ਆਪਣੀ ਦੋ ਸਾਲਾ ਧੀ ਨੂੰ ਬਾਲਗਾਂ ਦੀਆਂ ਦਵਾਈਆਂ ਦੇ ਕੇ ਮਾਰਨ ਦੀ ਕੋਸ਼ਿਸ਼, ਮਾਂ ਨੂੰ ਉਮਰ ਕੈਦ

ਅ

ਅਜੀਤ ਡੈਸਕ 18-08-2026

ਗਲਾਸਗੋ, 17 ਅਗਸਤ (ਹਰਜੀਤ ਸਿੰਘ ਦੁਸਾਂਝ)-ਸਕਾਟਲੈਂਡ ਵਿਚ ਆਪਣੀ ਦੋ ਸਾਲਾ ਧੀ ਨੂੰ ਵਾਰ-ਵਾਰ ਬਾਲਗਾਂ ਲਈ ਵਰਤੀਆਂ ਜਾਣ ਵਾਲੀਆਂ ਦਵਾਈਆਂ ਦੇ ਕੇ ਮਾਰਨ ਦੀ ਕੋਸ਼ਿਸ਼ ਕਰਨ ਵਾਲੀ 35 ਸਾਲਾ ਲੌਰਾ ਡੌਕਰਟੀ ਨੂੰ ਉਮਰ ਕੈਦ ਦੀ ਸਜ਼ਾ ਸੁਣਾਈ ਗਈ ਹੈ। ਐਡਿਨਬਰਾ ਹਾਈ ਕੋਰਟ ਨੇ ਉਸ ਉੱਤੇ ‘ਉਮਰ ਭਰ ਦੀ ਪਾਬੰਦੀ ਦਾ ਆਦੇਸ਼’ ਦਿੰਦਿਆਂ ਘੱਟੋ-ਘੱਟ ਛੇ ਸਾਲ ਜੇਲ੍ਹ ਵਿੱਚ ਰਹਿਣ ਦਾ ਹੁਕਮ ਦਿੱਤਾ ਹੈ। ਸਕਾਟਲੈਂਡ ਦੇ ਫਾਈਫ ਕਾਉਟੀ ਦੇ ਗਲੇਨਰੋਥਸ ਦੀ ਰਹਿਣ ਵਾਲੀ ਡੌਕਰਟੀ ਨੇ ਅਪ੍ਰੈਲ 2021 ਤੋਂ ਫਰਵਰੀ 2023 ਦਰਮਿਆਨ ਬੱਚੀ ਨੂੰ ਐਮੀਟ੍ਰਿਪਟਾਈਲਾਈਨ, ਪ੍ਰੋਪ੍ਰੈਨੋਲੋਲ ਅਤੇ ਡਾਇਹਾਈਡ੍ਰੋਕੋਡੀਨ ਵਰਗੀਆਂ ਦਵਾਈਆਂ ਦਿੱਤੀਆਂ। ਇਸ ਕਾਰਨ ਬੱਚੀ ਨੂੰ ਦੌਰੇ ਪਏ, ਬੇਹੋਸ਼ ਹੋਈ ਅਤੇ ਇੱਕ ਮੌਕੇ ਉਸਦੀ ਜਾਨ ਬਚਾਉਣ ਲਈ ਉਸਨੂੰ ਵੈਂਟੀਲੇਟਰ ’ਤੇ ਰੱਖਣਾ ਪਿਆ। ਜੱਜ ਮਾਈਕਲ ਓ’ਗ੍ਰੇਡੀ ਨੇ ਇਸ ਅਪਰਾਧ ਨੂੰ ਬੇਹੱਦ ਘਿਨਾਉਣਾ ਦੱਸਦਿਆਂ ਕਿਹਾ ਕਿ ਡੌਕਰਟੀ ਨੇ ਇਹ ਸਭ ਧਿਆਨ ਖਿੱਚਣ ਅਤੇ ਨਾਟਕੀ ਸਥਿਤੀ ਪੈਦਾ ਕਰਨ ਲਈ ਕੀਤਾ। ਇੱਕ ਮੌਕੇ ਬੱਚੀ ਮੌਤ ਦੇ ਬਹੁਤ ਨੇੜੇ ਪਹੁੰਚ ਗਈ ਸੀ ਅਤੇ ਪੈਰਾਮੈਡਿਕ ਉਸਦੀ ਜਾਨ ਬਚਾ ਰਿਹਾ ਸੀ, ਜਦਕਿ ਡੌਕਰਟੀ ਘਟਨਾ ਨੂੰ ਆਪਣੇ ਫੋਨ ’ਤੇ ਫਿਲਮਾ ਰਹੀ ਸੀ। ਡੌਕਰਟੀ ਨੇ ਦੋਸ਼ ਤੋਂ ਇਨਕਾਰ ਕੀਤਾ ਸੀ, ਪਰ ਜਿਊਰੀ ਨੇ ਉਸਨੂੰ ਸਰਬਸੰਮਤੀ ਨਾਲ ਕਤਲ ਦੀ ਕੋਸ਼ਿਸ਼ ਲਈ ਦੋਸ਼ੀ ਠਹਿਰਾਇਆ। ਛੇ ਸਾਲ ਪੂਰੇ ਹੋਣ ਤੋਂ ਬਾਅਦ ਵੀ ਉਸਦੀ ਪੈਰੋਲ ਆਪਣੇ ਆਪ ਨਹੀਂ ਹੋਵੇਗੀ, ਉਸਦੀ ਰਿਹਾਈ ਦਾ ਫੈਸਲਾ ਖ਼ਤਰੇ ਦੇ ਮੁਲਾਂਕਣ ਤੋਂ ਬਾਅਦ ਸਕਾਟਿਸ਼ ਪੈਰੋਲ ਬੋਰਡ ਕਰੇਗਾ।

ਪਿਛਲੀ ਖ਼ਬਰ ਸੰਤ ਬਾਬਾ ਲਖਵੀਰ ਸਿੰਘ ਰਤਵਾੜਾ ਸਾਹਿਬ ਵਾਲਿਆਂ ਦਾ ਸਿਡਨੀ ਵਿਖੇ ਵਿਸ਼ੇਸ਼ ਸਨਮਾਨ ਅਗਲੀ ਖ਼ਬਰ ਹਾਰਮੁਜ਼ ਖੋਲ੍ਹਣ ਲਈ ਓਮਾਨ ਵਿਰੁੱਧ ਵੀ ਫ਼ੌਜੀ ਕਾਰਵਾਈ ਤੋਂ ਪਿੱਛੇ ਨਹੀਂ ਹਟਾਂਗੇ: ਟਰੰਪ — ਇਰਾਨ ਨਾਲ ਸਮਝੌਤੇ ਦੀ 60 ਦ...