ਅਭੈ ਚੌਟਾਲਾ ਦੀ ਗੱਡੀ 'ਚ ਭਰਿਆ 111 ਲੀਟਰ ਪੈਟਰੋਲ, ਚਚੇਰੇ ਭਰਾ ਦੇ ਪੰਪ ਦੀ ਸਪਲਾਈ ਰੁਕੀ ਅਭੈ ਚੌਟਾਲਾ ਨੇ ਦੱਸਿਆ ਲੋਕ ਵਿਰੋਧੀ ਤੇ ਪ੍ਰੇਸ਼ਾਨੀ ਵਧਾਉਣ ਵਾਲਾ ਫੈਸਲਾ-ਕਈ ਪੈਟਰੋਲ ਪੰਪ ਪਹਿਲਾਂ ਵੀ ਭੁਗਤ ਚੁੱਕੇ ਅਜਿਹੀ ਕਾਰਵਾਈ

ਅ

ਅਜੀਤ ਡੈਸਕ 17-06-2026

ਡੱਬਵਾਲੀ, 16 ਜੂਨ (ਇਕਬਾਲ ਸਿੰਘ ਸ਼ਾਂਤ)-ਪੈਟਰੋਲ-ਡੀਜ਼ਲ ਵਿਕਰੀ ਦੀ ਆਨਲਾਈਨ 'ਚਾਬੀ' ਹੁਣ ਸਰਕਾਰ ਤੇ ਤੇਲ ਕੰਪਨੀਆਂ ਦੇ ਹੱਥਾਂ 'ਚ ਹੈ | ਇਸ ਦੀ ਮਿਸਾਲ ਡੱਬਵਾਲੀ 'ਚ ਸਾਹਮਣੇ ਆਈ ਹੈ, ਜਿੱਥੇ ਇਨੈਲੋ ਦੇ ਕੌਮੀ ਪ੍ਰਧਾਨ ਅਭੈ ਚੌਟਾਲਾ ਦੀ ਗੱਡੀ 'ਚ ਤੈਅ ਹੱਦ ਤੋਂ ਵੱਧ ਪੈਟਰੋਲ ਭਰਨ 'ਤੇ ਉਨ੍ਹਾਂ ਦੇ ਚਚੇਰੇ ਭਰਾ ਸੰਦੀਪ ਚੌਧਰੀ ਦੇ ਪੈਟਰੋਲ ਪੰਪ ਦੀ ਤੇਲ ਸਪਲਾਈ ਨੂੰ 24 ਘੰਟਿਆਂ ਲਈ ਬੰਦ ਕਰ ਦਿੱਤਾ ਗਿਆ | ਕਰੀਬ 20-22 ਦਿਨ ਪੁਰਾਣੇ ਮਾਮਲੇ ਦਾ ਜ਼ਿਕਰ ਅਭੈ ਚੌਟਾਲਾ ਨੇ ਚੰਡੀਗੜ੍ਹ 'ਚ ਇੱਕ ਪ੍ਰੈੱਸ ਕਾਨਫਰੰਸ ਦੌਰਾਨ ਕੀਤਾ | ਉਨ੍ਹਾਂ ਦੱਸਿਆ ਕਿ ਉਹ ਆਪਣੀ 120 ਲੀਟਰ ਸਮਰੱਥਾ ਵਾਲੀ ਨਿਸਾਨ ਗੱਡੀ 'ਚ ਪੈਟਰੋਲ ਪੁਆਉਣ ਲਈ ਡੱਬਵਾਲੀ ਸਥਿਤ ਸੰਦੀਪ ਚੌਧਰੀ ਦੇ ਚੌਧਰੀ ਦਲੀਪ ਸਿੰਘ ਰਿਪੁਦਮਨ ਸਿੰਘ ਪੈਟਰੋਲ ਪੰਪ 'ਤੇ ਗਏ ਸਨ | ਟੈਂਕੀ ਫੁੱਲ ਕਰਵਾਉਣ 'ਤੇ ਕਰੀਬ 111-112 ਲੀਟਰ ਪੈਟਰੋਲ ਪਾਇਆ ਗਿਆ | ਕਰਮਚਾਰੀ ਨੇ ਉਨ੍ਹਾਂ ਨੂੰ ਪਛਾਣ ਕੇ ਪਟ੍ਰੋਲ ਭਰ ਦਿੱਤਾ ਪਰ ਅਗਲੇ ਦਿਨ ਤੇਲ ਕੰਪਨੀ ਨੇ ਨਿਯਮਾਂ ਦਾ ਹਵਾਲਾ ਦੇ ਕੇ ਪੰਪ ਦੀ ਸਪਲਾਈ 24 ਘੰਟਿਆਂ ਲਈ ਰੋਕ ਦਿੱਤੀ | ਅਭੈ ਚੌਟਾਲਾ ਨੇ ਇਸ ਨੂੰ ਕਿਸਾਨਾਂ ਤੇ ਆਮ ਲੋਕਾਂ ਲਈ ਪ੍ਰੇਸ਼ਾਨੀ ਵਧਾਉਣ ਵਾਲਾ ਫੈਸਲਾ ਦੱਸਿਆ | ਉਨ੍ਹਾਂ ਕਿਹਾ ਕਿ ਜੇਕਰ ਕਿਸੇ ਵਿਅਕਤੀ ਨੇ 800 ਕਿਲੋਮੀਟਰ ਦੂਰ ਜਾਣਾ ਹੋਵੇ ਤਾਂ ਕੀ ਉਹ ਰਾਹ 'ਚ ਵਾਰ-ਵਾਰ ਰੁਕ ਕੇ ਤੇਲ ਪੁਆਵੇਗਾ? ਉੱਧਰ ਸੰਦੀਪ ਚੌਧਰੀ ਨੇ ਦੱਸਿਆ ਕਿ ਉਨ੍ਹਾਂ ਕਈ ਦਿਨ ਤੱਕ ਇਸ ਘਟਨਾ ਦਾ ਜ਼ਿਕਰ ਨਹੀਂ ਕੀਤਾ | ਬਾਅਦ 'ਚ ਭਾਈ ਸਾਹਿਬ (ਅਭੈ ਚੌਟਾਲਾ) ਨੂੰ ਜਾਣਕਾਰੀ ਦੇਣ 'ਤੇ ਮਾਮਲਾ ਜਨਤਕ ਹੋਇਆ | ਜਾਣਕਾਰੀ ਅਨੁਸਾਰ ਸਿਰਸਾ ਜ਼ਿਲ੍ਹੇ 'ਚ ਕਈ ਪੈਟਰੋਲ ਪੰਪ ਤੈਅ ਹੱਦ ਤੋਂ ਵੱਧ ਪਟ੍ਰੋਲ ਜਾਂ ਡੀਜ਼ਲ ਵੇਚਣ ਕਾਰਨ ਅਜਿਹੀ ਕਾਰਵਾਈ ਦਾ ਸਾਹਮਣਾ ਕਰ ਚੁੱਕੇ ਹਨ | ਜ਼ਿਕਰਯੋਗ ਹੈ ਕਿ ਪੈਟ੍ਰੋਲੀਅਮ ਮੰਤਰਾਲੇ ਨੇ 11 ਜੂਨ 2026 ਤੋਂ ਜਮਾਖੋਰੀ ਤੇ ਕਾਲਾਬਾਜ਼ਾਰੀ ਰੋਕਣ ਲਈ 90 ਦਿਨਾਂ ਦੇ ਅਸਥਾਈ ਨਿਯਮ ਲਾਗੂ ਕੀਤੇ ਹਨ | ਇਨ੍ਹਾਂ ਤਹਿਤ 100 ਲੀਟਰ ਤੋਂ ਵੱਧ ਪੈਟਰੋਲ ਅਤੇ 200 ਲੀਟਰ ਤੋਂ ਵੱਧ ਡੀਜ਼ਲ ਦੀ ਖਰੀਦ ਨੂੰ ਵਪਾਰਕ ਖਰੀਦ ਮੰਨਿਆ ਜਾਂਦਾ ਹੈ | ਜੇਕਰ ਪੈਟਰੋਲ ਪੰਪ 'ਤੇ ਕਿਸੇ ਗਾਹਕ ਨੂੰ ਇਸ ਹੱਦ ਤੋਂ ਵੱਧ ਤੇਲ ਦਿੱਤਾ ਜਾਂਦਾ ਹੈ ਤਾਂ ਆਨਲਾਈਨ ਸਿਸਟਮ ਤੁਰੰਤ ਅਲਰਟ ਜਾਰੀ ਕਰ ਦਿੰਦਾ ਹੈ | ਤੇਲ ਕੰਪਨੀਆਂ ਦਾ ਆਨਲਾਈਨ ਸਿਸਟਮ ਆਪਣੇ-ਆਪ ਪੰਪ ਦੀ ਸਪਲਾਈ 24 ਘੰਟਿਆਂ ਲਈ ਬੰਦ ਕਰ ਦਿੰਦਾ ਹੈ | ਲਿਖਤੀ ਸਪੱਸ਼ਟੀਕਰਨ ਦੇਣ ਤੋਂ ਬਾਅਦ ਹੀ ਸਪਲਾਈ ਮੁੜ ਸ਼ੁਰੂ ਹੁੰਦੀ ਹੈ | ਨਿਯਮਾਂ 'ਚ ਆਮ ਅਤੇ ਖ਼ਾਸ ਵਿਅਕਤੀ ਲਈ ਕੋਈ ਵੱਖਰੀ ਵਿਵਸਥਾ ਨਹੀਂ ਹੈ |
ਸਰਕਾਰ ਜਾਗਰੂਕਤਾ 'ਤੇ ਜ਼ੋਰ ਦੇਵੇ : ਗਿਆਨ ਚੰਦ ਮਹਿਤਾ
ਸਿਰਸਾ ਪੈਟਰੋਲ ਪੰਪ ਐਸੋਸੀਏਸ਼ਨ ਦੇ ਜ਼ਿਲ੍ਹਾ ਪ੍ਰਧਾਨ ਗਿਆਨ ਚੰਦ ਮਹਿਤਾ ਨੇ ਦੱਸਿਆ ਕਿ ਹਰਿਆਣਾ ਤੇ ਰਾਜਸਥਾਨ 'ਚ ਤੇਲ ਦੀਆਂ ਕੀਮਤਾਂ 'ਚ ਕਰੀਬ 10 ਰੁਪਏ ਪ੍ਰਤੀ ਲੀਟਰ ਦਾ ਫਰਕ ਹੈ | ਇਸ ਕਾਰਨ ਸਰਹੱਦੀ ਖੇਤਰਾਂ 'ਚ ਤੇਲ ਦੀ ਗੈਰ-ਕਾਨੂੰਨੀ ਵਿਕਰੀ ਤੇ ਤਸਕਰੀ ਵਧੀ ਸੀ | ਇਸ ਨੂੰ ਰੋਕਣ ਲਈ ਸਰਕਾਰ ਨੇ ਆਨਲਾਈਨ ਬਲਾਕ ਸਿਸਟਮ ਲਾਗੂ ਕੀਤਾ ਹੈ | ਉਨ੍ਹਾਂ ਕਿਹਾ ਕਿ ਸਰਕਾਰ ਨੂੰ ਕਾਲਾਬਾਜ਼ਾਰੀ ਰੋਕਣ ਦੇ ਨਾਲ-ਨਾਲ ਲੋਕਾਂ ਨੂੰ ਜਾਗਰੂਕ ਕਰਨ 'ਤੇ ਵੀ ਜ਼ੋਰ ਦੇਣਾ ਚਾਹੀਦਾ ਹੈ |

ਪਿਛਲੀ ਖ਼ਬਰ ਦਿਨ-ਦਿਹਾੜੇ ਮੋਟਰਸਾਈਕਲ ਸਵਾਰ ਦੋ ਨੌਜਵਾਨ ਬਜ਼ੁਰਗ ਅÏਰਤ ਦੀਆਂ ਵਾਲੀਆਂ ਖੋਹ ਕੇ ਫਰਾਰ ਅਗਲੀ ਖ਼ਬਰ ਹਰਿਆਣਾ ਗੋਲਡ ਸ਼ੂਟਿੰਗ ਰੇਂਜ ਦੇ ਚਾਰ ਖਿਡਾਰੀ ਪ੍ਰੀ-ਨੈਸ਼ਨਲ ਲਈ ਕੁਆਲੀਫਾਈ <br/>