ਨਹਿਰੀ ਪਾਣੀ ਦੀ ਬੰਦੀ ਦੇ ਚਲਦਿਆਂ ਖੇਤਰ ਦੇ ਲੋਕ ਪੀਣ ਵਾਲੇ ਪਾਣੀ ਨੂੰ ਤਰਸੇ <br/>

ਬਰੇਟਾ, 7 ਜੂਨ (ਜੀਵਨ ਸ਼ਰਮਾ)- ਖੇਤਰ 'ਚੋਂ ਲੰਘਦੇ ਬੋਹਾ ਰਜਵਾਹੇ 'ਚ ਕਈ ਦਿਨਾਂ ਤੋਂ ਚੱਲ ਰਹੀ ਪਾਣੀ ਦੀ ਬੰਦੀ ਕਾਰਨ ਲੋਕਾਂ ਨੂੰ ਪੀਣ ਵਾਲੇ ਪਾਣੀ ਦੀ ਬੂੰਦ-ਬੂੰਦ ਲਈ ਤਰਸਣਾ ਪੈ ਰਿਹਾ ਹੈ | ਦੱਸਣਯੋਗ ਹੈ ਕਿ ਇਲਾਕੇ ਦੇ ਸਾਰੇ ਵਾਟਰ ਵਰਕਸ ਉਕਤ ਰਜਵਾਹੇ 'ਤੇ ਹੀ ਨਿਰਭਰ ਹਨ ਪਰ ਪਾਣੀ ਨਾ ਹੋਣ ਕਾਰਨ ਵਾਟਰ ਵਰਕਸਾਂ ਦੇ ਟੈਂਕ ਪਾਣੀ ਤੋਂ ਸੱਖਣੇ ਹੋ ਗਏ ਹਨ, ਜਿਸ ਕਰ ਕੇ ਲੋਕਾਂ ਨੂੰ ਧਰਤੀ ਹੇਠਲਾ ਮਾੜਾ ਪਾਣੀ ਪੀ ਕੇ ਬਿਮਾਰੀਆਂ ਦਾ ਸ਼ਿਕਾਰ ਹੋਣਾ ਪੈ ਰਿਹਾ ਹੈ | ਲੋਕਾਂ ਦਾ ਕਹਿਣਾ ਹੈ ਕਿ ਗਰਮੀ ਦਾ ਮੌਸਮ ਹੋਣ ਕਾਰਨ ਪਾਣੀ ਦੀ ਸਖ਼ਤ ਲੋੜ ਹੈ ਪਰ ਪਾਣੀ ਦੀ ਬੰਦੀ ਕਾਰਨ ਪੀਣ ਵਾਲੇ ਪਾਣੀ ਤੋਂ ਵੀ ਵਾਂਝਾ ਹੋਣਾ ਪੈ ਰਿਹਾ ਹੈ | ਜ਼ਿਆਦਾਤਰ ਪਿੰਡਾਂ 'ਚ ਲੱਗੇ ਆਰ.ਓ. ਸਿਸਟਮ ਵੀ ਬੰਦ ਪਏ ਹਨ, ਜਿਸ ਕਾਰਨ ਗ਼ਰੀਬ ਵਰਗ ਲਈ ਹੋਰ ਵੀ ਅÏਖਾ ਹੋਇਆ ਪਿਆ ਹੈ |
ਝੋਨੇ ਦੀ ਪਨੀਰੀ ਵੀ ਹੋ ਰਹੀ ਹੈ ਪ੍ਰਭਾਵਿਤ
ਇਸ ਸਮੇਂ ਝੋਨੇ ਦੀ ਪਨੀਰੀ ਵੀ ਨਹਿਰੀ ਪਾਣੀ ਤੋਂ ਬਿਨਾ ਪ੍ਰਭਾਵਿਤ ਹੋ ਰਹੀ ਹੈ | ਗਰਮੀ ਕਾਰਨ ਪਨੀਰੀ ਸੁੱਕ ਰਹੀ ਹੈ ਜਦੋਂ ਕਿ ਨਹਿਰੀ ਪਾਣੀ ਨਾਲ ਪਨੀਰੀ ਦੇ ਵਿਕਾਸ 'ਚ ਵਾਧਾ ਹੁੰਦਾ ਹੈ | ਕਿਸਾਨਾਂ ਨੂੰ ਮਹਿੰਗੇ ਭਾਅ ਦੀਆਂ ਸਪਰੇਆਂ ਦਾ ਸਹਾਰਾ ਲੈਣਾ ਪੈ ਰਿਹਾ ਹੈ | ਲੋਕਾਂ ਦੀ ਜ਼ੋਰਦਾਰ ਮੰਗ ਹੈ ਕਿ ਰਜਵਾਹੇ 'ਚ ਜਲਦ ਪਾਣੀ ਛੱਡਿਆ ਜਾਵੇ |