ਨਾਜਾਇਜ਼ ਮੁਕੱਦਮੇ ਦਰਜ ਕਰਨ ਦੇ ਵਿਰੋਧ 'ਚ ਕਿਸਾਨਾਂ ਡੀ.ਐੱਸ.ਪੀ. ਦਫ਼ਤਰ ਘੇਰਿਆ <br/>

ਚੋਗਾਵਾਂ, 11 ਮਈ (ਗੁਰਵਿੰਦਰ ਸਿੰਘ ਕਲਸੀ)-ਡੀ. ਐੱਸ. ਪੀ. ਰਾਜਾਸਾਂਸੀ ਅਧੀਨ ਆਉਂਦੇ ਪੁਲਿਸ ਥਾਣਿਆਂ ਵਿਚ ਨਾਜਾਇਜ਼ ਮੁਕਦਮੇ ਦਰਜ ਕਰਨ ਦੇ ਰੋਸ ਵਿਚ ਕਿਸਾਨ ਨੌਜਵਾਨ ਸੰਘਰਸ਼ ਕਮੇਟੀ ਪੰਜਾਬ ਦੇ ਸੂਬਾ ਪ੍ਰਧਾਨ ਬਚਿੱਤਰ ਸਿੰਘ ਕੋਟਲਾ ਦੀ ਅਗਵਾਈ ਹੇਠ ਵੱਡੀ ਗਿਣਤੀ ਵਿਚ ਕਿਸਾਨਾਂ ਨੇ ਡੀ. ਐੱਸ. ਪੀ. ਦਫਤਰ ਚੋਗਾਵਾਂ ਦਾ ਘਿਰਾਓ ਕਰਕੇ ਰੋਡ ਜਾਮ ਕੀਤਾ | ਧਰਨੇ ਨੂੰ ਸੰਬੋਧਨ ਕਰਦਿਆਂ ਸੂਬਾ ਪ੍ਰਧਾਨ ਬਚਿੱਤਰ ਸਿੰਘ ਕੋਟਲਾ, ਕੁਲਦੀਪ ਸਿੰਘ ਚਵਿੰਡਾ ਜ਼ਿਲ੍ਹਾ ਜਨਰਲ ਸਕੱਤਰ, ਕੁਲਦੀਪ ਸਿੰਘ ਮੋਹਲੇਕੇ ਆਦਿ ਨੇ ਪੁਲਿਸ ਪ੍ਰਸ਼ਾਸਨ ਖ਼ਿਲਾਫ਼ ਸਖ਼ਤ ਸ਼ਬਦਾਂ ਵਿਚ ਨਾਅਰੇਬਾਜ਼ੀ ਕਰਦਿਆਂ ਕਿਹਾ ਕਿ ਡੀ. ਐੱਸ. ਪੀ. ਦਫਤਰ ਅਧੀਨ ਆਉਂਦੇ ਪੁਲਿਸ ਥਾਣਾ ਰਾਜਾਸਾਂਸੀ, ਲੋਪੋਕੇ, ਭਿੰਡੀ ਸੈਦਾਂ ਤੇ ਪੁਲਿਸ ਚੌਂਕੀਆਂ ਵਿਚ ਪਿੰਡਾਂ ਦੇ ਘੜੰਮ ਚੌਧਰੀਆਂ ਦੀ ਸ਼ਹਿ ਤੇ 15 ਤੋਂ ਉੱਪਰ ਨਾਜਾਇਜ਼ ਮੁਕੱਦਮੇ ਦਰਜ ਕੀਤੇ ਗਏ, ਜਿਸ ਵਿਚ ਪਿੰਡ ਮੋਹਲੇਕੇ ਦੇ ਇਕ ਕਿਸਾਨ ਆਗੂ ਨੂੰ ਗਿ੍ਫਤਾਰ ਕਰਕੇ ਜੇਲ੍ਹ ਵੀ ਭੇਜ ਦਿੱਤਾ ਗਿਆ | ਜਿਸ ਦਾ ਸਾਡੀ ਜਥੇਬੰਦੀ ਵਿਚ ਭਾਰੀ ਰੋਸ ਹੈ | ਉਨ੍ਹਾਂ ਚੇਤਾਵਨੀ ਭਰੇ ਲਹਿਜੇ ਵਿਚ ਕਹਾ ਕਿ ਜੇਕਰ ਪੁਲਿਸ ਪ੍ਰਸ਼ਾਸਨ ਨੇ ਨਾਜਾਇਜ਼ ਕੀਤੇ ਪਰਚੇ ਰੱਦ ਨਾ ਕੀਤੇ ਤਾਂ ਇਹ ਧਰਨਾ ਅਣਮਿਥੇ ਸਮੇਂ ਲਈ ਜਾਰੀ ਰਹੇਗਾ | ਇਸ ਮੌਕੇ ਜ਼ਿਲ੍ਹਾ ਪ੍ਰਧਾਨ ਗੁਰਵਿੰਦਰ ਸਿੰਘ ਮਾਨਾਂਵਾਲਾ, ਬਲਦੇਵ ਸਿੰਘ ਕਲੇਰ ਸੂਬਾ ਜਨਰਲ ਸਕੱਤਰ, ਚਰਨਜੀਤ ਬਾਵਾ ਰਾਮ ਤੀਰਥ, ਹਰਜਾਪ ਸਿੰਘ ਧੌਲ ਸੂਬਾ ਕਮੇਟੀ ਮੈਂਬਰ, ਸੇਵਾ ਸਿੰਘ ਸੌੜੀਆਂ, ਸਰਬਿੰਦਰ ਸਿੰਘ ਬੋਪਾਰਾਏ, ਮਲਕੀਤ ਸਿੰਘ ਕੋਹਾਲੀ, ਰੇਸ਼ਮ ਸਿੰਘ ਚਵਿੰਡਾ, ਸੁਖਦੇਵ ਸਿੰਘ ਤੋਲਾਨੰਗਲ ਤੇ ਸਤਨਾਮ ਸਿੰਘ ਚੂਚਕਵਾਲ ਆਦਿ ਹਾਜ਼ਰ ਸਨ |