ਸਰਦੂਲਗੜ੍ਹ, 5 ਮਾਰਚ (ਜੀ.ਐਮ. ਅਰੋੜਾ)- ਸਥਾਨਕ ਪੀ.ਐਮ. ਸ੍ਰੀ ਸਰਕਾਰੀ ਕੰਨਿਆ ਸੈਕੰਡਰੀ ਸਕੂਲ ਦੀਆਂ ਵਿਦਿਆਰਥਣਾਂ ਵਲੋਂ ਪ੍ਰੋਜੈਕਟ ਇਨੋਵੇਸ਼ਨ ਅਧੀਨ ਅੰਤਰਰਾਜੀ ਵਿਜ਼ਟ ਤਹਿਤ ਸਕੂਲ ਇੰਚਾਰਜ ਰਮਨਦੀਪ ਕੌਰ ਦੀ ਅਗਵਾਈ ਹੇਠ ਜੈਪੁਰ (ਰਾਜਸਥਾਨ) ਦਾ ਸਫਲਤਾਪੂਰਵਕ ਵਿੱਦਿਅਕ ਫੇਰਾ ਲਗਾਇਆ ਗਿਆ | ਇਸ ਦੌਰਾਨ ਵਿਦਿਆਰਥਣਾਂ ਨੇ ਜੰਤਰ-ਮੰਤਰ, ਅਮੇਰ ਕਿਲ੍ਹਾ, ਨਾਹਰ ਗੜ੍ਹ ਕਿਲ੍ਹਾ, ਜੈ ਗੜ੍ਹ ਕਿਲ੍ਹਾ, ਹਵਾ ਮਹਿਲ, ਬਿਰਲਾ ਮੰਦਰ ਅਤੇ ਸਿਟੀ ਪੈਲੇਸ ਵਰਗੇ ਪ੍ਰਸਿੱਧ ਇਤਿਹਾਸਕ ਸਥਾਨਾਂ ਦਾ ਦੌਰਾ ਕੀਤਾ | ਇਸ ਤੋਂ ਇਲਾਵਾ ਵਿਦਿਆਰਥਣਾਂ ਨੇ ਵਰਲਡ ਟਰੇਡ ਪਾਰਕ, ਜੈਪੁਰ ਚਿੜੀਆ ਘਰ, ਅਲਬਰਟ ਹਾਲ ਮਿਊਜ਼ੀਅਮ, ਨਾਹਰ ਗੜ੍ਹ ਬਾਇਓਲੌਜੀਕਲ ਪਾਰਕ, ਰਿਜਨਲ ਸਾਇੰਸ ਸੈਂਟਰ, ਸਾਇੰਸ ਪਾਰਕ, ਟੈਕਨੌਲੋਜੀ ਪਾਰਕ ਅਤੇ ਬਿਰਲਾ ਪਲੈਨੀਟੇਰੀਅਮ ਦਾ ਦੌਰਾ ਕਰ ਕੇ ਵਿਗਿਆਨਕ ਜਾਣਕਾਰੀ ਹਾਸਲ ਕੀਤੀ | ਵਿਦਿਆਰਥਣਾਂ ਨੇ ਜਲ ਮਹਿਲ, ਬਾਪੂ ਬਾਜ਼ਾਰ, ਚੋਖੀ ਢਾਣੀ ਜੈਪੁਰ ਅਤੇ ਸਨੋ-ਯਾਰਡ ਕਿਸ਼ਨਗੜ੍ਹ ਰਾਜਸਥਾਨ ਦੀ ਸੁੰਦਰਤਾ ਦਾ ਵੀ ਅਨੰਦ ਮਾਣਿਆ | ਇਸ ਵਿੱਦਿਅਕ ਫੇਰੇ ਦੌਰਾਨ ਅਧਿਆਪਕਾਂ ਨੇ ਵਿਦਿਆਰਥਣਾਂ ਨੂੰ ਇਤਿਹਾਸਕ ਵਿਰਾਸਤ, ਵਿਗਿਆਨਕ ਤਰੱਕੀ ਅਤੇ ਸਭਿਆਚਾਰਕ ਮੁੱਲਾਂ ਬਾਰੇ ਵਿਸਥਾਰ ਨਾਲ ਜਾਣਕਾਰੀ ਦਿੱਤੀ |
