ਖੜ੍ਹੇ ਦੋ ਟਰੱਕਾਂ ਦੇ ਟਾਇਰ ਰਿੰਮਾਂ ਸਮੇਤ ਚੋਰੀ

ਲਾਲੜੂ (ਮੁਹਾਲੀ), 17 ਸਤੰਬਰ (ਰਾਜਬੀਰ ਸਿੰਘ) - ਲਾਲੜੂ ਥਾਣੇ ਅਧੀਨ ਪੈਂਦੇ ਪਿੰਡ ਧਰਮਗੜ੍ਹ ਵਿਖੇ ਅਣਪਛਾਤੇ ਵਿਅਕਤੀਆਂ ਵਲੋਂ ਸੰਪਰਕ ਸੜਕ ’ਤੇ ਖੜ੍ਹੇ ਦੋ ਟਰਾਲਿਆਂ ਦੇ 10 ਟਾਇਰ ਰਿੰਮਾਂ ਸਮੇਤ ਚੋਰੀ ਕਰਨ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਟਰਾਲਾ ਮਾਲਕਾਂ ਵਲੋਂ ਇਸ ਸੰਬੰਧੀ ਥਾਣਾ ਲਾਲੜੂ ਵਿਖੇ ਸ਼ਿਕਾਇਤ ਦਰਜ ਕਰਵਾਈ ਗਈ ਹੈ।
ਟਰਾਲਾ ਮਾਲਕ ਰਾਜ ਕੁਮਾਰ ਪਿੰਡ ਧਰਮਗੜ੍ਹ ਨੇ ਦੱਸਿਆ ਕਿ ਉਸ ਨੇ ਧਰਮਗੜ੍ਹ ਮੁੱਖ ਸੜਕ ਤੇ ਪਿੰਡ ਤੋਂ ਕਰੀਬ 50 ਮੀਟਰ ਦੀ ਦੂਰੀ ’ਤੇ ਆਪਣਾ ਟਰੱਕ ਖੜ੍ਹਾ ਕੀਤਾ ਹੋਇਆ ਸੀ, ਜਦੋਂ ਸਵੇਰੇ ਉਨ੍ਹਾਂ ਨੇ ਜਾ ਕੇ ਦੇਖਿਆ ਤਾਂ ਉਨ੍ਹਾਂ ਦਾ ਟਰਾਲਾ ਇੰਟਰਲਾਕ ਟਾਇਲਾਂ ਤੇ ਖੜ੍ਹਾ ਸੀ ਅਤੇ ਇਸ ਦੇ ਟਰਾਲੇ ਦੇ ਪਿਛਲੇ ਦੋਹਾਂ ਪਾਸਿਆਂ ਤੋਂ 8 ਟਾਇਰ ਰਿੰਮਾਂ ਸਮੇਤ ਗਾਇਬ ਸਨ। ਉਸ ਨੇ ਦੱਸਿਆ ਕਿ ਇਹ ਟਾਇਰ ਕਰੀਬ ਇਕ ਮਹੀਨਾ ਪਹਿਲਾਂ ਹੀ ਪਵਾਏ ਸਨ, ਜਿਨ੍ਹਾਂ ’ਤੇ ਢਾਈ ਲੱਖ ਰੁਪਏ ਤੋਂ ਵੱਧ ਦਾ ਖ਼ਰਚ ਆਇਆ ਸੀ।
ਇਸੇ ਤਰ੍ਹਾਂ ਦੂਜੇ ਟਰਾਲਾ ਮਾਲਕ ਓਮ ਪ੍ਰਕਾਸ਼ ਪਿੰਡ ਧਰਮਗੜ੍ਹ ਨੇ ਦੱਸਿਆ ਕਿ ਰਾਜ ਕੁਮਾਰ ਦੇ ਟਰਾਲੇ ਦੇ ਨੇੜੇ ਹੀ ਉਨ੍ਹਾਂ ਦਾ ਟਰਾਲਾ ਖੜ੍ਹਾ ਸੀ , ਜਿਸ ਦੇ ਪਿਛਲੇ ਟਾਇਰ ਗਾਇਬ ਸਨ। ਉਨ੍ਹਾਂ ਨੇ ਪਿਛਲੇ ਹਫ਼ਤੇ ਹੀ ਦੋਵੇਂ ਨਵੇਂ ਟਾਇਰ ਪਵਾਏ ਸਨ, ਜਿਨ੍ਹਾਂ ਦੀ ਕੀਮਤ 50 ਹਜ਼ਾਰ ਰੁਪਏ ਤੋਂ ਵੱਧ ਸੀ। ਇਹ ਦੋਵੇਂ ਟਾਇਰ ਵੀ ਅਣਪਛਾਤੇ ਵਿਅਕਤੀ ਰਾਤ ਸਮੇਂ ਰਿੰਮਾਂ ਸਮੇਤ ਚੋਰੀ ਕਰਕੇ ਲੈ ਗਏ। ਦੋਵੇਂ ਟਰਾਲਾ ਮਾਲਕਾਂ ਵਲੋਂ ਪੁਲਿਸ ਕੋਲ ਸ਼ਿਕਾਇਤ ਦਰਜ ਕਰਵਾ ਦਿੱਤੀ ਹੈ। ਥਾਣਾ ਮੁਖੀ ਲਾਲੜੂ ਇੰਸਪੈਕਟਰ ਯੋਗੇਸ਼ ਕੁਮਾਰ ਨੇ ਦੱਸਿਆ ਕਿ ਟਰਾਲਾ ਮਾਲਕਾਂ ਨੇ ਸ਼ਿਕਾਇਤ ਦਰਜ ਕਰਵਾ ਦਿੱਤੀ ਹੈ ਅਤੇ ਪੁਲਿਸ ਵਲੋਂ ਜਾਂਚ ਜਾਰੀ ਹੈ ਤੇ ਰਸਤੇ ਵਿਚ ਲੱਗੇ ਸੀਸੀਟੀਵੀ ਫੁਟੇਜ ਵੇਖੀ ਜਾ ਰਹੀ ਹੈ।