ਨਵੀਂ ਦਿੱਲੀ, 4 ਨਵੰਬਰ (ਏਜੰਸੀ)-ਅਮਰੀਕਾ ਦੀਆਂ ਮੱਧਕਾਲੀ ਚੋਣਾਂ ’ਚ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੀ ਰਿਪਬਲਿਕਨ ਪਾਰਟੀ ਨੂੰ ਕਰਾਰੀ ਹਾਰ ਮਿਲਣ ਮਗਰੋਂ ਸੋਸ਼ਲ ਮੀਡੀਆ ’ਤੇ ਭਾਰਤ ਦੇ ਮੁੱਖ ਚੋਣ ਕਮਿਸ਼ਨਰ ਗਿਆਨੇਸ਼ ਕੁਮਾਰ ਨੂੰ ਲੈ ਕੇ ਮਜ਼ਾਕੀਆ ਮੀਮ ਤੇ ਟਿੱਪਣੀਆਂ ਦਾ ਹੜ੍ਹ ਆ ਗਿਆ ਹੈ। ਇਨ੍ਹਾਂ ਪੋਸਟਾਂ ਰਾਹੀਂ ਭਾਰਤ ’ਚ ਵੋਟ ਚੋਰੀ ਦੇ ਦੋਸ਼ਾਂ ਨੂੰ ਲੈ ਕੇ ਗਿਆਨੇਸ਼ ਕੁਮਾਰ ‘ਤੇ ਨਿਸ਼ਾਨਾ ਸਾਧਿਆ ਗਿਆ।
ਸਮਾਜਿਕ ਕਾਰਕੁੰਨ ਤੇ ਵਕੀਲ ਪ੍ਰਸ਼ਾਂਤ ਭੂਸ਼ਣ, ਕਾਕਰੋਚ ਜਨਤਾ ਪਾਰਟੀ ਦੇ ਸੰਸਥਾਪਕ ਅਭਿਸ਼ੇਕ ਦੀਪਕੇ ਸਮੇਤ ਕਈਆਂ ਨੇ ਟਰੰਪ ਦੀ ਹਾਰ ਨੂੰ ਲੈ ਕੇ ਵਿਅੰਗਮਈ ਪੋਸਟਾਂ ਸਾਂਝੀਆਂ ਕੀਤੀਆਂ। ਪ੍ਰਸ਼ਾਂਤ ਭੂਸ਼ਣ ਨੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ’ਤੇ ਤਨਜ਼ ਕੱਸਦਿਆਂ ਲਿਖਿਆ ਕਿ ਮੋਦੀ ਆਪਣੇ ਦੋਸਤ ਟਰੰਪ ਨੂੰ ਗਿਆਨੇਸ਼ ਕੁਮਾਰ ਨਹੀਂ ਭੇਜ ਸਕੇ ਕਿਉਂਕਿ ਉਨ੍ਹਾਂ ਨੂੰ ਪਹਿਲਾਂ ਆਪਣੇ ਆਪ ਨੂੰ ਸੰਭਾਲਣਾ ਪਿਆ ਤੇ ਹੁਣ ਗਿਆਨੇਸ਼ ਕੁਮਾਰ ਵੀ ਆਪਣੇ ਘਰ ਤੱਕ ਸੀਮਤ ਹੋ ਗਏ ਹਨ।
ਅਭਿਸ਼ੇਕ ਦੀਪਕੇ ਨੇ ਲਿਖਿਆ ਕਿ, ‘’ਗਿਆਨੇਸ਼ ਕੁਮਾਰ ਹੁੰਦੇ ਤਾਂ ਟਰੰਪ ਨਾਲ ਅਜਿਹਾ ਕਦੇ ਨਾ ਹੁੰਦਾ।’’ ਇਕ ਹੋਰ ਪੋਸਟ ’ਚ ਲਿਖਿਆ ਗਿਆ ਕਿ, ‘’ਟਰੰਪ ਨੂੰ ਇਸ ਸਮੇਂ ਗਿਆਨੇਸ਼ ਕੁਮਾਰ ਦੀ ਸਖ਼ਤ ਲੋੜ ਹੈ।’’ ਇਕ ਮੀਮ ’ਚ ਟਰੰਪ ਨੂੰ ਪ੍ਰਧਾਨ ਮੰਤਰੀ ਮੋਦੀ ਕੋਲ ਜਾਂਦਿਆਂ ਦਿਖਾਇਆ ਗਿਆ ਹੈ, ਜਿਸ ‘ਤੇ ਲਿਖਿਆ ਹੈ, ‘’ਭਰਾ, ਮੈਨੂੰ ਗਿਆਨੇਸ਼ ਦੇ ਦਿਓ।’’ ਕੁਝ ਵਿਅੰਗਮਈ ਪੋਸਟਾਂ ’ਚ ਦਾਅਵਾ ਕੀਤਾ ਗਿਆ ਹੈ ਕਿ ਟਰੰਪ ਨੇ ਅਮਰੀਕਾ ’ਚ ਚੋਣਾਂ ਕਰਵਾਉਣ ਲਈ ਗਿਆਨੇਸ਼ ਕੁਮਾਰ ਦੀਆਂ ਸੇਵਾਵਾਂ ਮੰਗੀਆਂ ਹਨ ਤੇ ਉਹ ਅਮਰੀਕੀ ਚੋਣ ਅਧਿਕਾਰੀਆਂ ਨੂੰ ਨਿਰਪੱਖ ਚੋਣਾਂ ਕਰਵਾਉਣ ਦੀ ਸਿਖਲਾਈ ਦੇਣ ਲਈ ਉੱਥੇ ਜਾਣਗੇ।
