ਰੂਪਨਗਰ/ਭਰਤਗੜ੍ਹ, 5 ਸਤੰਬਰ (ਜਸਬੀਰ ਸਿੰਘ ਬਾਵਾ)-ਜ਼ਿਲ੍ਹਾ ਰੂਪਨਗਰ ਦੇ ਭਰਤਗੜ੍ਹ ਦੀ ਸ਼ਮਸ਼ਾਨਘਾਟ ਨੇੜੇ ਅੱਜ ਬਾਅਦ ਦੁਪਹਿਰ ਕਰੀਬ 450 ਫੁੱਟ ਅਤੇ ਸ਼ਾਮੀਂ 3 ਵਜੇ ਆਲੋਵਾਲ ਨੇੜੇ ਭਾਖੜਾ ਨਹਿਰ 'ਚ ਕਰੀਬ 65 ਫੁੱਟ ਚੌੜੇ ਪਾੜ ਪੈ ਗਏ। ਭਰਤਗੜ੍ਹ 'ਚ ਪਏ ਪਾੜ ਮਗਰੋਂ ਭਾਖੜਾ ਨਹਿਰ ਦੀ ਪਟੜੀ ਧੱਸਣ ਉਤੇ ਸਤਲੁਜ ਯਮੁਨਾ ਲਿੰਕ ਨਹਿਰ ਦੀ ਦੂਰੀ ਕਰੀਬ 10 ਫੁੱਟ ਹੀ ਰਹਿ ਗਈ ਹੈ। ਜ਼ਿਕਰਯੋਗ ਹੈ ਕਿ ਬੀਤੇ ਦਿਨੀਂ ਤੇਜ਼ ਮੀਂਹ ਦੌਰਾਨ ਭਰਤਗੜ੍ਹ ਨੇੜੇ ਭਾਖੜਾ ਨਹਿਰ 'ਚ ਉਕਤ ਥਾਂ 'ਤੇ ਕੁਝ ਸਲੈਬਾਂ ਧੱਸੀਆਂ ਸਨ। ਵਿਭਾਗ ਵਲੋਂ ਤਿਰਪਾਲਾਂ ਨਾਲ ਢੱਕ ਕੇ ਆਰਜ਼ੀ ਤੌਰ 'ਤੇ ਇੰਤਜ਼ਾਮ ਕਰ ਦਿੱਤਾ ਸੀ ਪਰ ਅੱਜ ਅਚਾਨਕ ਇਸ ਪਾੜ 'ਚ ਕਰੀਬ 350 ਫੁੱਟ ਹੋਰ ਵਾਧਾ ਹੋ ਗਿਆ ਹੈ ਅਤੇ ਆਲੋਵਾਲ ਨੇੜੇ ਭਾਖੜਾ ਨਹਿਰ 'ਚ ਨਵਾਂ ਪਾੜ ਵੀ ਪੈ ਗਿਆ ਹੈ।
ਸੁਖਜਿੰਦਰ ਸਿੰਘ ਭਾਓਵਾਲ, ਅਮਰਜੀਤ ਸਿੰਘ ਅਤੇ ਨੰਬਰਦਾਰ ਜਸਪਾਲ ਸਿੰਘ ਖਰੋਟਾ ਦੀ ਇਤਲਾਹ 'ਤੇ ਜੇ. ਈ. ਕ੍ਰਿਸ਼ਨ ਸਿੰਘ ਆਪਣੇ ਕਾਮਿਆਂ ਨਾਲ ਮਿਲ ਕੇ ਜੂਟ ਬੈਗ ਭਰਵਾ ਕੇ ਆਰਜ਼ੀ ਇੰਤਜ਼ਾਮਾਂ 'ਚ ਜੁਟ ਗਏ ਹਨ ਅਤੇ ਨਾਇਬ ਤਹਿਸੀਲਦਾਰ ਕਰਨਵੀਰ ਸਿੰਘ ਅਤੇ ਕਾਨੂੰਗੋ ਗੁਰਦੇਵ ਸਿੰਘ ਨੇ ਉਕਤ ਜਾਣਕਾਰੀ ਪ੍ਰਸ਼ਾਸਨ ਨੂੰ ਦੇ ਦਿੱਤੀ ਹੈ।
