3.5 ਕਰੋੜ ਡਾਲਰ ਦੀ ਪੋਂਜ਼ੀ ਧੋਖਾਧੜੀ ਮਾਮਲੇ ’ ਚ ਭਾਰਤੀ ਮੂਲ ਦੇ ਵਿਅਕਤੀ ਨੂੰ 11 ਸਾਲ ਕੈਦ - ਟ੍ਰੈਵਿਸ ਕੇਲਸੀ ਵੀ 64 ਪੀੜਤਾਂ ’ ਚ ਸ਼ਾਮਿਲ
ਨਿਊਯਾਰਕ/ਸੈਕਰਾਮੈਂਟੋ, 18 ਸਤੰਬਰ (ਰਾਜੂ ਸ਼ਹਿਬਾਜ਼ਪੁਰਾ, ਹੁਸਨ ਲੜੋਆ ਬੰਗਾ)-ਅਮਰੀਕਾ ਵਿਚ 3. 5 ਕਰੋੜ ਡਾਲਰ ਤੋਂ ਵੱਧ ਦੀ ਪੋਂਜ਼ੀ ਨਿਵੇਸ਼ ਧੋਖਾਧੜੀ ਦੇ ਮਾਮਲੇ ਵਿਚ ਭਾਰਤੀ ਮੂਲ ਦੇ 38 ਸਾਲਾ ਸਿਧਾਰਥ ਜਵਾਹਰ ਨੂੰ 11 ਸਾਲ ਦੀ ਸੰਘੀ ਕੈਦ ਦੀ ਸਜ਼ਾ ਸੁਣਾਈ ਗਈ ਹੈ।
ਨਿਊਯਾਰਕ/ਸੈਕਰਾਮੈਂਟੋ, 18 ਸਤੰਬਰ (ਰਾਜੂ ਸ਼ਹਿਬਾਜ਼ਪੁਰਾ, ਹੁਸਨ ਲੜੋਆ ਬੰਗਾ)-ਅਮਰੀਕਾ ਵਿਚ 3.5 ਕਰੋੜ ਡਾਲਰ ਤੋਂ ਵੱਧ ਦੀ ਪੋਂਜ਼ੀ ਨਿਵੇਸ਼ ਧੋਖਾਧੜੀ ਦੇ ਮਾਮਲੇ ਵਿਚ ਭਾਰਤੀ ਮੂਲ ਦੇ 38 ਸਾਲਾ ਸਿਧਾਰਥ ਜਵਾਹਰ ਨੂੰ 11 ਸਾਲ ਦੀ ਸੰਘੀ ਕੈਦ ਦੀ ਸਜ਼ਾ ਸੁਣਾਈ ਗਈ ਹੈ। ਮਿਸੂਰੀ ਦੇ ਸੇਂਟ ਲੂਇਸ ਦੀ ਸੰਘੀ ਅਦਾਲਤ ਨੇ ਉਸ ਨੂੰ ਪੀੜਤਾਂ ਨੂੰ 31.35 ਮਿਲੀਅਨ ਡਾਲਰ ਵਾਪਸ ਕਰਨ ਦਾ ਹੁਕਮ ਵੀ ਦਿੱਤਾ ਹੈ। ਇਸ ਮਾਮਲੇ ਦੇ 64 ਪੀੜਤਾਂ ਵਿਚ ਕੈਨਸਸ ਸਿਟੀ ਚੀਫ਼ਸ ਦੇ ਮਸ਼ਹੂਰ ਖਿਡਾਰੀ ਟ੍ਰੈਵਿਸ ਕੇਲਸੀ ਦਾ ਨਾਂ ਵੀ ਸ਼ਾਮਿਲ ਹੈ।ਸਰਕਾਰੀ ਵਕੀਲਾਂ ਮੁਤਾਬਕ ਜਵਾਹਰ ਟੈਕਸਸ ਸਥਿਤ ਨਿਵੇਸ਼ ਕੰਪਨੀ ਸਵਿਫਟਆਰਕ ਕੈਪੀਟਲ ਚਲਾਉਂਦਾ ਸੀ। ਉਸ ਨੇ 2015 ਵਿਚ ਗਾਹਕਾਂ ਦਾ ਪੈਸਾ ਫਿਲਿਪ ਮੌਰਿਸ ਪਾਕਿਸਤਾਨ ਵਿੱਚ ਲਗਾਉਣਾ ਸ਼ੁਰੂ ਕੀਤਾ ਅਤੇ ਬਾਅਦ ਵਿੱਚ ਗਾਹਕਾਂ ਦੇ ਕਰੀਬ 99 ਫੀਸਦੀ ਫੰਡ ਇਸੇ ਇੱਕ ਨਿਵੇਸ਼ ਵਿੱਚ ਕੇਂਦਰਿਤ ਹੋ ਗਏ। ਜਦੋਂ ਇਸ ਨਿਵੇਸ਼ ਦੀ ਕੀਮਤ ਡਿੱਗੀ ਤਾਂ ਨਿਵੇਸ਼ਕਾਂ ਨੂੰ ਨੁਕਸਾਨ ਬਾਰੇ ਦੱਸਣ ਦੀ ਬਜਾਏ ਉਨ੍ਹਾਂ ਨੂੰ ਮੁਨਾਫ਼ਾ ਹੋਣ ਦੀ ਗਲਤ ਜਾਣਕਾਰੀ ਦਿੱਤੀ ਜਾਂਦੀ ਰਹੀ।ਅਧਿਕਾਰੀਆਂ ਅਨੁਸਾਰ ਜੁਲਾਈ 2016 ਤੋਂ ਦਸੰਬਰ 2023 ਤੱਕ ਜਵਾਹਰ ਨੇ ਨਿਵੇਸ਼ਕਾਂ ਤੋਂ 35 ਮਿਲੀਅਨ ਡਾਲਰ ਤੋਂ ਵੱਧ ਇਕੱਠੇ ਕੀਤੇ, ਪਰ ਇਸ ਵਿੱਚੋਂ ਸਿਰਫ਼ ਕਰੀਬ 10 ਮਿਲੀਅਨ ਡਾਲਰ ਹੀ ਅਸਲ ਵਿੱਚ ਨਿਵੇਸ਼ ਕੀਤੇ। ਕੁਝ ਗਾਹਕਾਂ ਨੂੰ ਇਹ ਵੀ ਦੱਸਿਆ ਗਿਆ ਕਿ ਉਨ੍ਹਾਂ ਦਾ ਪੈਸਾ ਖਾਸ ਕੰਪਨੀਆਂ ਵਿੱਚ ਲਗਾਇਆ ਗਿਆ ਹੈ, ਜਦਕਿ ਉਹ ਨਿਵੇਸ਼ ਕੀਤੇ ਹੀ ਨਹੀਂ ਗਏ ਸਨ।ਜਦੋਂ ਪੁਰਾਣੇ ਨਿਵੇਸ਼ਕਾਂ ਨੇ ਆਪਣਾ ਪੈਸਾ ਵਾਪਸ ਮੰਗਣਾ ਸ਼ੁਰੂ ਕੀਤਾ ਤਾਂ ਸਰਕਾਰੀ ਵਕੀਲਾਂ ਮੁਤਾਬਕ ਉਨ੍ਹਾਂ ਨੂੰ ਨਵੇਂ ਨਿਵੇਸ਼ਕਾਂ ਤੋਂ ਆਈ ਰਕਮ ਨਾਲ ਭੁਗਤਾਨ ਕੀਤਾ ਗਿਆ। ਇਸੇ ਤਰੀਕੇ ਨਾਲ ਇਹ ਪੋਂਜ਼ੀ ਯੋਜਨਾ ਕਈ ਸਾਲ ਚੱਲਦੀ ਰਹੀ।ਜਾਂਚ ਵਿੱਚ ਇਹ ਵੀ ਸਾਹਮਣੇ ਆਇਆ ਕਿ ਨਿਵੇਸ਼ਕਾਂ ਦੇ ਪੈਸਿਆਂ ਦਾ ਇੱਕ ਹਿੱਸਾ ਜਵਾਹਰ ਦੀ ਆਲੀਸ਼ਾਨ ਜੀਵਨਸ਼ੈਲੀ ’ਤੇ ਖਰਚ ਹੋਇਆ। ਇਸ ਵਿੱਚ ਨਿੱਜੀ ਜਹਾਜ਼ਾਂ ਦੀਆਂ ਯਾਤਰਾਵਾਂ, ਮਹਿੰਗੇ ਹੋਟਲ, ਨਿਊਯਾਰਕ ਸਿਟੀ ਅਤੇ ਆਸਟਿਨ ਵਿੱਚ ਆਲੀਸ਼ਾਨ ਅਪਾਰਟਮੈਂਟ, ਨਿੱਜੀ ਕਲੱਬਾਂ ਦੀ ਮੈਂਬਰਸ਼ਿਪ, ਮਹਿੰਗੇ ਕੱਪੜਿਆਂ ਦੀ ਖਰੀਦਦਾਰੀ ਅਤੇ ਮਹਿੰਗੇ ਰੈਸਟੋਰੈਂਟਾਂ ਦੇ ਖਰਚੇ ਸ਼ਾਮਿਲ ਸਨ।ਅਦਾਲਤੀ ਰਿਕਾਰਡ ਮੁਤਾਬਕ 2022 ਵਿੱਚ ਟੈਕਸਸ ਦੇ ਅਧਿਕਾਰੀਆਂ ਨੇ ਜਵਾਹਰ ਨੂੰ ਧੋਖਾਧੜੀ ਨਾਲ ਜੁੜੀਆਂ ਸਰਗਰਮੀਆਂ ਰੋਕਣ ਦਾ ਹੁਕਮ ਦਿੱਤਾ ਸੀ, ਪਰ ਇਸ ਤੋਂ ਬਾਅਦ ਵੀ ਉਸ ਨੇ ਨਿਵੇਸ਼ਕਾਂ ਤੋਂ ਪੈਸਾ ਲੈਣਾ ਜਾਰੀ ਰੱਖਿਆ।ਟ੍ਰੈਵਿਸ ਕੇਲਸੀ ਨੂੰ ਅਦਾਲਤ ਵਿੱਚ ਇਸ ਧੋਖਾਧੜੀ ਦੇ ਇਕ ਪੀੜਤ ਵਜੋਂ ਪਛਾਣਿਆ ਗਿਆ। ਹਾਲਾਂਕਿ, ਉਸ ਨੇ ਕਿੰਨਾ ਪੈਸਾ ਨਿਵੇਸ਼ ਕੀਤਾ ਅਤੇ ਕਿੰਨਾ ਨੁਕਸਾਨ ਹੋਇਆ, ਇਸ ਬਾਰੇ ਕੋਈ ਰਕਮ ਜਨਤਕ ਨਹੀਂ ਕੀਤੀ ਗਈ। ਕੇਲਸੀ ’ਤੇ ਇਸ ਮਾਮਲੇ ਵਿੱਚ ਕਿਸੇ ਤਰ੍ਹਾਂ ਦਾ ਦੋਸ਼ ਨਹੀਂ ਹੈ।ਇਲਜ਼ਾਮ ਲੱਗਣ ਤੋਂ ਬਾਅਦ ਜਵਾਹਰ ’ਤੇ ਜਾਂਚ ਵਿੱਚ ਰੁਕਾਵਟ ਪਾਉਣ ਦੀ ਕੋਸ਼ਿਸ਼ ਕਰਨ ਦੇ ਦੋਸ਼ ਵੀ ਲੱਗੇ। ਅਮਰੀਕੀ ਨਿਆਂ ਵਿਭਾਗ ਮੁਤਾਬਕ ਉਸ ਨੇ ਇੱਕ ਪੀੜਤ ਨੂੰ ਐਫਬੀਆਈ ਸਾਹਮਣੇ ਆਪਣੇ ਹੱਕ ਵਿੱਚ ਬਿਆਨ ਦੇਣ ਲਈ ਪ੍ਰਭਾਵਿਤ ਕਰਨ, ਆਪਣੀ ਇਮੀਗ੍ਰੇਸ਼ਨ ਅਤੇ ਵਿੱਤੀ ਸਥਿਤੀ ਬਾਰੇ ਗਲਤ ਜਾਣਕਾਰੀ ਦੇਣ ਅਤੇ ਸਬੂਤ ਲੁਕਾਉਣ ਲਈ ਆਪਣੀ ਭੈਣ ਰਾਹੀਂ ਆਈਫੋਨ ਦਾ ਡਾਟਾ ਦੂਰੋਂ ਮਿਟਾਉਣ ਦੀ ਕੋਸ਼ਿਸ਼ ਕੀਤੀ।ਸਜ਼ਾ ਸੁਣਾਉਂਦੇ ਸਮੇਂ ਸੰਘੀ ਜੱਜ ਜ਼ੈਕਰੀ ਐਮ. ਬਲੂਸਟੋਨ ਨੇ ਧੋਖਾਧੜੀ ਨਾਲ ਹੋਏ ਵੱਡੇ ਨੁਕਸਾਨ ਅਤੇ ਇਸ ਦੇ ਲੰਬੇ ਸਮੇਂ ਤੱਕ ਚੱਲਣ ਦਾ ਜ਼ਿਕਰ ਕੀਤਾ। ਜਵਾਹਰ ਨੇ ਅਦਾਲਤ ਵਿੱਚ ਕਿਹਾ ਕਿ ਉਹ ਪੀੜਤਾਂ ਦਾ ਪੈਸਾ ਵਾਪਸ ਕਰਨ ਦੀ ਕੋਸ਼ਿਸ਼ ਜਾਰੀ ਰੱਖੇਗਾ, ਪਰ ਜੱਜ ਨੇ ਕਿਹਾ ਕਿ ਹੁਣ ਤੱਕ ਪੀੜਤਾਂ ਨੂੰ ਰਕਮ ਵਾਪਸ ਨਾ ਕਰਨਾ ਸਜ਼ਾ ਤੈਅ ਕਰਨ ਵਿੱਚ ਅਹਿਮ ਕਾਰਨ ਰਿਹਾ।ਜਵਾਹਰ ਨੇ ਜਨਵਰੀ 2026 ਵਿੱਚ ਵਾਇਰ ਧੋਖਾਧੜੀ ਦੇ ਤਿੰਨ ਦੋਸ਼ਾਂ ਵਿੱਚ ਆਪਣਾ ਦੋਸ਼ ਕਬੂਲ ਕਰ ਲਿਆ ਸੀ। ਅਧਿਕਾਰੀਆਂ ਮੁਤਾਬਕ ਉਹ ਭਾਰਤ ਤੋਂ ਹੈ ਅਤੇ ਅਮਰੀਕਾ ਵਿੱਚ ਕਾਨੂੰਨੀ ਇਮੀਗ੍ਰੇਸ਼ਨ ਦਰਜੇ ਤੋਂ ਬਿਨਾਂ ਰਹਿ ਰਿਹਾ ਸੀ। ਕੈਦ ਦੀ ਸਜ਼ਾ ਪੂਰੀ ਕਰਨ ਤੋਂ ਬਾਅਦ ਉਸ ਨੂੰ ਡਿਪੋਰਟੇਸ਼ਨ ਦੀ ਕਾਰਵਾਈ ਦਾ ਸਾਹਮਣਾ ਕਰਨਾ ਪਵੇਗਾ। ਇਸ ਮਾਮਲੇ ਦੀ ਜਾਂਚ ਐਫਬੀਆਈ ਅਤੇ ਮੈਨਹੈਟਨ ਡਿਸਟ੍ਰਿਕਟ ਅਟਾਰਨੀ ਦਫ਼ਤਰ ਵੱਲੋਂ ਕੀਤੀ ਗਈ।
