ਡੇਰਾਬੱਸੀ (ਮੋਹਾਲੀ), 5 ਅਕਤੂਬਰ (ਗੁਰਮੀਤ ਸਿੰਘ)- ਪਿੰਡ ਭਾਂਖਰਪੁਰ ਨੇੜੇ ਇਕ ਕਾਲੋਨੀ ਵਿਚ ਦੇਰ ਰਾਤ ਉਸ ਸਮੇਂ ਹੜਕੰਪ ਮਚ ਗਿਆ, ਜਦੋਂ ਇਕ ਨੌਜਵਾਨ ਨੂੰ ਸੱਪ ਨੇ ਪੈਰ ’ਤੇ ਡੰਗ ਮਾਰ ਦਿੱਤਾ। ਹੌਸਲਾ ਦਿਖਾਉਂਦਿਆਂ ਨੌਜਵਾਨ ਧਰਮਵੀਰ ਨੇ ਡੰਗ ਮਾਰਨ ਵਾਲੇ ਸੱਪ ਨੂੰ ਮਾਰ ਦਿੱਤਾ ਅਤੇ ਉਸ ਨੂੰ ਇਕ ਲਿਫਾਫੇ ਵਿਚ ਪਾ ਕੇ ਪਰਿਵਾਰਕ ਮੈਂਬਰਾਂ ਨਾਲ ਇਲਾਜ ਲਈ ਡੇਰਾਬੱਸੀ ਦੇ ਸਰਕਾਰੀ ਹਸਪਤਾਲ ਪਹੁੰਚ ਗਿਆ।
ਜਾਣਕਾਰੀ ਅਨੁਸਾਰ ਧਰਮਵੀਰ ਨੂੰ ਸੱਪ ਨੇ ਪੈਰ ’ਤੇ ਡੰਗ ਮਾਰਿਆ ਸੀ। ਇਸ ਤੋਂ ਬਾਅਦ ਪਰਿਵਾਰਕ ਮੈਂਬਰ ਤੁਰੰਤ ਉਸ ਨੂੰ ਸਰਕਾਰੀ ਹਸਪਤਾਲ ਲੈ ਕੇ ਆਏ। ਹਸਪਤਾਲ ਪਹੁੰਚਣ ’ਤੇ ਜਦੋਂ ਧਰਮਵੀਰ ਨੇ ਲਿਫਾਫੇ ਵਿਚ ਪਾਇਆ ਮਰਿਆ ਹੋਇਆ ਸੱਪ ਸਟਾਫ ਨੂੰ ਦਿਖਾਇਆ ਤਾਂ ਇਕ ਵਾਰ ਹਸਪਤਾਲ ਦੇ ਸਟਾਫ ਵਿਚ ਵੀ ਹੈਰਾਨੀ ਦਾ ਮਾਹੌਲ ਬਣ ਗਿਆ। ਸੱਪ ਨੂੰ ਮਰਿਆ ਦੇਖਣ ਤੋਂ ਬਾਅਦ ਸਟਾਫ ਨੇ ਰਾਹਤ ਦਾ ਸਾਹ ਲਿਆ।
ਡਾਕਟਰਾਂ ਨੇ ਤੁਰੰਤ ਨੌਜਵਾਨ ਦਾ ਇਲਾਜ ਸ਼ੁਰੂ ਕਰ ਦਿੱਤਾ। ਖ਼ਬਰ ਲਿਖੇ ਜਾਣ ਤੱਕ ਧਰਮਵੀਰ ਦਾ ਇਲਾਜ ਜਾਰੀ ਸੀ ਅਤੇ ਉਸ ਦੀ ਹਾਲਤ ਖ਼ਤਰੇ ਤੋਂ ਬਾਹਰ ਦੱਸੀ ਜਾ ਰਹੀ ਸੀ।
