਿਚ ਹੋਈ ਛਮਛਮ ਹੈ।
ਸੁਖ ਵੀ ਤੇਰੇ, ਦੁੱਖ ਵੀ ਤੇਰੇ
ਫੁੱਲ ਤੇਰੇ, ਤੇਰੀ ਸ਼ਬਨਮ ਹੈ।
ਅੰਦਰ ਵੀ ਤੂੰ, ਬਾਹਰ ਵੀ ਤੂੰ,
ਹਰ ਪਾਸੇ ਤੇਰੀ ਰਿਮਝਿਮ ਹੈ।
ਇਸ਼ਕ ਤੇਰਾ ਝਰਨਾਟਾਂ ਛੇੜੇ
ਪਿਆਰ ਤੇਰਾ ਬਣਿਆ ਮਹਿਰਮ ਹੈ।
