ਨਗਰ ਪੰਚਾਇਤ ਮਹਿਰਾਜ ਦੀ ਸੀਵਰੇਜ ਮੋਟਰ ਚੋਰੀ, 60 ਮੀਟਰ ਤਾਰ ਵੀ ਲੈ ਗਏ ਚੋਰ

ਮਹਿਰਾਜ, 27 ਜੁਲਾਈ (ਸੁਖਪਾਲ ਮਹਿਰਾਜ)-ਨਗਰ ਪੰਚਾਇਤ ਮਹਿਰਾਜ ਦੀ ਸੀਵਰੇਜ ਪ੍ਰਣਾਲੀ ਲਈ ਲੱਗੀ ਡੱਡੂ ਮੋਟਰ ਅਤੇ ਕਰੀਬ 60 ਮੀਟਰ ਬਿਜਲੀ ਦੀ ਤਾਰ ਬੀਤੀ ਰਾਤ ਅਣਪਛਾਤੇ ਵਿਅਕਤੀ ਚੋਰੀ ਕਰਕੇ ਲੈ ਗਏ। ਇਹ ਮੋਟਰ ਨਗਰ ਪੰਚਾਇਤ ਦਫ਼ਤਰ ਤੋਂ ਥੋੜ੍ਹੀ ਦੂਰੀ ’ਤੇ ਮਹਿਰਾਜ–ਰਾਮਪੁਰਾ ਸੜਕ ਕਿਨਾਰੇ ਸਥਿਤ ਮੇਨਹੋਲ ਵਿਚ ਲੱਗੀ ਹੋਈ ਸੀ। ਦੱਸਿਆ ਜਾ ਰਿਹਾ ਹੈ ਕਿ ਤਿੰਨ ਵਿਅਕਤੀ ਕਰੀਬ ਚਾਰ ਮਿੰਟਾਂ ਵਿਚ ਮੋਟਰ ਉਤਾਰ ਕੇ ਲੈ ਗਏ ਅਤੇ ਪਾਈਪ ਨੂੰ ਉਸੇ ਤਰ੍ਹਾਂ ਮੇਨਹੋਲ ਵਿਚ ਰੱਖ ਗਏ, ਤਾਂ ਜੋ ਪਹਿਲੀ ਨਜ਼ਰ ਵਿਚ ਚੋਰੀ ਦਾ ਪਤਾ ਨਾ ਲੱਗੇ। ਘਟਨਾ ਦੀ ਵੀਡੀਓ ਵੀ ਸੋਸ਼ਲ ਮੀਡੀਆ ’ਤੇ ਸਾਹਮਣੇ ਆਈ ਹੈ, ਜਿਸ ਤੋਂ ਬਾਅਦ ਇਲਾਕੇ ਵਿਚ ਇਸ ਚੋਰੀ ਦੀ ਚਰਚਾ ਹੈ।