ਹੰਡਿਆਇਆ, 31 ਮਈ (ਗੁਰਜੀਤ ਸਿੰਘ ਖੁੱਡੀ)-ਹੰਡਿਆਇਆ ਦੇ ਵਾਰਡ ਨੰਬਰ 5 ਅਤੇ ਵਾਰਡ ਨੰਬਰ 10 ਦੇ ਮੁੱਖ ਬਾਜ਼ਾਰ ਵਿਚ ਨਾਲੀਆਂ ਦਾ ਗੰਦਾ ਪਾਣੀ ਦਰਵਾਜ਼ੇ ਤੋਂ ਲੈ ਕੇ ਬੈਂਕ ਤੱਕ ਸੜਕ 'ਤੇ ਰੋਜ਼ਾਨਾ ਖੜ੍ਹਨ ਕਰ ਕੇ ਰਾਹਗੀਰ ਅਤੇ ਕਸਬਾ ਵਾਸੀ ਪ੍ਰੇਸ਼ਾਨ ਹਨ | ਪਿਛਲੇ ਕਾਫ਼ੀ ਸਮੇਂ ਤੋਂ ਨਾਲੀਆਂ ਦਾ ਗੰਦਾ ਪਾਣੀ ਦਰਵਾਜ਼ੇ ਤੋਂ ਲੈ ਕੇ ਬੈਂਕ ਤੱਕ ਸੜਕ ਉਪਰ ਹੀ ਖੜ੍ਹਾ ਰਹਿੰਦਾ ਹੈ | ਜਿੱਥੋਂ ਰੋਜ਼ਾਨਾ ਸਕੂਲੀ ਵਿਦਿਆਰਥੀ, ਬੈਂਕ ਆਉਣ ਜਾਣ ਵਾਲੇ, ਗੁਰਦੁਆਰਾ ਸਾਹਿਬ, ਮੰਦਰ, ਮਸਜਿਦ ਅਤੇ ਰਾਹਗੀਰ ਵੱਡੀ ਗਿਣਤੀ ਵਿਚ ਇਹ ਮੁੱਖ ਰਸਤਾ ਹੋਣ ਕਰ ਕੇ ਇੱਥੋਂ ਹੀ ਲੰਘਦੇ ਹਨ ਜਿੱਥੋਂ ਕਿ ਲੰਘਣਾ ਬਹੁਤ ਮੁਸ਼ਕਲ ਹੁੰਦਾ ਹੈ | ਵਾਰਡ ਨੰ: 5 ਦੇ ਐਮ.ਸੀ. ਅਤੇ ਵਾਰਡ ਨੰ: 10 ਦੇ ਐਮ.ਸੀ. ਅਤੇ ਸਕੂਲ ਦੇ ਸਾਹਮਣੇ ਐਮ.ਸੀ. ਦੀ ਦੁਕਾਨ ਹੋਣ ਦੇ ਬਾਵਜੂਦ ਨਗਰ ਪੰਚਾਇਤ ਹੰਡਿਆਇਆ ਦੇ ਸਫ਼ਾਈ ਸੇਵਕ ਨਾਲੀਆਂ ਆਦਿ ਸਫ਼ਾਈ ਕਰਨ ਨੂੰ ਤਰਜੀਹ ਨਹੀਂ ਦਿੰਦੇ ਅਤੇ ਨਾ ਹੀ ਇਨ੍ਹਾਂ ਕੌਂਸਲਰਾਂ ਅਤੇ ਕਾਰਜ ਸਾਧਕ ਅਫ਼ਸਰ ਹੰਡਿਆਇਆ ਦੇ ਹੁਕਮਾਂ ਦੀ ਪ੍ਰਵਾਹ ਕਰਦੇ ਹਨ | ਇੱਥੋਂ ਤੱਕ ਕਿ ਇੱਥੋਂ ਪ੍ਰਸ਼ਾਸਨਿਕ ਅਧਿਕਾਰੀ ਵੀ ਲੰਘਦੇ ਰਹਿੰਦੇ ਹਨ, ਜਿਨ੍ਹਾਂ ਦਾ ਇਸ ਪਾਣੀ ਵੱਲ ਉੱਕਾ ਹੀ ਧਿਆਨ ਨਹੀਂ ਜਾਂਦਾ | ਮੁਹੱਲਾ ਨਿਵਾਸੀਆਂ ਅਤੇ ਰਾਹਗੀਰਾਂ ਨੇ ਡਿਪਟੀ ਕਮਿਸ਼ਨਰ ਬਰਨਾਲਾ ਤੋਂ ਮੰਗ ਕੀਤੀ ਕਿ ਇੱਥੇ ਮੇਨ ਗਲੀ ਵਿਚ ਲੰਬੇ ਤੋਂ ਖੜ੍ਹਦੇ ਪਾਣੀ ਦਾ ਹੱਲ ਕਰਵਾਇਆ ਜਾਵੇ |
