ਪਿੰਡ ਪਠਾਨ ਨੰਗਲ ਦੇ ਗ਼ਰੀਬ ਪਰਿਵਾਰ ਦਾ ਕਮਰਾ ਤੇਜ਼ ਹਨੇਰੀ ਕਾਰਨ ਹੋਇਆ ਢਹਿ ਢੇਰੀ

ਚੇਤਨਪੁਰਾ, 16 ਜੂਨ (ਮਹਾਂਬੀਰ ਸਿੰਘ ਗਿੱਲ)-ਪਿੰਡ ਪਠਾਨ ਨੰਗਲ ਦੇ ਵਸਨੀਕ ਗਰੀਬ ਮਜ਼ਦੂਰ ਸੁਖਦੇਵ ਸਿੰਘ ਪੁੱਤਰ ਗੰਗਾ ਰਾਮ ਦਾ ਇਕੋ ਇਕ ਕਮਰਾ ਸੀ ਜੋ ਕਿ ਉਸ ਨੇ ਤੇ ਉਸਦੇ ਪਰਿਵਾਰ ਨੇ ਲੋਕਾਂ ਦੇ ਘਰਾਂ ਵਿਚੋਂ ਮੰਗ ਕੇ ਬੜੀ ਮੁਸ਼ਕਿਲ ਨਾਲ ਬਣਾਇਆ ਸੀ ਪਰ ਬੀਤੇ ਦਿਨੀ ਚੱਲੀ ਤੇਜ ਹਨੇਰੀ ਤੇ ਤੂਫਾਨ ਨਾਲ ਢਹਿ ਢੇਰੀ ਹੋ ਗਿਆ। ਉਸ ਕਮਰੇ ਦੀ ਛੱਤ ਉੱਡ ਕੇ ਦੂਰ ਜਾ ਡਿੱਗੀ ਤੇ ਕੰਧਾਂ ਵੀ ਢਹਿ ਗਈਆਂ। ਸਾਰਾ ਪਰਿਵਾਰ ਅੱਤ ਦੀ ਹਨੇਰੀ ਮੀਂਹ ਝੱਖੜ ਵਿਚ ਬੜੀ ਮੁਸ਼ਕਿਲ ਨਾਲ ਭੱਜ ਕੇ ਬਚਿਆ। ਪਰਿਵਾਰ ਨੇ ਪੰਜਾਬ ਸਰਕਾਰ ਤੇ ਸਮਾਜ ਸੇਵੀ ਸੰਸਥਾਵਾਂ ਕੋਲੋਂ ਮੰਗ ਕੀਤੀ ਹੈ ਕਿ ਉਕਤ ਗਰੀਬ ਤੇ ਲੋੜਵੰਦ ਪਰਿਵਾਰ ਦੀ ਸਾਰ ਲਈ ਜਾਵੇ ਤੇ ਉਨ੍ਹਾਂ ਦਾ ਕਮਰਾ ਬਣਾ ਕੇ ਦੇਣ ਵਿਚ ਮਦਦ ਕੀਤੀ ਜਾਵੇ। ਇਸੇ ਪਿੰਡ ਦੇ ਵਸਨੀਕ ਪ੍ਰੇਮ ਸਿੰਘ ਦੇ ਕਮਰੇ ਦੀ ਛੱਤ ਵੀ ਉੱਡ ਗਈ ਹੈ ਇਹ ਕਮਰਾ ਵੀ ਕੇਂਦਰ ਸਰਕਾਰ ਵਲੋਂ ਬਣਾਇਆ ਗਿਆ ਸੀ ਉਸਦੇ ਢਹਿਣ ਕਾਰਨ ਉਕਤ ਗਰੀਬ ਪਰਿਵਾਰ ਨੂੰ ਆਰਥਿਕ ਸੱਟ ਵੱਜੀ ਹੈ। ਪਿੰਡ ਦੇ ਸਰਪੰਚ ਰਵੇਲ ਸਿੰਘ ਤੇ ਨਗਰ ਨਿਵਾਸੀਆਂ ਨੇ ਮੁਆਵਜ਼ੇ ਦੀ ਮੰਗ ਕੀਤੀ ਹੈ।