ਨਵੀਂ ਦਿੱਲੀ, 20 ਸਤੰਬਰ (ਮਿਸਰਦੀਪ ਭਾਟੀਆ)-ਦਿੱਲੀ ਪੁਲਿਸ ਦੁਆਰਾ ਦਿੱਲੀ ਵਿਚ ਸਰਗਰਮ ਅਪਰਾਧੀਆਂ 'ਤੇ ਸ਼ਿਕੰਜਾ ਕੱਸਣ ਲਈ ਛਾਪੇਮਾਰੀ ਅਤੇ ਜ਼ਬਰਦਸਤ ਕਾਰਵਾਈ ਲਗਾਤਾਰ ਜਾਰੀ ਹੈ | ਦੱਖਣੀ ਪੂਰਬੀ ਜ਼ਿਲ੍ਹਾ ਪੁਲਿਸ ਦੇ 500 ਪੁਲਿਸ ਕਰਮਚਾਰੀਆਂ ਦੀਆਂ 40 ਵਿਸ਼ੇਸ਼ ਟੀਮਾਂ ਦੁਆਰਾ 'ਆਪ੍ਰੇਸ਼ਨ ਆਘਾਤ' ਦੇ ਤਹਿਤ ਸ਼ੁੱਕਰਵਾਰ ਰਾਤ ਭਰ ਛਾਪੇਮਾਰੀ ਕਰ ਕੇ 63 ਲੋਕਾਂ ਨੂੰ ਗਿ੍ਫ਼ਤਾਰ ਕੀਤਾ ਹੈ | ਇਸ ਕਾਰਵਾਈ ਵਿਚ 15 ਪਿਸਤੌਲਾਂ ਦੇ ਨਾਲ-ਨਾਲ ਵੱਡੀ ਮਾਤਰਾ ਵਿਚ ਸ਼ਰਾਬ, ਐਮ.ਡੀ.ਐਮ.ਏ., ਕੋਕੀਨ, ਹੈਰੋਇਨ ਅਤੇ ਨਕਦੀ ਵੀ ਬਰਾਮਦ ਕੀਤੀ ਗਈ ਹੈ | ਡੀ.ਸੀ.ਪੀ. (ਦੱਖਣੀ-ਪੂਰਬੀ ਦਿੱਲੀ) ਹੇਮੰਤ ਤਿਵਾੜੀ ਨੇ ਕਿਹਾ ਕਿ ਦਿੱਲੀ ਪੁਲਿਸ ਸੰਗਠਿਤ ਅਪਰਾਧ ਅਤੇ ਗੈਂਗਸਟਰਾਂ ਦੇ ਵਿਰੁੱਧ ਮੁਹਿੰਮ ਚਲਾ ਰਹੀ ਹੈ | ਇਸ ਮੁਹਿੰਮ ਦੇ ਤਹਿਤ ਦੱਖਣ-ਪੂਰਬੀ ਦਿੱਲੀ ਪੁਲਿਸ ਨੇ 'ਆਪ੍ਰੇਸ਼ਨ ਆਘਾਤ' ਸ਼ੁਰੂ ਕੀਤਾ ਹੈ | ਪਿਛਲੇ 24 ਘੰਟਿਆਂ ਵਿਚ ਅਸੀਂ 63 ਲੋਕਾਂ ਨੂੰ ਗਿ੍ਫ਼ਤਾਰ ਕੀਤਾ ਹੈ | ਅਸੀਂ ਆਰਮਜ਼ ਐਕਟ ਦੇ ਤਹਿਤ 15 ਪਿਸਤੌਲ, 24 ਜ਼ਿੰਦਾ ਕਾਰਤੂਸ ਅਤੇ 16 ਖੰਜਰ-ਚਾਕੂ ਬਰਾਮਦ ਕੀਤੇ ਹਨ | ਡੀ.ਸੀ.ਪੀ. ਨੇ ਅੱਗੇ ਦੱਸਿਆ ਕਿ ਆਬਕਾਰੀ ਐਕਟ ਤਹਿਤ 9 ਮਾਮਲੇ ਦਰਜ ਕੀਤੇ ਗਏ ਹਨ ਅਤੇ 6338 ਕੁਆਟਰ ਸ਼ਰਾਬ ਜ਼ਬਤ ਕੀਤੀ ਗਈ ਹੈ | ਐਨ.ਡੀ.ਪੀ.ਐਸ. ਐਕਟ ਤਹਿਤ ਅਸੀਂ ਲਗਭਗ 6 ਕਿਲੋਗ੍ਰਾਮ ਭੰਗ, 51 ਗ੍ਰਾਮ ਹੈਰੋਇਨ ਅਤੇ 54 ਗ੍ਰਾਮ ਐਮ.ਡੀ.ਐਮ.ਏ. ਜ਼ਬਤ ਕੀਤਾ ਹੈ | ਅਸੀਂ ਲਗਭਗ 78000 ਰੁਪਏ ਨਕਦ ਬਰਾਮਦ ਕੀਤੇ ਹਨ |