ਚੌਂਕੀਮਾਨ, 17 ਜੂਨ (ਤੇਜਿੰਦਰ ਸਿੰਘ ਚੱਢਾ)-ਰੇਲਵੇ ਲਾਇਨ ਪਿੰਡ ਸੋਹੀਆਂ ਤੇ ਗਗੜਾ ਦੇ ਵਿਚਕਾਰ ਪ੍ਰਵਾਸੀ ਮਜ਼ਦੂਰਾਂ ਨੂੰ ਤਿੰਨ ਮੋਟਰਸਾਈਕਲ ਸਵਾਰ ਨੌਜਵਾਨਾਂ ਨੇ ਲੁੱਟਿਆ | ਸਖਰੂਪ ਸਿੰਘ ਪੂਨੀਆ ਪੁੱਤਰ ਬਲੌਰ ਸਿੰਘ ਪੂਨੀਆ ਵਾਸੀ ਪਿੰਡ ਕੋਠੇ ਪੋਨਾ ਨੇ ਦੱਸਿਆ ਕਿ ਉਨ੍ਹਾਂ ਨੇ ਪਿੰਡ ਸੋਹੀਆ ਵਿਖੇ ਮਾਮਲੇ 'ਤੇ ਜ਼ਮੀਨ ਲਈ ਹੋਈ ਤੇ ਪ੍ਰਵਾਸੀ ਮਜ਼ਦੂਰ ਸੋਮਾ ਪੁੱਤਰ ਸੁਬੱਈ ਤੇ ਵੇਚਨ ਯਾਦਵ ਪੁੱਤਰ ਜੋਮੀ ਯਾਦਵ (ਹਾਲ ਵਾਸੀ ਕੋਠੇ ਪੋਨਾ) ਸਾਡੇ ਕੋਲ ਕੰਮ ਕਰਦੇ ਹਨ ਤੇ ਝੋਨੇ ਦੀ ਬਿਜਾਈ ਚੱਲਦੀ ਕਰਕੇ ਉਹ ਇਕ ਖੇਤ ਤੋਂ ਦੂਜੇ ਖੇਤ ਮੋਟਰਸਾਈਕਲ 'ਤੇ ਜਾਂਦੇ ਹਨ ਤੇ ਅੱਜ ਦੁਪਹਿਰ 3:30 ਵਜੇ ਦੇ ਕਰੀਬ ਉਹ ਪਿੰਡ ਸੋਹੀਆ ਤੋਂ ਜਾ ਰਹੇ ਸਨ ਤਾਂ ਤਿੰਨ ਨੌਜਵਾਨ ਜੋ ਪਹਿਲਾ ਹੀ ਉੱਥੇ ਬੈਠੇ ਸਨ, ਉਨ੍ਹਾਂ ਨੇ ਸਾਡੇ ਮਜ਼ਦੂਰ ਜੋ ਮੋਟਰਸਾਈਕਲ 'ਤੇ ਸਨ ਨੂੰ ਰੋਕ ਲਿਆ | ਉਨ੍ਹਾਂ ਨੌਜਵਾਨ ਕੋਲ ਦਾਤਰ ਤੇ ਤੇਜ਼ਧਾਰ ਹਥਿਆਰ ਸਨ | ਉਨ੍ਹਾਂ ਨੇ ਮਜ਼ਦੂਰਾਂ ਦੀ ਗਰਦਨ 'ਤੇ ਦਾਤਰ ਰੱਖ ਕੇ ਇਕ ਸੈਮਸਿੰਗ ਦਾ ਮੋਬਾਇਲ ਤੇ 450 ਰੁਪਏ ਅਤੇ ਦੂਜੇ ਕੋਲੋ 2000 ਰੁਪਏ ਖੋਹ ਕੇ ਫ਼ਰਾਰ ਹੋ ਗਏ ਤੇ ਜਾਂਦੇ ਹੋਏ ਮਜ਼ਦੂਰਾਂ ਦੇ ਮੋਟਰਸਾਈਕਲ ਦੀ ਚਾਬੀ ਵੀ ਨਾਲ ਲੈ ਗਏ | ਸਖਰੂਪ ਸਿੰਘ ਪੂਨੀਆ ਨੇ ਦੱਸਿਆ ਕਿ ਪੁਲਿਸ ਚੌਂਕੀ ਚੌਂਕੀਮਾਨ ਵਿਚ ਦਰਖ਼ਾਸਤ ਦੇ ਦਿੱਤੀ ਹੈ |
