ਅਥਲੈਟਿਕਸ ਅਤੇ ਪੈਰਾ ਤੈਰਾਕੀ ’ਚ ਭਾਰਤ ਦਾ ਸ਼ਾਨਦਾਰ ਪ੍ਰਦਰਸ਼ਨ ਜਾਰੀ

ਗਲਾਸਗੋ, 29 ਜੁਲਾਈ (ਹਰਜੀਤ ਸਿੰਘ ਦੁਸਾਂਝ ਪੁਆਦੜਾ)-ਐਥਲੈਟਿਕਸ ਅਤੇ ਪੈਰਾ ਤੈਰਾਕੀ ’ਚ ਭਾਰਤ ਦਾ ਸ਼ਾਨਦਾਰ ਪ੍ਰਦਰਸ਼ਨ ਜਾਰੀ ਹੈ। ਜਦਕਿ ਵੇਟਲਿਫਟਿੰਗ ਤੇ ਤੈਰਾਕੀ ’ਚ ਨਿਰਾਸ਼ਾ ਦਾ ਸਾਹਮਣਾ ਕਰਨਾ ਪਿਆ। ਐਥਲੈਟਿਕਸ ’ਚ ਭਾਰਤ ਦੇ ਅਨਿਮੇਸ਼ ਕੁਜੂਰ ਨੇ ਪੁਰਸ਼ਾਂ ਦੀ 200 ਮੀਟਰ ਦੌੜ ਦੇ ਪਹਿਲੇ ਗੇੜ ’ਚ 20.46 ਸਕਿੰਟ ਦਾ ਸੀਜ਼ਨ ਦਾ ਸਰਵੋਤਮ ਸਮਾਂ ਕੱਢਦਿਆਂ ਆਪਣੀ ਹੀਟ ’ਚ ਪਹਿਲਾ ਸਥਾਨ ਹਾਸਲ ਕੀਤਾ ਤੇ ਭਰੋਸੇਮੰਦ ਅੰਦਾਜ਼ ’ਚ ਸੈਮੀਫਾਈਨਲ ਲਈ ਕੁਆਲੀਫਾਈ ਕਰ ਲਿਆ। ਸ਼ਾਟ ਪੁੱਟ ’ਚ ਭਾਰਤ ਲਈ ਦੋਹਰੀ ਖੁਸ਼ੀ ਰਹੀ। ਤਜਿੰਦਰਪਾਲ ਸਿੰਘ ਤੂਰ ਨੇ ਗਰੁੱਪ-ਏ ’ਚ 20.14 ਮੀਟਰ ਦੀ ਥ੍ਰੋ ਨਾਲ ਦੂਜਾ ਸਥਾਨ ਹਾਸਲ ਕਰਕੇ ਸਿੱਧਾ ਫਾਈਨਲ ’ਚ ਜਗ੍ਹਾ ਬਣਾਈ, ਜਦਕਿ ਸਤਿੰਦਰਪਾਲ ਸਿੰਘ ਗਿੱਲ ਨੇ ਗਰੁੱਪ-ਬੀ ਵਿੱਚ 19.95 ਮੀਟਰ ਦੀ ਥ੍ਰੋ ਨਾਲ ਦੂਜਾ ਸਥਾਨ ਹਾਸਲ ਕਰਦਿਆਂ ਫਾਈਨਲ ਲਈ ਕੁਆਲੀਫਾਈ ਕਰ ਲਿਆ। ਹੁਣ ਦੋਵੇਂ ਭਾਰਤੀ ਗੋਲਾ ਸੁੱਟ ਖਿਡਾਰੀਆਂ ਤੋਂ ਤਗਮੇ ਦੀਆਂ ਉਮੀਦਾਂ ਵਧ ਗਈਆਂ ਹਨ। ਪੈਰਾ ਤੈਰਾਕੀ ਵਿਚ ਵੀ ਭਾਰਤ ਨੇ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ। ਪੁਰਸ਼ਾਂ ਦੀ 50 ਮੀਟਰ ਫ੍ਰੀਸਟਾਈਲ ਐਸ7 ਹੀਟਸ ’ਚ ਚੈਤਨਿਆ ਵਿਸ਼ਵਾਸ ਕੁਲਕਰਨੀ (32.77 ਸਕਿੰਟ) ਤੇ ਸੁਯਸ਼ ਨਾਰਾਇਣ ਜਾਧਵ (35.35 ਸਕਿੰਟ) ਨੇ ਆਪਣੀਆਂ ਹੀਟਾਂ ’ਚ ਕ੍ਰਮਵਾਰ ਚੌਥਾ ਤੇ ਛੇਵਾਂ ਸਥਾਨ ਹਾਸਲ ਕਰਦਿਆਂ ਫਾਈਨਲ ਲਈ ਕੁਆਲੀਫਾਈ ਕਰ ਲਿਆ।