ਖੰਨਾ, 9 ਮਈ (ਹਰਜਿੰਦਰ ਸਿੰਘ ਲਾਲ)-ਭਗਵੰਤ ਸਿੰਘ ਮਾਨ ਦੀ ਪੰਜਾਬ ਸਰਕਾਰ ਨੇ ਅੱਜ ਕਿਸਾਨਾਂ ਤੇ ਡੇਅਰੀ ਫਾਰਮਰਾਂ ਦੇ ਹੱਕ 'ਚ ਇਤਿਹਾਸਿਕ ਫ਼ੈਸਲਾ ਲਿਆ, ਜਦੋਂ ਪਹਿਲੀ ਵਾਰ ਦੁੱਧ ਦੇ ਰੇਟ ਵਿਚ 20 ਰੁਪਏ ਕਿੱਲੋ ਫੈਟ ਵਿਚ ਵਾਧਾ ਕਰ ਕੇ ਕਿਸਾਨ ਤੇ ਡੇਅਰੀ ਫਾਰਮਰਜ਼ ਦੀ ਬਾਹ ਫੜੀ ਹੈ | ਇਹ ਪ੍ਰਗਟਾਵਾ ਆੜ੍ਹਤੀ ਐਸੋਸੀਏਸ਼ਨ ਪੰਜਾਬ ਦੇ ਸਕੱਤਰ ਤੇ ਲਿਬੜਾ ਮਾਹੀਵਾਲ ਡੇਅਰੀ ਫਾਰਮ ਦੇ ਮਾਲਕ ਯਾਦਵਿੰਦਰ ਸਿੰਘ ਲਿਬੜਾ ਨੇ ਦਾਣਾ ਮੰਡੀ ਖੰਨਾ ਵਿਖੇ ਕੀਤਾ | ਲਿਬੜਾ ਨੇ ਕਿਹਾ ਕਿ ਭਗਵੰਤ ਸਿੰਘ ਮਾਨ ਨੇ ਘਾਟੇ 'ਚ ਚੱਲ ਰਹੇ ਡੇਅਰੀ ਦੇ ਧੰਦੇ ਨੂੰ ਬਚਾ ਲਿਆ ਹੈ | ਪਿਛਲੇ 75 ਸਾਲਾ ਦੇ ਇਤਿਹਾਸ ਵਿਚ ਪਹਿਲੀ ਵਾਰ ਹੋਇਆ ਹੈ | ਦੁੱਧ ਰੇਟ ਵਿਚ ਸਰਕਾਰ ਨੇ ਭਾਰੀ ਵਾਧਾ ਕੀਤਾ ਗਿਆ ਹੋਵੇ | ਇਸ ਫ਼ੈਸਲੇ ਨਾਲ ਹੋਰ ਨੌਜਵਾਨ ਡੇਅਰੀ ਦੇ ਧੰਦੇ ਨਾਲ ਜੁੜਨਗੇ ਤੇ ਪੰਜਾਬ ਵਿਚ ਬੇਰੁਜ਼ਗਾਰੀ ਘਟੇਗੀ | ਉਨ੍ਹਾਂ ਕਿਹਾ ਕਿ ਦੁੱਧ ਦੀ ਪੰਜਾਬ ਵਿਚ ਬਹੁਤ ਘਾਟ ਹੈ | ਇਸ ਕਾਰਨ ਨਕਲੀ ਦੁੱਧ ਵੀ ਬਹੁਤ ਬਣ ਰਿਹਾ ਹੈ | ਇਸ ਫ਼ੈਸਲੇ ਨਾਲ ਡੇਅਰੀ ਫਾਰਮਰ ਹੋਰ ਜ਼ਿਆਦਾ ਦੁੱਧ ਪੈਦਾ ਕਰਨਗੇ |
