ਨਿਊਯਾਰਕ, 22 ਜੂਨ (ਰਾਜੂ ਸਹਿਬਾਜ਼ਪੁਰਾ)-ਨਿਊ ਜਰਸੀ ਤੋਂ ਉਡਾਣ ਭਰਨ ਵਾਲਾ ਇਕ ਛੋਟਾ ਸਿੰਗਲ-ਇੰਜਣ ਜਹਾਜ਼ ਮੈਰੀਲੈਂਡ ’ਚ ਹਾਦਸਾਗ੍ਰਸਤ ਹੋ ਗਿਆ, ਜਿਸ ਕਾਰਨ ਪਾਇਲਟ ਸਮੇਤ ਤਿੰਨ ਵਿਅਕਤੀਆਂ ਦੀ ਮੌਤ ਹੋ ਗਈ। ਮੈਰੀਲੈਂਡ ਸਟੇਟ ਪੁਲਿਸ ਨੇ ਐਤਵਾਰ ਨੂੰ ਇਸ ਦੀ ਪੁਸ਼ਟੀ ਕਰਦੇ ਕਿਹਾ ਕਿ ਪਾਈਪਰ ਚੇਰੋਕੀ ਜਹਾਜ਼ ਸ਼ਨੀਵਾਰ ਰਾਤ ਨਿਊ ਜਰਸੀ ਦੇ ਓਸ਼ਨ ਸਿਟੀ ਤੋਂ ਉਡਿਆ ਸੀ ਤੇ ਇਸ ਨੇ ਗੈਥਰਜ਼ਬਰਗ, ਮੈਰੀਲੈਂਡ ਸਥਿਤ ਮੋਂਟਗੋਮਰੀ ਕਾਊਂਟੀ ਏਅਰ ਪਾਰਕ ’ਤੇ ਉਤਰਨਾ ਸੀ। ਪਰ ਮੰਜ਼ਿਲ ਤੋਂ ਲਗਭਗ 30 ਮੀਲ ਪਹਿਲਾਂ ਹੀ ਇਹ ਜਹਾਜ਼ ਬੋਵੀ ਸ਼ਹਿਰ ਦੇ ਇਕ ਜੰਗਲੀ ਇਲਾਕੇ ’ਚ ਡਿੱਗ ਗਿਆ। ਜਹਾਜ਼ ਹਾਦਸੇ ਦੀ ਸੂਚਨਾ ਮਿਲਦੇ ਹੀ ਬਚਾਅ ਦਲਾਂ ਨੇ ਜ਼ਮੀਨੀ ਅਤੇ ਹਵਾਈ ਤਲਾਸ਼ੀ ਮੁਹਿੰਮ ਸ਼ੁਰੂ ਕੀਤੀ। ਉਨ੍ਹਾਂ ਦੱਸਿਆ ਕਿ ਮੌਕੇ ’ਤੇ ਹੀ ਤਿੰਨਾਂ ਵਿਅਕਤੀਆਂ ਨੂੰ ਮ੍ਰਿਤਕ ਘੋਸ਼ਿਤ ਕਰ ਦਿੱਤਾ ਗਿਆ। ਮ੍ਰਿਤਕਾਂ ਦੀ ਪਛਾਣ ਅਜੇ ਜਾਰੀ ਨਹੀਂ ਕੀਤੀ ਗਈ।
