ਚੇਨਈ, 26 ਸਤੰਬਰ (ਇੰਟ)- ਭਾਰਤ ਦੀ ਪੀ.ਵੀ. ਸਿੰਧੂ ਨੇ ਸ਼ਨੀਵਾਰ ਨੂੰ ਇਚਿਨੋਮੀਆ ਸਿਟੀ ਮਿਉਂਸਪਲ ਜਿਮਨੇਜ਼ੀਅਮ ਵਿਖੇ ਏਸ਼ੀਆਈ ਖੇਡਾਂ 2026 ਦੇ ਮਹਿਲਾ ਸਿੰਗਲਜ਼ ਬੈਡਮਿੰਟਨ ਮੁਕਾਬਲੇ ਵਿਚ ਜਾਪਾਨ ਦੀ ਟੋਮੋਕਾ ਮਿਆਜ਼ਾਕੀ ਨੂੰ ਸਿੱਧੇ ਗੇਮਾਂ ਵਿਚ ਹਰਾ ਕੇ ਕੁਆਰਟਰ ਫਾਈਨਲ ਵਿਚ ਜਗ੍ਹਾ ਬਣਾ ਲਈ ਹੈ। ਸਿੰਧੂ ਐਤਵਾਰ ਨੂੰ ਹੋਣ ਵਾਲੇ ਕੁਆਰਟਰ ਫਾਈਨਲ ਵਿਚ ਚੀਨ ਦੀ ਚੇਨ ਯੂਫੇਈ ਨਾਲ ਮੁਕਾਬਲਾ ਕਰੇਗੀ, ਜੋ ਵਿਸ਼ਵ ਰੈਂਕਿੰਗ ਵਿਚ ਚੌਥੇ ਸਥਾਨ 'ਤੇ ਹੈ।
ਭਾਰਤੀ ਸ਼ਟਲਰ ਨੇ ਸ਼ੁਰੂਆਤ ਤੋਂ ਹੀ ਆਰਾਮਦਾਇਕ ਬੜ੍ਹਤ ਬਣਾਈ ਰੱਖੀ ਅਤੇ ਪਹਿਲੀ ਗੇਮ 21-9 ਨਾਲ ਜਿੱਤ ਲਈ। ਦੂਜੀ ਗੇਮ ਦੀ ਸ਼ੁਰੂਆਤ ਵਿਚ ਮਿਆਜ਼ਾਕੀ ਨੇ ਕੁਝ ਸਮੇਂ ਲਈ ਬੜ੍ਹਤ ਬਣਾਈ, ਪਰ ਸਿੰਧੂ ਨੇ ਜ਼ਬਰਦਸਤ 'ਕਰਾਸ-ਕੋਰਟ ਸਮੈਸ਼' ਨਾਲ ਵਾਪਸੀ ਕਰਦਿਆਂ ਮੁੜ ਬੜ੍ਹਤ ਹਾਸਲ ਕਰ ਲਈ। ਭਾਰਤੀ ਸ਼ਟਲਰ ਨੇ ਇਹ ਗੇਮ 21-13 ਨਾਲ ਜਿੱਤ ਲਈ। ਇਸ ਤੋਂ ਪਹਿਲਾਂ ਦਿਨ ਵੇਲੇ, ਸਿੰਧੂ ਨੇ 'ਰਾਊਂਡ ਆਫ 32' ਵਿਚ ਚੀਨੀ ਤਾਈਪੇ ਦੀ ਚਿਊ ਪਿਨ-ਚਿਆਨ ਨੂੰ ਹਰਾਇਆ ਸੀ।
