ਨਵੀਂ ਦਿੱਲੀ, 9 ਅਕਤੂਬਰ - ਭਾਰਤੀ ਰਿਜ਼ਰਵ ਬੈਂਕ ਨੇ ਹਿਮਾਚਲ ਪ੍ਰਦੇਸ਼ ਦੇ ਸੋਲਨ ਵਿਚ ਸਥਿਤ ਦ ਬਘਾਟ ਅਰਬਨ ਕੋ-ਆਪਰੇਟਿਵ ਬੈਂਕ 'ਤੇ ਕਈ ਸਖ਼ਤ ਪਾਬੰਦੀਆਂ ਲਗਾਈਆਂ ਹਨ। ਗਾਹਕ ਹੁਣ ਆਪਣੇ ਖਾਤਿਆਂ ਵਿਚੋਂ ਵੱਧ ਤੋਂ ਵੱਧ 10,000 ਰੁਪਏ ਕਢਵਾ ਸਕਣਗੇ। ਆਰ.ਬੀ.ਆਈ. ਨੇ ਕਿਹਾ ਕਿ ਹਾਲ ਹੀ ਦੇ ਮਹੀਨਿਆਂ ਵਿਚ ਬੈਂਕ ਦੇ ਕੰਮਕਾਜ ਬਾਰੇ ਕਈ ਚਿੰਤਾਵਾਂ ਉਠਾਈਆਂ ਗਈਆਂ ਸਨ। ਕੇਂਦਰੀ ਬੈਂਕ ਨੇ ਆਪਣੇ ਬੋਰਡ ਅਤੇ ਸੀਨੀਅਰ ਅਧਿਕਾਰੀਆਂ ਨਾਲ ਬੈਂਕ ਦੇ ਕੰਮਕਾਜ ਬਾਰੇ ਚਰਚਾ ਕੀਤੀ, ਪਰ ਸਥਿਤੀ ਨੂੰ ਸੁਧਾਰਨ ਲਈ ਕੋਈ ਠੋਸ ਕਦਮ ਨਹੀਂ ਚੁੱਕੇ ਗਏ। ਆਰ.ਬੀ.ਆਈ. ਨੇ ਜਮ੍ਹਾਂਕਰਤਾਵਾਂ ਦੇ ਹਿੱਤਾਂ ਦੀ ਰੱਖਿਆ ਲਈ ਇਹ ਕਦਮ ਚੁੱਕਿਆ।
ਨਵੀਆਂ ਸ਼ਰਤਾਂ ਦੇ ਤਹਿਤ ਬੈਂਕ ਹੁਣ ਨਵੇਂ ਕਰਜ਼ੇ ਜਾਂ ਪੇਸ਼ਗੀ ਨਹੀਂ ਦੇ ਸਕੇਗਾ, ਨਾ ਹੀ ਆਰ.ਬੀ.ਆਈ. ਦੀ ਪ੍ਰਵਾਨਗੀ ਤੋਂ ਬਿਨਾਂ ਨਵੇਂ ਜਮ੍ਹਾਂ ਜਾਂ ਉਧਾਰ ਸਵੀਕਾਰ ਕਰ ਸਕੇਗਾ। ਹਾਲਾਂਕਿ ਬੈਂਕ ਨੂੰ ਆਪਣੇ ਕਰਜ਼ਿਆਂ ਦੇ ਵਿਰੁੱਧ ਗਾਹਕਾਂ ਦੀ ਜਮ੍ਹਾਂ ਰਕਮ ਨੂੰ ਐਡਜਸਟ ਕਰਨ ਦੀ ਲਚਕਤਾ ਦਿੱਤੀ ਗਈ ਹੈ।
