ਗੱਗੋਮਾਹਲ/ਰਮਦਾਸ, 20 ਸਤੰਬਰ (ਸੰਧੂ/ਵਾਹਲਾ)-ਪਿੰਡ ਅਵਾਣ ਦੀ ਪੰਚਾਇਤੀ ਜ਼ਮੀਨ ਤੇ ਰੇਲਵੇ ਲਾਈਨ ਕੋਲ ਸਥਿਤ ਅਯੂਰਪਾਵਰ ਪਲਾਂਟ ਦੇ ਸੁਪਰਵਾਈਜਰ ਕੁਲਜੀਤ ਸਿੰਘ ਸਮਰਾ ਨੇ ਪੱਤਰਕਾਰਾਂ ਨੂੰ ਦੱਸਿਆ ਕਿ ਦਰਿਆ ਰਾਵੀ ਵਿਚ ਆਏ ਹੜ੍ਹ ਕਾਰਨ ਪਾਵਰਪਲਾਂਟ ਪੂਰੀ ਤਰ੍ਹਾਂ ਪਾਣੀ ਵਿਚ ਡੁੱਬ ਗਿਆ, ਜਿਸ ਨਾਲ ਪਲਾਂਟ ਨੂੰ ਭਾਰੀ ਨੁਕਸਾਨ ਪੁੱਜਾ | ਪਲਾਂਟ ਦੇ ਕੰਟਰੋਲ ਰੂਮ ਵਿਚ ਪਾਣੀ ਜਾਣ ਨਾਲ ਸੀ. ਬੀ. 40 ਦੋ ਟਰਾਂਸਫਾਰਮਰ, 4 ਇੰਨਵਰਟਰ 500 ਕਿਲੋਵਾਟ ਸਮੇਤ ਪਾਵਰਪਲਾਂਟ ਦੀਆਂ ਕਰੀਬ 8600 ਸੋਲਰ ਪਲੇਟਾਂ ਖਤਮ ਹੋ ਗਈਆਂ, ਜਿਸ ਕਰਕੇ ਪਾਵਰ ਪਲਾਂਟ ਨੇ ਕੰਮ ਕਰਨਾ ਬੰਦ ਕਰ ਦਿੱਤਾ ਤੇ ਅਜੇ ਤੱਕ ਵੀ ਪਲਾਂਟ ਨਕਾਰਾ ਹਾਲਤ ਵਿਚ ਪਿਆ ਹੈ | ਜਿਸ ਨੂੰ ਮੁੜ ਚਾਲੂ ਕਰਨ ਲਈ ਲੱਖਾਂ ਰੁਪਏ ਤੇ ਕਰੀਬ 2 ਮਹੀਨੇ ਦਾ ਸਮਾਂ ਲੱਗ ਸਕਦਾ ਹੈ | ਕਿਉਂਕਿ ਪਲਾਂਟ ਵਿਚ ਪੁੱਜਣ ਦਾ ਰਸਤਾ ਪਾਣੀ ਵਹਾਅ ਕੇ ਲੈ ਗਿਆ ਹੈ ਤੇ ਪਾਵਰ ਪਲਾਂਟ ਦੁਆਲੇ ਲੱਗੀ ਸੁਰੱਖਿਆ ਵਾਰਡ ਹੜ ਦੇ ਪਾਣੀ ਵਿਚ ਰੁੜ੍ਹ ਗਈ ਹੈ | ਉਨ੍ਹਾਂ ਕਿਹਾ ਕਿ ਹੜ੍ਹ ਨਾਲ ਪਲਾਂਟ ਦਾ ਵੱਡਾ ਆਰਥਿਕ ਨੁਕਸਾਨ ਹੋਇਆ ਹੈ |