ਲੰਡਨ, 8 ਜੁਲਾਈ (ਏਜੰਸੀ)-39 ਸਾਲਾ ਨੋਵਾਕ ਜੋਕੋਵਿਚ ਵਿੰਬਲਡਨ ਇਤਿਹਾਸ ’ਚ ਸਭ ਤੋਂ ਲੰਬਾ ਪੁਰਸ਼ ਸਿੰਗਲਜ਼ ਕੁਆਰਟਰ ਫਾਈਨਲ ਜਿੱਤਣ ਵਾਲਾ ਖਿਡਾਰੀ ਬਣ ਗਏ ਹਨ। ਉਸਨੇ ਆਲ ਇੰਗਲੈਂਡ ਕਲੱਬ ਵਿਖੇ ਸੈਂਟਰ ਕੋਰਟ ’ਤੇ 5 ਘੰਟੇ ਅਤੇ 15 ਮਿੰਟਾਂ ’ਚ ਕੈਨੇਡਾ ਦੇ ਫੇਲਿਕਸ ਔਗਰ-ਅਲਿਆਸੀਮ ਨੂੰ 7-6 (10), 3-6, 6-3, 6-7 (4), 7-6 (4) ਨਾਲ ਹਰਾਇਆ। ਮੈਚ ਦਾ ਫੈਸਲਾ ਪੰਜਵੇਂ ਸੈੱਟ ਦੇ ਸੁਪਰ ਟਾਈ-ਬ੍ਰੇਕ ਵਿਚ ਹੋਇਆ। 2008 ’ਚ ਰੇਨਰ ਸ਼ੂਟਲਰ ਤੇ ਅਰਨੋ ਕਲੇਮੈਂਟ ਵਿਚਕਾਰ ਪਿਛਲਾ ਕੁਆਰਟਰ ਫਾਈਨਲ 5 ਘੰਟੇ ਅਤੇ 12 ਮਿੰਟ ਚੱਲਿਆ। ਜੋਕੋਵਿਚ ਓਪਨ ਯੁੱਗ ’ਚ ਸਭ ਤੋਂ ਵੱਧ ਪੰਜ-ਸੈੱਟ ਗ੍ਰੈਂਡ ਸਲੈਮ ਮੈਚ ਖੇਡਣ ਵਾਲਾ ਖਿਡਾਰੀ ਵੀ ਬਣ ਗਿਆ ਹੈ। ਉਸਨੇ ਆਪਣੇ ਗ੍ਰੈਂਡ ਸਲੈਮ ਕਰੀਅਰ ਦਾ ਆਪਣਾ 50ਵਾਂ ਪੰਜ-ਸੈੱਟ ਸਿੰਗਲਜ਼ ਮੈਚ ਖੇਡ ਕੇ ਸਵਿਟਜ਼ਰਲੈਂਡ ਦੇ ਸਟੈਨ ਵਾਵਰਿੰਕਾ (49 ਵਾਰ) ਦੇ ਰਿਕਾਰਡ ਨੂੰ ਤੋੜਿਆ। ਉਹ ਇਕ ਸਿੰਗਲ ਗ੍ਰੈਂਡ ਸਲੈਮ ’ਚ 15 ਪੁਰਸ਼ ਸਿੰਗਲਜ਼ ਸੈਮੀਫਾਈਨਲ ਖੇਡਣ ਵਾਲਾ ਓਪਨ ਯੁੱਗ ’ਚ ਤੀਜਾ ਖਿਡਾਰੀ ਵੀ ਬਣ ਗਿਆ। ਰੋਜਰ ਫੈਡਰਰ ਨੇ ਆਸਟ੍ਰੇਲੀਅਨ ਓਪਨ ’ਚ ਤੇ ਰਾਫੇਲ ਨਡਾਲ ਨੇ ਫ੍ਰੈਂਚ ਓਪਨ ਵਿਚ ਇਹ ਉਪਲਬਧੀ ਹਾਸਲ ਕੀਤੀ ਸੀ।
