ਬਾਬਾ ਬਕਾਲਾ ਸਾਹਿਬ (ਅੰਮ੍ਰਿਤਸਰ), 26 ਸਤੰਬਰ (ਸ਼ੇਲਿੰਦਰਜੀਤ ਸਿੰਘ ਰਾਜਨ)- ਇਤਿਹਾਸਕ ਨਗਰ ਬਾਬਾ ਬਕਾਲਾ ਸਾਹਿਬ ਦੇ ਪ੍ਰਸਿੱਧ ਕਾਰੋਬਾਰੀ ਅਤੇ ਤਹਿਸੀਲ ਕੰਪਲੈਕਸ ਬਾਬਾ ਬਕਾਲਾ ਸਾਹਿਬ ਵਿਖੇ ਰਾਣਾ ਸਵੀਟਸ ਨਾਂ ਦੀ ਪ੍ਰਸਿੱਧ ਮਠਿਆਈਆਂ ਦੀ ਦੁਕਾਨ ਦੇ ਮਾਲਕ ਸ: ਜਸਪਾਲ ਸਿੰਘ, ਬੀਤੀ ਰਾਤ ਤੋਂ ਭੇਦਭਰੀ ਹਾਲਤ ਵਿਚ ਗੁੰਮ ਹਨ ਅਤੇ ਉਨ੍ਹਾਂ ਦੇ ਇਸ ਤਰ੍ਹਾਂ ਅਚਾਨਕ ਗੁੰਮ ਹੋ ਜਾਣਾ ਅਜੇ ਤੱਕ ਇਕ ਬੁਝਾਰਤ ਬਣਿਆ ਹੋਇਆ ਹੈ।
ਪਰਿਵਾਰ ਵਲੋਂ ਇਸ ਸਬੰਧੀ ਪੁਲਿਸ ਚੌਂਕੀ ਬਾਬਾ ਬਕਾਲਾ ਸਾਹਿਬ ਵਿਖੇ ਰਿਪੋਰਟ ਵੀ ਦਰਜ ਕਰਵਾਈ ਗਈ ਹੈ। ਪਰਿਵਾਰਕ ਸੂਤਰਾਂ ਮੁਤਾਬਕ ਉਹ ਇਕ ਪਲਾਟ ਦੇ ਸੌਦੇ ਸਬੰਧੀ ਗਏ ਸਨ, ਪਰ ਉਸਤੋਂ ਬਾਅਦ ਉਨ੍ਹਾਂ ਦਾ ਮੋਬਾਇਲ ਵੀ ਬੰਦ ਆ ਰਿਹਾ ਹੈ ਅਤੇ ਅਜ ਵੀ ਉਹ ਦੇਰ ਰਾਤ ਖ਼ਬਰ ਲਿਖੇ ਜਾਣ ਤੱਕ ਆਪਣੇ ਘਰ ਵਾਪਿਸ ਨਹੀਂ ਪਰਤੇ। ਬਹੁਤ ਹੀ ਮਿਲਾਪੜੇ ਸੁਭਾਅ ਦੇ ਮਾਲਕ ਸ: ਜਸਪਾਲ ਸਿੰਘ ਦਾ ਇੰਝ ਅਚਾਨਕ ਲਾਪਤਾ ਹੋ ਜਾਣਾ, ਸਮੁੱਚੇ ਨਗਰ ਲਈ, ਜਿੱਥੇ ਬਹੁਤ ਹੀ ਦੁੱਖ ਨਾਲ ਵੇਖਿਆ ਜਾ ਰਿਹਾ ਹੈ, ਉਥੇ ਸਮੁੱਚਾ ਨਗਰ ਇਸ ਘਟਨਾ ਤੋਂ ਭੈ-ਭੀਤ ਵੀ ਹੈ।
