ਈਰਾਨ ਨੂੰ ਹੁਣ ਸ਼ਾਂਤੀ ਬਣਾਉਣੀ ਪਵੇਗੀ, ਨਹੀਂ ਤਾਂ ਭਵਿੱਖ ਵਿਚ ਹੋਰ ਵੱਡੇ ਹਮਲੇ ਹੋਣਗੇ - ਟਰੰਪ

 ਵਾਸ਼ਿੰਗਟਨ ਡੀ.ਸੀ., 22 ਜੂਨ - ਈਰਾਨ ਦੇ ਪ੍ਰਮਾਣੂ ਟਿਕਾਣਿਆਂ ਉੱਪਰ ਹਮਲੇ ਤੋਂ ਬਾਅਦ ਅਮਰੀਕਾ ਦੇ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਰਾਸ਼ਟਰ ਦੇ ਨਾਂਅ ਆਪਣੇ ਸੰਬੋਧਨ ਵਿਚ ਕਿਹਾ, "ਅੱਜ ਰਾਤ, ਮੈਂ ਦੁਨੀਆ ਨੂੰ ਦੱਸ ਸਕਦਾ ਹਾਂ ਕਿ ਈਰਾਨ ਦੇ ਤਿੰਨ ਪ੍ਰਮਾਣੂ ਟਿਕਾਣਿਆਂ 'ਤੇ ਹਮਲੇ ਇਕ ਸ਼ਾਨਦਾਰ ਫੌਜੀ ਸਫਲਤਾ ਸਨ। ਈਰਾਨ ਦੇ ਮੁੱਖ ਪ੍ਰਮਾਣੂ ਸੰਸ਼ੋਧਨ ਟਿਕਾਣਿਆਂ ਨੂੰ ਪੂਰੀ ਤਰ੍ਹਾਂ ਤਬਾਹ ਕਰ ਦਿੱਤਾ ਗਿਆ ਹੈ। ਸਾਡਾ ਉਦੇਸ਼ ਈਰਾਨ ਦੀ ਪ੍ਰਮਾਣੂ ਸੰਸ਼ੋਧਨ ਸਮਰੱਥਾ ਨੂੰ ਨਸ਼ਟ ਕਰਨਾ ਅਤੇ ਦੁਨੀਆ ਦੇ ਸਭ ਤੋਂ ਵੱਡੇ ਅੱਤਵਾਦ ਸਪਾਂਸਰ ਰਾਜ ਦੁਆਰਾ ਪੈਦਾ ਹੋਏ ਪ੍ਰਮਾਣੂ ਖ਼ਤਰੇ ਨੂੰ ਰੋਕਣਾ ਸੀ। ਉਨ੍ਹਾਂ ਕਿਹਾ, "ਮੱਧ ਪੂਰਬ ਦੇ ਧੱਕੇਸ਼ਾਹੀ ਕਰਨ ਵਾਲੇ ਈਰਾਨ ਨੂੰ ਹੁਣ ਸ਼ਾਂਤੀ ਬਣਾਉਣੀ ਪਵੇਗੀ। ਜੇਕਰ ਉਹ ਅਜਿਹਾ ਨਹੀਂ ਕਰਦੇ, ਤਾਂ ਭਵਿੱਖ ਦੇ ਹਮਲੇ ਕਿਤੇ ਵੱਡੇ ਅਤੇ ਆਸਾਨ ਹੋਣਗੇ। 40 ਸਾਲਾਂ ਤੋਂ, ਈਰਾਨ ਇਜ਼ਰਾਈਲ ਨੂੰ ਮੌਤ, ਅਮਰੀਕਾ ਨੂੰ ਮੌਤ ਕਹਿ ਰਿਹਾ ਹੈ। ਉਹ ਸਾਡੇ ਲੋਕਾਂ ਨੂੰ ਮਾਰ ਰਹੇ ਹਨ, ਉਨ੍ਹਾਂ ਦੀਆਂ ਬਾਹਾਂ ਉਡਾ ਰਹੇ ਹਨ, ਸੜਕ ਕਿਨਾਰੇ ਬੰਬਾਂ ਨਾਲ ਉਨ੍ਹਾਂ ਲੱਤਾਂ ਉਡਾ ਰਹੇ ਹਨ... ਉਨ੍ਹਾਂ ਦੇ ਜਨਰਲ, ਕਾਸਿਮ ਸੁਲੇਮਾਨੀ ਦੁਆਰਾ ਬਹੁਤ ਸਾਰੇ ਮਾਰੇ ਗਏ ਸਨ। ਮੈਂ ਬਹੁਤ ਸਮਾਂ ਪਹਿਲਾਂ ਫ਼ੈਸਲਾ ਕੀਤਾ ਸੀ ਕਿ ਮੈਂ ਅਜਿਹਾ ਨਹੀਂ ਹੋਣ ਦਿਆਂਗਾ। ਇਹ ਜਾਰੀ ਨਹੀਂ ਰਹੇਗਾ।"