ਨੀਰਜ ਚੋਪੜਾ ਨੇ ਓਸਟ੍ਰਾਵਾ ਗੋਲਡਨ ਸਪਾਈਕ ਵਿਚ ਸੋਨ ਤਗਮਾ ਜਿੱਤਿਆ

ਨਵੀਂ ਦਿੱਲੀ , 24 ਜੂਨ - ਭਾਰਤ ਦੇ ਗੋਲਡਨ ਬੁਆਏ ਨੀਰਜ ਚੋਪੜਾ ਨੇ ਚੈੱਕ ਗਣਰਾਜ ਵਿਚ ਆਯੋਜਿਤ ਓਸਟ੍ਰਾਵਾ ਗੋਲਡਨ ਸਪਾਈਕ ਵਿਚ ਸੋਨ ਤਗਮਾ ਜਿਤ ਕੇ ਇਕ ਹੋਰ ਅੰਤਰਰਾਸ਼ਟਰੀ ਜੈਵਲਿਨ ਟੂਰਨਾਮੈਂਟ ਵਿਚ ਦੇਸ਼ ਦਾ ਨਾਂਅ ਰੌਸ਼ਨ ਕੀਤਾ ਹੈ। ਨੀਰਜ ਨੇ ਤੀਜੇ ਦੌਰ ਵਿਚ ਜੈਵਲਿਨ 85.29 ਮੀਟਰ ਸੁੱਟਿਆ, ਜਿਸ ਨੂੰ ਕੋਈ ਹੋਰ ਐਥਲੀਟ ਪਾਰ ਨਹੀਂ ਕਰ ਸਕਿਆ। ਦੱਖਣੀ ਅਫਰੀਕਾ ਦੇ ਡਵ ਸਮਿਥ ਨੇ ਦੂਜੇ ਦੌਰ ਵਿਚ 84.12 ਮੀਟਰ ਸੁੱਟਿਆ, ਜੋ ਕਿ 6 ਦੌਰਾਂ ਵਿਚ ਉਸ ਦਾ ਸਭ ਤੋਂ ਵਧੀਆ ਪ੍ਰਦਰਸ਼ਨ ਸੀ। ਉਹ ਦੂਜੇ ਸਥਾਨ 'ਤੇ ਰਿਹਾ। ਇਸ ਦੇ ਨਾਲ ਹੀ, ਗ੍ਰੇਨਾਡਾ ਦੇ ਪੀਟਰ ਐਂਡਰਸਨ ਨੇ ਆਪਣੀ ਪਹਿਲੀ ਕੋਸ਼ਿਸ਼ ਵਿਚ 83.63 ਮੀਟਰ ਸੁੱਟਿਆ ਅਤੇ ਇਹ 6 ਦੌਰਾਂ ਵਿਚ ਉਸ ਦਾ ਸਭ ਤੋਂ ਵਧੀਆ ਪ੍ਰਦਰਸ਼ਨ ਸੀ। ਉਹ ਤੀਜੇ ਸਥਾਨ 'ਤੇ ਰਿਹਾ।