ਸਾਦਿਕ, 27 ਅਗਸਤ (ਆਰ.ਐਸ.ਧੁੰਨਾ)-ਬੀਤੀ ਰਾਤ ਚੋਰਾਂ ਵਲੋਂ ਸਾਦਿਕ ਵਿਖੇ ਇਕ ਦੁਕਾਨ ਦੀ ਪਿਛਲੀ ਕੰਧ ’ਚ ਪਾੜ ਲਾ ਕੇ ਦੁਕਾਨ ਵਿਚ ਪਈ ਨਗਦੀ ਚੋਰੀ ਕਰ ਲਏ ਜਾਣ ਦਾ ਸਮਾਚਾਰ ਹੈ। ਫ਼ਰੀਦਕੋਟ ਰੋਡ ਸਾਦਿਕ ਵਿਖੇ ਸਰਦਾਰ ਖਾਦ ਭੰਡਾਰ ਦੇ ਮਾਲਕ ਅਸ਼ੋਕ ਕੁਮਾਰ ਗੋਇਲ ਨੇ ਚੋਰੀ ਸਬੰਧੀ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ਉਨ੍ਹਾਂ ਨੇ ਸਵੇਰ ਸਮੇਂ ਦੁਕਾਨ ਦਾ ਸ਼ਟਰ ਖੋਲਿ੍ਆ ਤਾਂ ਦਰਾਜ ਖੁੱਲੇ੍ਹ ਪਏ ਸਨ ਅਤੇ ਉਨ੍ਹਾਂ ’ਚ ਪਈ ਕੁਝ ਨਗਦੀ ਵੀ ਗਾਇਬ ਸੀ। ਉਨ੍ਹਾਂ ਨੇ ਦੱਸਿਆ ਕਿ ਚੋਰ ਦੁਕਾਨ ਦੇ ਚੁਬਾਰੇ ਦੀ ਪਿਛਲੀ ਕੰਧ ’ਚ ਪਾੜ ਲਾ ਕੇ ਦੁਕਾਨ ਵਿਚ ਦਾਖਲ ਹੋਏ ਅਤੇ ਚੋਰੀ ਦੀ ਵਾਰਦਾਤ ਨੂੰ ਅੰਜ਼ਾਮ ਦਿੱਤਾ ਅਤੇ ਚੋਰ ਦੁਕਾਨ ’ਚ ਲੱਗੇ ਨਿਗਰਾਨੀ ਕੈਮਰੇ ਵੀ ਪੁੱਟ ਕੇ ਲੈ ਗਏ। ਇਸ ਮੌਕੇ ਘਟਨਾ ਦੀ ਜਾਂਚ ਕਰਨ ਲਈ ਪੁਲਿਸ ਪਾਰਟੀ ਸਮੇਤ ਪਹੁੰਚੇ ਹਰਜੋਤ ਸਿੰਘ ਸਹਾਇਕ ਥਾਣੇਦਾਰ ਥਾਣਾ ਸਾਦਿਕ ਨੇ ਵਿਸ਼ਵਾਸ ਦੁਆਇਆ ਕਿ ਚੋਰਾਂ ਨੂੰ ਜਲਦ ਹੀ ਕਾਬੂ ਕਰ ਲਿਆ ਜਾਵੇਗਾ। ਜ਼ਿਕਰਯੋਗ ਹੈ ਕਿ ਕੁਝ ਸਮਾਂ ਪਹਿਲਾਂ ਵੀ ਚੋਰਾਂ ਵਲੋਂ ਇਸੇ ਦੁਕਾਨ ’ਚ ਇਸੇ ਜਗ੍ਹਾ ਪਾੜ ਲਾ ਕੇ ਚੋਰੀ ਦੀ ਵਾਰਦਾਤ ਨੂੰ ਅੰਜ਼ਾਮ ਦਿੱਤਾ ਗਿਆ ਸੀ।
