ਅੰਬਾਲਾ, 9 ਜੂਨ (ਏਜੰਸੀ)-'ਆਪ' ਦੇ ਕਨਵੀਨਰ ਅਰਵਿੰਦ ਕੇਜਰੀਵਾਲ, ਮੁੱਖ ਮੰਤਰੀ ਭਗਵੰਤ ਮਾਨ ਅਤੇ ਦਿੱਲੀ ਦੀ ਵਿਧਾਇਕਾ ਆਤਿਸ਼ੀ ਨੇ ਮੰਗਲਵਾਰ ਨੂੰ 'ਆਪ' ਗੋਆ ਦੇ ਇੰਚਾਰਜ ਦੀਪਕ ਸਿੰਗਲਾ ਨਾਲ ਮੁਲਾਕਾਤ ਕੀਤੀ, ਜੋ ਕਰੋੜਾਂ ਦੇ ਹਵਾਲਾ ਮਾਮਲੇ 'ਚ ਅੰਬਾਲਾ ਕੇਂਦਰੀ ਜੇਲ੍ਹ 'ਚ ਬੰਦ ਹੈ | 'ਆਪ' ਸੂਤਰਾਂ ਨੇ ਦੱਸਿਆ ਕਿ ਜੇਲ੍ਹ 'ਚ ਪੁਲਿਸ ਦੀ ਤਾਇਨਾਤੀ ਵਿਚਕਾਰ ਇਹ ਮੁਲਾਕਾਤ ਲਗਭਗ ਅੱਧਾ ਘੰਟਾ ਚੱਲੀ | ਮੁਲਾਕਾਤ ਤੋਂ ਬਾਅਦ ਮੀਡੀਆ ਨਾਲ ਗੱਲਬਾਤ ਕਰਦਿਆਂ ਭਗਵੰਤ ਮਾਨ ਨੇ ਸਿੰਗਲਾ ਦੀ ਗਿ੍ਫ਼ਤਾਰੀ ਦੀ ਨਿੰਦਾ ਕੀਤੀ ਤੇ ਇਸਨੂੰ ਰਾਜਨੀਤੀ ਤੋਂ ਪ੍ਰੇਰਿਤ ਕਾਰਵਾਈ ਕਰਾਰ ਦਿੱਤਾ | ਈ.ਡੀ. ਨੇ 18 ਮਈ ਨੂੰ ਓਰੀਐਂਟਲ ਬੈਂਕ ਆਫ਼ ਕਾਮਰਸ 'ਚ 150 ਕਰੋੜ ਰੁਪਏ ਦੇ 'ਘਪਲੇ' ਤੋਂ ਪੈਦਾ ਹੋਏ ਇਕ ਬਹੁ-ਕਰੋੜੀ ਹਵਾਲਾ ਮਾਮਲੇ 'ਚ ਸਿੰਗਲਾ ਨੂੰ ਗਿ੍ਫ਼ਤਾਰ ਕੀਤਾ ਸੀ | ਇਹ ਗਿ੍ਫ਼ਤਾਰੀ ਸਿੰਗਲਾ ਤੇ ਦਿੱਲੀ ਅਤੇ ਗੋਆ 'ਚ ਕਈ ਹਵਾਲਾ ਆਪਰੇਟਰਾਂ ਨਾਲ ਜੁੜੇ ਕਈ ਟਿਕਾਣਿਆਂ 'ਤੇ ਇਕੋ ਸਮੇਂ ਤਲਾਸ਼ੀ ਤੋਂ ਬਾਅਦ ਕੀਤੀ ਗਈ | ਇਹ ਦੋ ਸਾਲਾਂ 'ਚ ਦੂਜੀ ਵਾਰ ਸੀ ਜਦੋਂ ਸਿੰਗਲਾ ਨੂੰ ਸੰਘੀ ਏਜੰਸੀ ਦੁਆਰਾ ਕਾਰਵਾਈ ਦਾ ਸਾਹਮਣਾ ਕਰਨਾ ਪਿਆ | ਈ.ਡੀ. ਨੇ 2024 'ਚ ਉਸ 'ਤੇ ਛਾਪਾ ਮਾਰਿਆ ਸੀ |
