ਟਰੰਪ ਵੱਲੋਂ 10 ਸਾਲਾ ਬੱਚੇ ਨੂੰ ਬਚਾਉਣ ਵਾਲੇ ਲਾਈਫਗਾਰਡ ਦਾ ਸਨਮਾਨ

ਸੈਕਰਾਮੈਂਟੋ, 21 ਅਗਸਤ (ਹੁਸਨ ਲੜੋਆ ਬੰਗਾ)-ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਵਾਈਟ ਹਾਊਸ ਵਿਖੇ 16 ਸਾਲਾ ਕੈਲੀਫੋਰਨੀਆ ਦੇ ਲਾਈਫਗਾਰਡ ਰਾਈਡਰ ਵਿਲੀਅਮਜ਼ ਨੂੰ ਸਾਂਤਾ ਕਰੂਜ਼ ਦੇ ਸੀਬ੍ਰਾਈਟ ਬੀਚ ’ਤੇ ਖਤਰਨਾਕ ਲਹਿਰਾਂ ਤੋਂ 10 ਸਾਲਾ ਨਥਾਨਿਏਲ ਰਾਏ ਨੂੰ ਬਚਾਉਣ ਲਈ ਸਨਮਾਨਿਤ ਕੀਤਾ| ਨਾਟਕੀ ਬਚਾਅ ਦੇ ਵਿਆਪਕ ਧਿਆਨ ਖਿੱਚਣ ਤੋਂ ਹਫ਼ਤਿਆਂ ਬਾਅਦ ਨਥਾਨਿਏਲ ਅਤੇ ਉਸ ਦਾ ਪਰਿਵਾਰ ਵਾਈਟ ਹਾਊਸ ਵਿਖੇ ਵਿਲੀਅਮਜ਼ ਅਤੇ ਉਸ ਦੇ ਪਰਿਵਾਰ ਨਾਲ ਸਮਾਗਮ ਵਿਚ ਸ਼ਾਮਲ ਹੋਏ| ਟਰੰਪ ਨੇ ਵਿਲੀਅਮਜ਼ ਦੀ ਹਿੰਮਤ ਅਤੇ ਸਿਖਲਾਈ ਲਈ ਪ੍ਰਸ਼ੰਸਾ ਕੀਤੀ | ਰਾਸ਼ਟਰਪਤੀ ਨੇ ਵਿਲੀਅਮਜ਼ ਦੀ ਸ਼ਲਾਘਾ ਕਰਦਿਆਂ ਕਿਹਾ ਕਿ ਉਸ ਨੇ ਕਈ ਵਾਰ ਬਚਾਅ ਦੀ ਫੁਟੇਜ ਦੇਖੀ ਹੈ| ਨਥਾਨਿਏਲ ਦੇ ਪਿਤਾ, ਸੁਮਿਤ ਰਾਏ ਨੇ ਵਿਲੀਅਮਜ਼ ਅਤੇ ਬਚਾਅ ਦੌਰਾਨ ਮਦਦ ਕਰਨ ਵਾਲੇ ਹੋਰ ਲੋਕਾਂ ਦਾ ਧੰਨਵਾਦ ਕੀਤਾ, ਜਿਨਾਂ ਵਿੱਚ ਉਨਾਂ ਦੀ ਮਦਦ ਲਈ ਆਏ ਰਾਹਗੀਰ ਵੀ ਸ਼ਾਮਲ ਸਨ| ਬਚਾਅ ਤੋਂ ਬਾਅਦ ਰਾਏ ਨੇ ਵਿਲੀਅਮਜ਼ ਅਤੇ ਉਸ ਦੇ ਪਰਿਵਾਰ ਤੱਕ ਪਹੁੰਚਣ ਦੀ ਕੋਸ਼ਿਸ਼ ਕੀਤੀ ਤਾਂ ਜੋ ਉਹ ਨਿੱਜੀ ਤੌਰ ’ਤੇ ਧੰਨਵਾਦ ਕਰ ਸਕਣ| ਰਾਏ ਨੇ ਕਿਹਾ ਕਿ ਵਿਲੀਅਮਜ਼ ਆਪਣੀ ਬਹਾਦਰੀ ਲਈ ਹਰ ਸੰਭਵ ਸਨਮਾਨ ਦੇ ਹੱਕਦਾਰ ਹਨ|